"გურია ნიუსი" აგრძელებს ოზურგეთის მუნიციპალიტეტის 2012-2013 წლების საფინანსო-ეკონომიკური საქმიანობის შესაბამისობის აუდიტის ანგარიშის გამოქვეყნებას.
საწარმოების სუბსიდიით დაფინანსება
2012-2013 წლებში ოზურგეთის მუნიციპალიტეტის მფლობელობაში იმყოფებოდა 5 შეზღუდული პასუხისმგებლობის საზოგადოება (შპს) და 26 არაკომერციული არასამეწარმეო იურიდიული პირი (ა(ა)იპ), რომელთაც ადგილობრივი ბიუჯეტიდან სუბსიდიური დაფინანსების სახით მიღებული აქვთ 10422.321 ათასი ლარი, რაც მთლიანი ბიუჯეტის 26%-ს შეადგენს. მიღებული სუბსიდიების მეტი წილი (73%) გახარჯულია შრომის ანაზღაურებაზე.
მუნიციპალიტეტის შპს-ების დაფინანსება
მუჰნიციპალიტეტის შპს-ები შემოსავლებს იღებენ როგორც თვითმმართველობის დაკვეთით შესრულებული სამუშაოებიდან და მომსახურეობიდან, ასევე სხვა კერძო სუბიექტებთან გაფორმებული გარიგებიდან. მიუხედავად აღნიშნულისა, მათ მიერ ფინანსური წელი დასრულებულია ზარალით ან უმნიშვნელო მოგებით (200 ლარამდე). მუნიციპალიტეტის მხრიდან არ არის შემუშავებული კონტროლის მექანიზმები, რასაც ადასტურებს ის გარემოება, რომ შპს-ები მუნიციპალიტეტში არ წარადგენენ წლიურ ანგარიშებს, შესაბამისად, არც მუნიციპალიტეტი ახორციელებს შპს-ების წლიური შედეგების განხილვას, ანალიზსა და მათი საქმიანობის შეფასებას.
აგრეთვე უნდა აღინიშნოს, რომ 2012-2013 წლებში შპს-ებს მუნიციპალიტეტისთვის არ წარუდგენიათ გრძელვადიანი განვითარების მაჩვენებლები. მუნიციპალიტეტის მხრიდან ზემოაღნიშნული მიდგომა ხელს ვერ შეუწყობს შპს-ების განვითარებას, ფინანსური შედეგების გაუმჯობესებას და მისაღები დივიდენდების ზრდას.
მუნიციპალიტეტის ა(ა)იპ-ების დაფინანსება
სპორტის, განათლების, კულტურისა და მომსახურების სფეროების ა(ა)იპ-ებს სუბსიდიის მისაღებად წლის დასაწყისში მუნიციპალიტეტში წარდგენილი აქვთ მოთხოვნები, რომლებშიც ძირითადად მითითებულია დაწესებულების შენახვის ხარჯები (შრომის ანაზღაურების, საქონელი და მომსახურების ხარჯები), კონკრეტული მიზნებისა და გეგმების გარეშე. უმეტეს შემთხვევაში მუნიციპალიტეტის მიერ სუბსიდია გაცემულია ისე, რომ არ არის გაანგარიშებული კონკრეტულ საქმეზე, რომელ პერიოდში, რა რაოდენობის თანხა უნდა გაიხარჯოს, არ არის შედგენილი სამუშაოების შესრულების გეგმა-გრაფიკი, ასევე არ არის გათვალისწინებული მომსახურების ხარისხი და კონტროლი მათ შესრულებაზე.
სუბსიდია წარმოადგენს საწარმოებსა და ორგანიზაციებზე მიმდინარე მიზნებისთვის უსასყიდლოდ, დაუბრუნებლად გაცემულ ტრანსფერს. აღნიშნულიდან გამომდინარე, სუბსიდიის დამტკიცებისას გაანგარიშებული უნდა ყოფილიყო მისი ოდენობა შესასრულებელი სამუშაოებისა და საქმიანობის გათვალისწინებით.
საკადრო პოლიტიკა
2014 წლის პირველი იანვრის მდგომარეობით, ოზურგეთის მუნიციპალიტეტში დასაქმებული იყო 336 პირი, მათ შორის, 75 შტატგარეშე. აღსანიშნავია, რომ 2012 წელთან შედარებით, 2013 წელს თვითმმართველობაში შტატგარეშე მომუშავეთა რაოდენობა გაიზარდა 33 ერთეულით.
"საჯარო სამსახურის შესახებ" საქართველოს კანონის თანახმად, შტატგარეშე მოსამსახურე არის პირი, რომელიც დანიშვნით ან შრომითი ხელშეკრულებით გარკვეული ვადით მიიღება სამსახურში არამუდმივ ამოცანათა შესასრულებლად. ფაქტობრივად კი, წარმოდგენილი ხელშეკრულების ანალიზით გამოვლინდა, რომ მათი აყვანა ხდება მთელი წლის განმავლობაში მუდმივი ამოცანების შესასრულებლად კერძოდ, სპეციალისტისა და მთავარი სპეციალისტის უფლება-მოვალეობების განსახორციელებლად.
2012 წლის აპრილში, "შრომის ანაზღაურების" უხდიან თანამდებობრივი სარგოს სახით როგორც "მე-13 თვის ხელფასი", გაცემულია 74.6 ათასი ლარი. აღსანიშნავია, რომ საქართველოს კანონმდებლობა არ ითვალისწინებს შრომის ანაზღაურების სახით "მე-13 თვის ხელფასის" გაცემას. შესაბამისად, გაცემული თანხა უნდა აღრიცხულიყო "პრემიის" მუხლში. ამასთან უნდა აღინიშნოს, რომ 2012 წელს შტატგარეშე თანამშრომლებზე "შრომის ანაზღაურების" მუხლიდან, პრემიის სახით გაცემულია 7.2 ათასი ლარი.
საქართველოს საბიუჯეტო კლასიფიკაციის მიხედვით, "შრომის ანაზღაურების" მუხლი არ ითვალისწინებს კონტრაქტორებისთვის გადახდილ თანხებს, რომლებიც დაწესებულების საშტატო რიცხოვნობაში არ შედიან. შესაბამისად, ნებისმიერი ამგვარი გადახდა უნდა ასახულიყო "საქონელი და მომსახურების" მუხლში.
ა(ა)იპ – "მომავლის სხივის" დაფინანსება
2012-2013 წლებში "სოციალურად დაუცველ ბავშვთა დღის ცენტრის თანადაფინანსების" პროგრამით გახარჯულია 72.0 ათასი ლარი. აღნიშნული პროგრამა ითვალისწინებდა, ა(ა)იპ – "მომავლის სხივში" მყოფი უკიდურესად შეჭირვებული ბავშვების ორჯერადი კვებით უზრუნველყოფას. წარმოდგენილი დოკუმენტების მიხედვით, მუნიციპალიტეტის მიერ ფაქტობრივად დაფინანსებულია, "მომავლის სხივის" თანამშრომლების შრომის ანაზღაურება და სხვა ხარჯები.
საწვავის ხარჯები
2012-2013 წლებში ოზურგეთის მუნიციპალიტეტის სამსახურების მიერ გახარჯულია 272.1 ათასი ლარის საავტომობილო საწვავი.
მუნიციპალიტეტის საკრებულოსა და გამგეობის მომსახურე ავტომანქანების მძღოლებზე გაცემულია საწვავის ტალონები, რომელთა ხარჯებში ჩამოწერა საფინანსო სამსახურის მიერ განხორციელებულია მატერიალური მარაგების ჩამოწერის აქტის საფუძველზე. ავტომანქანების მძღოლების მიერ არ არის შედგენილი მოხსენებითი ბარათები, სადაც დადასტურებულია მიღებული საწვავის ხარჯვა, მოძრაობის მარშრუტისა და შესრულებული დავალებების მიხედვით.
გარდა მუნიციპალიტეტის სამსახურებრივი ავტომანქანებისა, საწვავი აგრეთვე გაცემულია მუნიციპალიტეტის თანამშრომლების პირად ავტომანქანებზე გამოსაყენებლად. საფინანსო-საბიუჯეტო სამსახურის მიერ მოწოდებული ინფორმაციის შესაბამისად, 2012 წლის 19 ივნისამდე თანამშრომლების კერძო ავტომანქანებზე გაცემულია 24.4 ათასი ლარის ღირებულის საწვავი. აღსანიშნავია, რომ კერძო ავტომანქანებზე საწვავის სახით გაცემული სარგებელი არ არის დაბეგრილი კანონმდებლობით გათვალისწინებული საშემოსავლო გადასახადით.
ავტოსატრანსპორტო საშუალების შეძენა
2013 წელს ოზურგეთის მუნიციპალიტეტის მიერ შეძელია ავტო-გრეიდერი, ღირებულებით – 145.0 ათასი ლარი, რომელიც გადაეცა მუნიციპალიტეტის 100%-იანი წილით დაფუძნებულ შპს "ტექნოსერვისს". აღსანიშნავია, რომ ავტო-გრეიდერის შეძენამდე, იმ საამშენებლო სამუშაოებს რომლებიც საჭიროებდა ავტო-გრეიდერის მომსახურბას, ხელშეკრულების საფუძველზე, საბაზრო ღირებულებით ასრულებდნენ სხვადასხვა შემსრულებლები, შეძენის შემდეგ კი შპს "ტექნოსერვისი", როგორც მეწარმე იურიდიული პირი, მუნიციპალიტეტს მომსახურებას უწევს ასევე საბაზრო ღირებულებით.
შედეგად მუნიციპალიტეტის მიერ ვერ იქნება დასაბუთებული ავტო-გრეიდერის შეძენის აუცილებლობა.
