ახალგაზრდა მთამსვლელების 4-კაციანი ჯგუფი ბახმაროს მთების დასალაშქრად 30 იანვარს, ადიგენიდან წამოვიდა. როგორც გვითხრეს, ჯერ ბეშუმში იყვნენ, ხოლო 31 დეკემბერს ბახმაროდან 20 კილომეტრში, ხულოს მუნიციპალიტეტის სოფელ ზოტიყელში, ზღვის დონიდან 2300 მეტრზე, თოვლიან მთებში ავიდნენ.
ახალ წელიც ბახმაროს მთებში აღნიშნეს.
ტრაგედია პირველ იანვარს დატრიალდა _ ჩამოწოლილ ზვავში 20 წლის ახალგაზრდა ფარნა ბადურაშვილი მოყვა.
როგორც გვითხრეს, ახალგაზრდები მეგობარს მთელი დღის განმავლობაში ეძებდნენ, თუმცა, ვერ იპოვეს. რამდენიმესაათიანი უშედეგო ძიების შემდეგ, რამდენიმე კილომეტრი ფეხით იარეს იმ ადგილის საპოვნელად, საიდანაც მაშველების გამოძახებას შეძლებდნენ. სამაშველო სამსახურმა მათი შეტყობინება 2 იანვრის ღამეს მიიღო.
ჩოხატაურის მუნიციპალიტეტის სოფელ ზოტიდან წასულ მაშველებს მეგზურობას ადგილობრივები უწევდნენ. სამაშველო სამსახურის ბრიგადებმა, საკუთარი სიცოცხლის რისკის ფასად, 5 მეტრზე მაღალ თოვლში, მოახერხეს და ზოტიყელში ავიდნენ.
მოგვიანებით მათ დასახმარებლად შსს-ს სასაზღვრო პოლიციის ვერტმფრენი გამოჩნდა და დაკარგულ ახალგაზრდებს, რომლებიც თავს ე. წ. ბეღელს აფარებდნენ მიაგნო, თუმცა,
როგორც გვითხრეს, ისინი არ გამოყვნენ, რადგან მეგობრის ცხედრის პოვნას ელოდებოდნენ.
3 იანვარს, დაახლოებით 5 საათისთვის, მთებში დაღუპული ახალგაზრდა ჩოხატაურში ჩამოასვენეს.
ჩოხატაურში ჩამოიყვანეს დაკარგული ახალგაზრდებიც:
_ მხოლოდ ის შემიძლია გითხრათ, რომ ზვავი ჩამოწვა და ფარნა ამ ზვავში მოყვა. მეტი არაფერი მახსოვს, _ ეს იყო ერთადერთი კომენტარი, რომელიც ექსპედიციის წევრმა გიორგი ნაზღაიძემ მედიასთან გააკეთა.
ახალგაზრდებს ჩოხატაურში მშობლები და ახლობლები დახვდნენ. იქვე იყვნენ ჩოხატაურის მუნიციპალიტეტის გამგებელი და საკრებულოს თავმჯდომარე, პოლიციის თითქმის სრული შემადგენლობა, რომლებმაც მთელი დღის განმავლობაში ყველაფერი გააკეთეს იმისთვის, რომ დაკარგული ახალგაზრდები ბარში დროულად ჩამოეყვანათ.
მთამსვლელების ჩოხატაურში ჩამოსვლის ექსკლუზიური კადრები "გურია ნიუსს" ჩოხატაურის მუნიციპალიტეტის გამგებლის თანაშემწემ, იამზე ვაჩეიშვილმა მოაწოდა, რომელსაც მადლობას ვუხდით თანამშრომლობისთვის.
