ჩოხატაურის მუნიციპალიტეტში ადგილობრივი თვითმმართველობის მოხელეთა შესარჩევი კონკურსი გუშინ დასრულდა. საკონკურსო/საატესტაციო კომისიის სხდომაზე თანამდებობაზე დასანიშნ კანდიდატურებს უყარეს კენჭი. კომისია ოფიციალურ სიას არ ასაჯაროებს იმ მოტივით, რომ ჯერ შეტყობინებები კონკურსანტებს უნდა დაეგზავნოთ. თუმცა, კომისიის გადაწყვეტილებებზე პრეტენზიები უკვე ისმის:
_ საკონკურსო კომისიის წევრი, თეა უჯმაჯურიძე წუხელ თავის დაქალებს ურეკავდა და ატყობინებდა დაინიშნეთო. რატომღაც მე არ ჩამთვალეს ღირსად პასუხი მაინც ეთქვათ. მოგვიანებით, დავურეკე უჯმაჯურიძეს ასე გავარკვიე, რომ არსად დამნიშნეს. იმ ადგილზე, სადაც მე მქონდა განაცხადი გაკეთებული, საკონკურსო კომისიის თავმჯდომარის მეზობელი, ზურაბ კოტრიკაძე დანიშნეს, რომელიც სამი დღით ადრე, ჯერ კიდევ კონკურსის დანიშვნამდე ზეიმობდა ახალ თანამდებობას, _ ამბობს ჩვენთან საუბრისას ერთ-ერთი კონკურსანტი, ლია ჩიგოგიძე, რომლის თქმით, კონკურსის დასრულებამდე ერთი დღით ადრე დაურეკა გამგებელს:
_ დავურეკე ირაკლი კუჭავას და ვუთხარი ვინ სად ინიშნებოდა. წინასწარ იყო ყველაფერი გადაწყვეტილი, _ გვითხრა ჩიგოგიძემ.
მისივე თქმით აღნიშნულ ვაკანსიაზე მას რეალური კონკურენტი არ ყავდა და კოტრიკაძე ნაცნობობით დაინიშნა:
_ იმ ვაკანსიაზე, რომელზეც არ მყავდა რეალური კონკურენტი, გამოუშვეს გორას გამგებელი, ზურაბ კოტრიკაძე. აქ ქულათა რაოდენობას მნიშვნელობა არ ქონდა იმიტომ, რომ 33 ქულა უკვე ყველასთვის ზღვრულია, _ დასძინა ჩიგოგიძემ, რომელიც საკუთარი სიმართლის დამტკიცებისთვის ბრძოლას აპირებს:
_ გადავწყვიტე წავიდე პარლამენტის წინ და ჩემს შვილებთან ერთად ვიშიმშილო. ვინაიდან ჩემი ქმარი მეორე ჯგუფის ინვალიდია წავიღებ ინვალიდის ჯოხს. დღეს ოფიციალურ შედეგს დაველოდები და ხვალიდან შიმშილობას დავიწყებ, _ გვითხრა ჩიგოგიძემ.
ამ თემაზე კომისიის წევრების პოზიციას "გურია ნიუსი" მოგვიანებით შემოგთავაზებთ.
