დღეს ქალაქ ოზურგეთის მუნიციპალიტეტის საკრებულოს თავმჯდომარის მოადგილის, ნინო გოგუაძის მიერ გაკეთებულ განცხადებას ქალაქ ოზურგეთის მუნიციპალიტეტის საკრებულოს დეპუტატი თამარ ნადირიძე პასუხობს:
თამარ ნადირიძე: "ძალიან ვწუხვარ, რომ ქალბატონი ნინო გოგუაძის აღშფოთება გამოვიწვიე. ვიცი, რომ ეს არ იყო ადვილი საქმე, რადგანაც ეს ქალბატონი არ აღშფოთებულა მაშინ, როდესაც მისი პარტია ავტორიტეტულმა და დიდი დამსახურების მქონე ორმა წევრმა დატოვა სწორედ მისი "დაცვის ქვეშმყოფის" გამო. არც მაშინ არ აღშფოთებულა, როდესაც მისი "დაცვის ქვეშმყოფმა" მის თანაპარტიელს ოზურგეთის ერთ-ერთ საარჩევნო უბანზე თავისი კაცი ჩაუსვა და საკრებულოს გარეთ დატოვა.
ბოლოსდაბოლოს ქალბატონი ნინო აღშფოთდა იმაზე, რომ ნათია შარაშენიძემ მერის შეკითხვებს თავი აარიდა. ასევე აღშფოთდა, როდესაც მე ადვოკატი მოვითხოვე და კიდევ იმაზეც აღშფოთდა, რომ მე მერს წინასაარჩევნო დაპირება შევახსენე.
გეთანხმებით, ქალბატონო ნინო, უვიცობაა აბა რა! როგორ შეიძლება ასეთი შეკითხვის დასმა?! ეს ხომ მერს არ ესიამოვნებოდა?! საყოველთაოდ ცნობილია, რომ უშუალოდ მერიაში და საკრებულოშიც ბევრმა იცის მერისათვის "სიამოვნების" მინიჭების ხერხები და მეთოდები, მაგრამ ან თუ არ ვიცი, ან არ შემიძლია, ან კი ეს ყველაფერი უზნეობად მიმაჩნია, ხომ უნდა გამიგოთ?
რაც შეეხება კვალიფიკაციას: რა ვიცი, იამაყეთ, თუ რაიმე საამაყო გაქვთ! ისე, თუ გახსოვთ, ამ ქალბატონმა და მისმა კოლეგებმა საკრებულოს პირველსავე სხდომაზე გადაფურცვლის გარეშე რომ დაამტკიცეს ოცდაათზე მეტი აქტი! მაშინ მაინც უნდა მივმხდარიყავი, რომ მათ კვალიფიკაციაში ეჭვის შეტანის საფუძველი არ მქონდა.
მერე ის როგორ ვერ მივხვდი, რომ სოციალურ ქსელში ჩემს მოსაზრებებს, შესაძლოა, მერი გაეღიზიანებინა?! ცოტათი ადრე, ისე, როგორც კოლეგას კოლეგისათვის მაინც გეთქვათ, თქვე ოჯახაშენებულებო, რაიმეს თუ ვაშავებდი! მერის "მრისხანების" მერე რომ აჟრიამულდით, ეს საქმეა? ან ქალბატონი ნათიას გამოსვლა რომ მოისმინეთ, იმავე კოლეგიალობიდან გამომდინარე მაინც გეთქვათ, რომ არ იყო მის მიერ გავრცელებული ინფორმაცია სწორი. თუ აქაც მერს ელოდებოდით? თუმცა მესმის! მერს თავზე ხომ არ გადაახტებოდით, ჩვენნაირები ხომ არ ხართ?!
ქალბატონო ნინო, "მერი არ გაგიწყრეთ" რომ ამბობთ "დასაქმებას ბიუჯეტში რა უნდოდა"-ო. თუ "ბიუჯეტში რა უნდოდა" და ეს ამბავი თვითმმართველობის გადასაწყვეტი არ იყო, მაშინ მერს რა უნდოდა როდესაც ხალხს წინასაარჩევნოდ პირდებოდა დაგასაქმებთ და ბიზნეს ავაყვავებო ?! ნუთუ ტყუილს ამბობდა? ალბათ თქვენ ფიქრობთ, რომ ბიუჯეტის გარეშე რაიმე შეიძლება მოიმოქმედოთ ან თქვენ ან კიდევ თქვენი დაცვიქვეშ მყოფმა. რა ვიცი, ვნახოთ! აქაა ეს ოზურგეთი, ოღონდ ხალხი დაასაქმეთ და ბიზნესი ააყვავეთ და აღარ დავეძებთ არაფერს.
და ბოლოს: საზოგადოებასაც მოვახსენებ, რომ მთავარი 26 დეკემბრის სხდომასთან დაკავშირებულ ამბავში არის ის, რომ ნათია შარაშენიძის ადგილობრივ მედიაში გამოსვლის შემდეგ ოზურგეთის მერმა მერიის აპარატის თანამშრომლებთან და საკრებულოს წევრებთან ერთად დაგეგმა შარაშენიძის ასე ვთქვათ "ჭკუის სწავლება", რაც სხვისთვისაც გასათვალისწინებელი უნდა ყოფილიყო. აი ამ "კონცერტზე" დასწრებაზე თქვა უარი ქალბატონმა ნათიამ და, რადგანაც ამჯერად მე არ ვიყავი ჭკუის სასწავლებელთა ჩამონათვალში, ჩემი შეკითხვაც ვერ ჩაეწერა ამ უნიჭო სცენარში.
და კიდევ ერთი რამ – განმარტებები ესაჭიროება არა მარტო საკრებულოს წევრებს, არამედ საზოგადოებას და თუ თვლით, რომ რაიმე შარაშანიძის გამოსვლაში არასწორი იყო, ეს პირველ რიგში მისთვის უნდა აგეხსნათ და მერე საზოგადოებისათვის. თქვენ კი, ნაცვლად ამისა, ბოლშევიკურ-კომკავშირული საჯარო გაკიცხვა და დაგმობა მოაწყვეთ, რასაც, მიუხედავად თქვენი ლიბერალობისა, ვერ ხედავთ.
არა, ისე ერთი ხეირიანი დაგმობისა და საჯარო "აუტოდაფე"-ს მოწყობა კი უნდა შეგეძლოთ, თორემ "ერეტიკოსები" და " ალქაჯები" შეუჩდნენ საკრებულოს. მართალია, მერია/საკრებულოს " შამან-მპოსტავთა" რესურსი უკიდეგანო არ არის, მაგრამ, როგორც ჩვენში იტყვიან, "მარცხი ელანძეა"-ო და ე მანდ ბელადს რამე არ დაემართოს და "ბუნდღები" არ გასცვივდეს.
მოკლედ, ქალბატონო ნინო "კაისაგანკაი", წერილი იყო და ერთი " კარ-აკოშკა" კი გეკუთვნით ჩვენი მერისაგან! არ ვიცი გჭირდებათ თუ არ გჭირდებათ, მაგრამ ნამდვილად გეკუთვნით.
და ბოლოს, მაპატიეთ ქალბატონო ნინო, თუ თქვენი განათლება, კვალიფიკაცია და ღვაწლი ჩვენი ქალაქისა და სამშობლოს წინაშე უფრო სხვა დონის წერილს იმსახურებდა, მაგრამ რა ვქნა, მეტი არ შემიძლია და თავს ზევით ძალა არ არის."
ამავე თემაზე: "რადგან ოზურგეთი პატარაა, ეს არ ნიშნავს "მაფიოზურად" მართოს მერმა თავისი ქალაქი"
ამავე თემაზე: "წინასწარ ბოდიშს ვიხდი, ვატყობ გრძელი სიტყვა, მოკლედ არ გამომივა"
