ეს კითხვა უკვე 2 წელია ისმის ლანჩხუთში, მაგრამ პასუხის გამცემი არავინაა. საქმე იმაშია, რომ 2012 წლის დასაწყისში, მუნიციპალური განვითარების ფონდმა, ქალაქ ლანჩხუთში წყლის სისტემების რეაბილიტაციის პროექტი დაიწყო.
ტენდერში გამარჯვებულმა კომპანიამ აღნიშნული მასშტაბური სამუშაოები უკვე განახორციელა, მაგრამ რამდენიმე ქუჩა სამუშაოების დასრულების შემდეგ დაზიანებული დატოვა.
ჰქონდა თუ არა ვალდებულება ამ კომპანიას პროექტით პირვანდელი სახე დაებრუნებინა ამ ქუჩებისთვის? და თუ ჰქონდა რატომ არ შეასრულა? ლანჩხუთის მუნიციპალიტეტის გამგებელს, ზაზა ურუშაძეს ამ კითხვებზე პასუხი ჯერაც არ მიუღია – "2 წელია ვცდილობ ამის გაგებას, სად არ მოვიკითხე, მაგრამ ვერაფერი გავიგე".
ექს-გამგებელი, გია გოგუაძე ირწმუნება, რომ ქუჩების და ტროტუარების აღდგენა არა ჩვენი, არამედ იმ კომპანიის ვალდებულებაა, ვინც აღნიშნული სამუშაოები განახორციელა.
"სულ რამდენიმე დღეა რაც დასრულდა კოსტავას ქუჩის რეაბილიტაცია და გამოდის რომ სხვისი გასაკეთებელი ჩვენ გავაკეთეთ. აგერ წელს ინფრასტრუქტურული პროექტებით ქალაქის ცენტრალური ქუჩის ტროტუარების რეაბილიტაციას ვგეგმავთ. რატომ ვხარჯავთ ამაში ფულს და ხომ არ ვახდენთ პროექტების გაორებას?", – აცხადებს გოგუაძე.
