ქალაქ ოზურგეთში, უამრავი სოციალურად დაუცველი ადამიანი ცხოვრობს, მაგრამ ყოფილ საავადმყოფოში, ათობით უკიდურესად გაჭირვებული, სიღატაკის ზღვარზე მყოფი ადამიანების ყოველდღიური ყოფა წარმოუდგენელია.
აქ რამდენიმე ოჯახი შიმშილის ზღვარზეა. გაპარტახებული კედლები, აყრილი იატაკი, უფანჯრო, უკარო ოთახები, საწოლის გარეშე, იატაკზე დაძინებული ბავშვები, მარტოხელა მოხუცები, უწყლოდ და საჭმლის გარეშე.
რამდენიმე დღის წინ, აქ მცხოვრებლებმა აქციაც გამართეს, ისინი ხელისუფლების მიერ ელექტროენერგიის ჩაჭრას აპროტესტებდნენ, ხელისუფლება კი მათი მისამართით დენის უკანონოდ მითვისებაზე საუბრობდა, მართალია დენის მიწოდება რამდენიმე საათში ისევ აღუდგათ, თუმცა როგორც მოსახლეობა "გურია ნიუსთან" აცხადებს, ეს დროებითა და მხოლოდ 1 მარტამდე გასტანს.
ყოფილი საავადმყოფოს შენობა უსახლკარო მოსახლეობამ წინასაარჩევნოდ დაიკავა, ისინი აცხადებენ, რომ მათი აქ შესახლება ხელისუფლების მხრიდან ნებით მოხდა, ახლა ქალაქ მერიის წარმომადგენლებმა პირველ მარტამდე მისცეს გაჩერების დრო, თუმცა მოსახლეობის თქმით, ისინი შენობის დატოვებას არ აპირებენ, იმ მიზეზის გამო, რომ სახლ-კარი არ გააჩნიათ.
ყოფილ საავადმყოფოში შესახლებული, უსახლკარო მაკა ჟორდანიას ხუთი შვილი, გუშინ მთელი დღე მშიერი ჰყავდა.
მაკა ჟორდანია : "ვარ მრავალშვილიანი დედა, 5 შვილი მყავს, სოციალური დახმარება არ მაქვს, შვილები იატაკზე მიწევს, საწოლებიც კი არ მაქვს, რასაც აქ ხედავთ ყველაფერი საავადმყოფოსაა, არანაირი საშუალება არ მაქვს ბავშვებს ელემენტარულად სუპიც რომ გავუკეთო და პური გამოვუცხო.
გუშინ მთელი დღე ისე დაღამდა, რომ შვილები მშივრები იყვენენ, არაფერი არ მქონდა, დღეს პატარა გოგო წავიდა მაღაზიაში და ნისიად მოიტანა 4 პური, მაგრამ რით გადავიხდი არ ვიცი, ყველა უმუშევრები ვართ, სად უნდა გაგვიშვან? მე ვერსად ვერ წავალ, წასასვლელი არსად არ მაქვს."
პავლე ხასანისე დიასამიძე: "82 წლის ვარ, მარტოხელა მოხუცი, წვერმაღალაზე ხის ჯარგვალში ვცხოვრობდი, განცხადება დავწერე ორჯერ და მთავრობის კანცელარიაში შევიტანე, მომაქციეს ყურადღება, პასუხი მომივიდა, შემდეგ გადმოსცეს ოზურგეთის მუნიციპალიტეტს, მაშინდელმა გამგებელმა მითხრა რომ შეგიშვებთ აგერ საავადმყოფოშიო, სახლი არ მიყიდა, გათბობა არ მაქვს კი ხედავთ, ვერსად ვერ წავალ, ჩემს სიცოცხლეში აქ ვიქნები."
გულსუნდა კვირკვევლია: "8 თვის ბავშვი მყავს, დასუფთავების სამსახურში დავიწყე მეეზოვედ მუშაობა, მარტოხელა ვარ, არც შეშა მაქვს, არანაირი გათბობა, პატარა ბავშვიც სულ საავადმყოფოში მიწევს ავადმყოფობს, ნახეთ როგორ იატაკზე ვცხოვრობ."
ბოლქვაძე თემური: "წითელმთაში ვცხოვრობდით დროებით სხვის ოჯახში, არანაირი შემოსავალი არ გვავქს, პენსია აქვს მეუღლეს და ამით ვირჩენთ თავს, სოციალური მოგვიხსნეს."
მაია კალანდაძე: "სოხუმიდან ვართ დევნილები, ვცხოვრობდი ოზურგეთში რუსთაველის ქუჩაზე, მყავს მეუღლე და ორი შვილი, არიან სკოლის მოსწავლეები, ოთხი წელი ძველ სასტუმრო გურიაშიც ვიცხოვრე, სოციალურად დაუცველები ვართ და ესაა ჩვენი შემოსავალი, მეუღლე ფიზიკურად მუშაობს ქირაზე, მე ჯანმრთელობის მხრივ ვარ ავად, წყალი ჩვენ არ გვაქვს, მესამე სართულზე ბავშვები ეზიდებიან ვედრებით წყალს, აქ ცხოვრობენ თოთო, 4 და 5 თვის ბავშვებს რომ შუქს გამოურთავენ, ერთი ნათურა და ტელევიზორი ხომ უნდა ჩართო?"
მარინა ხუციშვილი: "მე მყავს მცირეწლოვანი ბავშვები, მეუღლე ფიზიკურად მუშაობს, საერთოდ არსად არ ვცხოვრობთ, , წყალს ვეზიდები მესმე სართულზე, , შეშას ჩემი ქმარი მდინარიდან ეზიდება."
მატრონა ნიკოლაიშვილი: "ვარ პენსიონერი, მარტოხელა 73 წლის, გაჭირვებით ვცხოვრობ, დალხინებული ჩემსავით იქნება? ქმარ-შვილი დახოცილი მყავს, 17 წელია მეზობლის ოჯახში ვცხოვრობდი, ღვთის მადლით თავშესაფარი გამომიჩნდა, ჩემი ყოველდღიური ცხოვრება ეს არის შვილო, ორი თავი კარტოფილი ან ერთი ცალი კვერცხი და რამდენიმე კოვზი ბრინჯი, უცხიმო სუპი, პური ვისესხე.
შეშას, "პიწკებს" ვეზებ მდინარიდან, ახლა არც მინთია, უფრო დიდი თოვლი რომ დადოს მეშინია, რაც მაქვს შეგროვებული ესაა, წყალს ქვემოდან ვეზიდებით, თუ მოგვაქცევენ იმის ყურადღებას, რომ შუქი გვქონდეს და წყალი , რასაც დავხარჯავთ შუქს იმას გადავიხდით, რატომ გაგვაჩერეს მაშინ აქამდე, თუ უნდა გაგვყარონ? არჩევნებამდე შემოგვიშვეს და ახლა უნდა გაგვიშვან? არსად არ წავალთ, ტყუილია."
აღნიშნულ საკითხთან დაკავშირებით, ქალაქის მერიის პრესსამახური ასეთ კომენტარს აკეთებს: "ქალაქის მერის დავალებით, გუშინ ქალაქის მერიაში შეიკრიბა კომისია მერის მოადგილის კობა დუნდუას ხელმძღვანელობით. კომისიას ოპერატიულ რეჟიმში დაევალა მუშაობა, რაც შეიძლება მცირე დროში უნდა მოგვარდეს დოკუმენტაციასთან დაკავშირებული საკითხები, რაც შემდგომში გაამარტივებს პრობლემის გადაჭრის გზებს. უპირველეს ყოვლისა უნდა გაიმიჯნოს ქალაქისა და სოფლის მკიდრნი, შემდგომი დაკმაყოფილებისთვის.
შეგახსენებთ, რომ საავადმყოფოს შენობაში შესახლებულებს არ მიეწოდებოდათ ელექტროენერგია, მერის ინიციატივით მათ აღუდგათ შუქის მიწოდება, ხოლო გადასახადს 1 მარტამდე მერია დაფარავს.
ჩვენთვის ნაცნობია, თუ რა მძიმე პირობებში უწევთ ამ ბენეფიციარებს ცხოვრება, ამიტომ უნდა გაირკვეს ვინ არის ნამდვილად უსახლკარო და ასეთ ადამიანებს მიეცეთ თავშესაფარი. ქალაქ ოზურგეთის მუნიციპალიტეტის მერიის ინიციატივით 2015 წლისათვის იგეგმება ძველი სამშობიაროს შენობის რეაბილიტაცია, სადაც განთავსდებიან უსახლკაროები."
