_ 262 ათასი დევნილია ამ წუთისთვის აღრიცხული. ეს ციფრი ყოველდღიურად იცვლება . თვეში ორჯერ-სამჯერ მიწევს ხელის მოწერა _ რამდენიმე ათას ადამიანს მიეცა ისევ სტატუსი, ზოგი დაიბადა, ზოგი ქვეყანაში შემოვიდა, რამდენიმე ასეულს შეუწყდა იმიტომ, რომ არასწორად ჰქონდა მიცემული. ეს პროცესი ყოველდღიურია. რაც შეეხება ეკომიგრანტებს, ამ კატეგორიასთან დაკავშრებით გაცილებით სავალალო მდგომარეობაა. არსებობს 2006 წლის მონაცემი, რომლითაც თითქოს 35 ათასი ადამიანია ეკომიგრანტი, თუმცა, სინამდვილეში ამდენი არ არის. სავარაუდოდ, შეიძლება 10 000-ის ფარგლებში იყოს. იცით როგორი სავარაუდო? _ პლიუს მინუს 5000-ს რომ იტყვი. 50, შეიძლება 70 პროცენტიანი ცდომილებაა. ამას სჭირდება ძალიან დიდი და შრომატევადი შესწავლა. ეკოლოგებმა, გარემოს დაცვის სამინისტრომ, ჩვენმა სამინისტრომ ერთად უნდა უნდა მოვიაროთ ისეთი რეგიონები როგორიც არის მთიანი აჭარა, გურიის მეწყრული, მაღალმთიანი სოფლები, ქვემო სვანეთი, მესტიის რაიონი, ლეჩხუმი, რომელიც ძალიან დაზარალებულია. სამეგრელოშიც არის ადგილები, სადაც ღვარცოფების საშიშროებაა და მხოლოდ ამის შესწავლის შემდეგ შეიძლება დადგინდეს ზუსტი ციფრი. ეს მრავალწლიანი შრომაა, _ ამბობს სუბარი.
მისივე თქმით, ეს ციფრი ახლო მომავალში ვერ დადგინდება.
_ ახლო მომავალში რასაც ვაკეთებ ისაა, რომ იქ სადაც უკიდურესი მდგომარეობაა, ადამიანებს ვეხმარებით. ის რომ ჩვენ ზოგადი ციფრი არ ვიცით, რომელიც სტრატეგიული ამოცანაა, არ გვიშლის ხელს ყველაზე გაჭირვებულებს დავეხმაროთ. ყველაზე გაჭირვებულებს ვამბობ იმიტომ, რომ ბუნებრივია ყველას ვერ ვეხმარებით. ამას ძალიან დიდი რესურსი სჭირდება. იგივე შემიძლია ვთქვა დევნილებზე. იმ დროს როცა საქართველოში დაახლოებით 90 000-მდე დევნილი ოჯახია, ბინით დაკმაყოფილებულია სადღაც 22-23 000. 5000-ს ფულადი კომპენსაცია აქვს მიღებული, მათ შორის, ზოგიერთს არასრულყოფილად, სააკაშვილის პერიოდში ძალად რომ ასახლებდნენ ნაწილობრივ აძლევდნენ თანხას. დაახლოებით 56 000 ოჯახია, რომელიც ელოდება ბინას. 21 წლის განმავლობაში მხოლოდ 1/3 ის დაკმაყოფილება მოხერხდა.
_ ბატონო სოზარ სამინისტროს ბიუჯეტის ვერ შესრულებაში დადგეს ოპონენტებმა ბრალი…
_ ეს არის აბსოლუტური ტყუილი, თუმცა ამ ტყუილს აქვს თავისი საფუძველი. საფუძველი არის ის, რომ როდესაც მოვედი სამინისტროში პრაქტიკულად ათვისება არც იყო დაწყებული. ხელფასებს თუ არ ჩავთვლით. მისვლიდან თვე, თვენახევარი დამჭირდა სანამ გავერკვეოდით რომელი პროექტები იყო დასაფინანსებელი და გასაგრძელებელი. ბევრი პროექტი გავაჩერე, რადგან იყო უხარისხო მშენებლობები. მაგალითად გორში, დეკემბრის ბოლოს, მშენებლობაზე, რომელიც გავაჩერეთ, ჩამოინგრა ერთი შენობის ცენტრალური ნაწილი. იქ წესით დევნილები შესახლებულები უნდა ყოფილიყვნენ. რომ არ შემეჩერებინა მშენებლობა წარმოიდგინეთ რა ტრაგედია მოხდებოდა.
პრაქტიკულად სექტემბრის ბოლოს დავიწეთ ხარჯვა. 30 დეკემბრის მდგომარეობით ათვისებული იყო 99.7 %, დაახლოებით 100 000 ლარი დარჩა ასათვისებელი და ისიც შეგნებულად დავტოვეთ, რადგან არსებობს გარკვეული ვალდებულებები, რომლებიც 2014 წლის ბიუჯეტით უნდა შესრულებულიყო. მაგალითად ვიღაცამ რაღაც რემონტი გააკეთა და საბუთი ვერ წარმოადგინა დროზე. რეალურად უკვე იქამდე იყო საქმე მიყვანილი, 31 დეკემბერს რომ მქონოდა 2-3 მილიონი ავითვისებდი 31 დეკემბერსვე იმ ვალდებულებებისთვის, რომელიც უკვე აღებული გვაქვს. თუ ავიღებთ ჩინელებთან გაფორმებულ კონტრაქტს თბილისის ზღვაზე ბინების შესყიდვასთან დაკავშირებით, მარტო ამას უნდა 15-25. ვინმეს რომ დაერეკა პარლამენტიდან ავუხსნიდი ამ მდგომარეობას, მაგრამ რატომღაც არ გააკეთეს.
სუბარის თქმით, ბოლო 15 წლის განმავლობაში თბილისში არ აშენებულა არცერთი საცხოვრებელი ბინა, სადაც დევნილები შესახლდებოდნენ.
_ მათ რაღაც შენობები დაუკანონდათ სააკაშვილის პერიოდში სადაც ისინი ყოველგვარი რემონტის გარეშე ცხოვრობდნენ. შეიძლება იყო მინიმალური რემონტი, მაგრამ აშენება არ მომხდარა, _ აღნიშნა სუბარმა და განმარტა, რომ მიმდინარე წელს, მხოლოდ თბილისში, დევნილებისთვის 1000-ზე მეტი საცხოვრებელი ბინა იქნება შეძენილი.
