მუჰჰამედ შუამავლის მოვლინებიდან 1443 წელთან დაკავშირებით საზეიმო ცერემონიალი მიმდინარეობს ამ წუთებში ბათუმის ხელოვნების ცენტრში, რომელსაც მუსლიმური მრევლთან ერთად, ცენტრალური და რეგიონის ხელისუფლებისა და სხვადასხვა კონფესიების წარმომადგენლები ესწრებიან. ცერემონიაზე საქართველოში აკრედიტებული დიპლომატიური კორპუსის წარმომადგენლებიც არიან მოწვეული.
ყურანის აითების (ამონარიდების) გარდა, ქართულ ენაზე შექმნილ ისლამური პოეზიის ნიმუშებსაც წაიკითხავენ.
მუჰამმედ შუამავალი დედამიწას 1443 წლის წინ, 571 წელს მოევლინა და ამ დღეს მუსლიმები ყოველწლიურად აღნიშნავენ. დღესასწაული მოძრავად ითვლება, რადგანაც მთვარის კალენდრით აღინიშნება.
საქართველოში დღეისათვის სხვადასხვა სტატისტიკური მონაცემებით მუსლიმი მოსახლეობის რაოდენობა 11 პროცენტს აღწევს. მათგან 200 დან 250 ათასამდე ( ზუსტი სტატისტიკური მონაცემები არ არსებობს) ადამიანი აჭარაში ცხოვრობს.
აჭარის რეგიონში დღეისათვის დაახლოებით 214 ჯამეა. რომელთაგან უძველესი აგებულია 1823 წელს. ბოლო 25 წლის განმავლობაში კი რეგიონში 14 ჯამე აშენდა. დანარჩენი ჯამეები მე-19 საუკუნეს ან მეოცე საუკუნის დასაწყისს მიეკუთვნებიან და უმეტესად ქართული ტრადიციული ხუროთმოძღვრების ნიმუშებს წარმოადგენენ.
