23-ე დღეა თვითმმართველობების ბიუჯეტები პარალიზებულია

უკვე 23-ე დღეა თვითმმართველობის ბიუჯეტი უმოქმედოა. გადაუხდელი თანხები, შეჩერებული გადარიცხვები და ხელფასების მომლოდინე ადამიანები _ ეს ის რეალობაა, რომელიც ბიუჯეტების სახაზინო მომსახურებაზე გადასვლას მოყვა.

1 იანვრიდან ყველა დონის ბიუჯეტი, გარდა საგანმანათლებლო დაწესებულებებისა, სახაზინო მომსახურებაზე გადავიდა.
ფინანსთა მინისტრმა, ნოდარ ხადურმა ამ ინფორმაციის გაჟღერებისას აღნიშნა, რომ  "ეს სამინისტროს საშუალებას მისცემს სტატისტიკურად და ინფორმაციულად ჰქონდეს წვდომა, თუ რა ხდება საჯარო ფინანსების მართვის კუთხით“

_ აქამდე ზოგიერთს ჰქონდა კომერციულ ბანკებში, ზოგს ხაზინაში, ახლა მოხდება კონსოლიდაცია, რაც ჩვენ საშუალებას მოგვცემს სტატისტიკურად და ინფორმაციულად გვქონდეს ონლაინ წვდომა, რა მდგომარეობაა საჯარო ფინანსების მართვის თვალსაზრისით. სრულად დაინერგება საჯარო ფინანსების მართვის ევროპული სისტემა. ეს იქნება არაკონტროლი, არამედ აღრიცხვიანობა. თავისთავად ცხადია, რომ ითოეული თვითმმართველობის ბიუჯეტს ადგილობრივი თვითმმართველობის არჩეული ორგანო,საკრებულო აკონტროლებს" – განაცხადა ხადურმა.

_  თითქმის ყველას ბანკის ვალები აქვს და ყველა გადაცილებულ დღეზე ჯარიმები დაგვერიცხა. არ ვიცით რა უნდა გავაკეთოთ, ვის მივმართოთ.  არც იმას გვეუბნებიან როდის იქნება, _ ამბობენ საბიუჯეტო ორგანიზაციაში მომუშავე ადამიანები.

_ მთავრობა ხართ თუ კანტორა? კეთილი ინებეთ და ხელფასები დროულად დაგვირიგეთ. თუ ჩვენი ბანკის, ლომბარდის, განვადების და რა ვიცი, კიდე რამდენი რამის ვალს თქვენ გადაგვიხდით? არცთუ ურიგო ხელფასს ჩვენი ნერვების აშლაში არა მგონია გიხდიდეთ, _ აღნიშნული გზავნილი საქართველოს მთავრობას ფეისბუქის საშუალებით გაუგზავნა ჩოხატაურის ბაღების გაერთიანების იურისტმა ვარდო სიხარულიძემ.

ხელფასის მომლოდინე ადამიანების რიცხვი ყოველ წუთს იზრდება ბანკომატებთან. აქვე გაიგებთ საყვედურებს მთავრობის მისამართით და უპასუხო შეკითხვას: ასე სანამდე უნდა გაგრძელდეს?

ამ კითხვაზე პასუხი არც მუნიციპალიტეტების საფინანსო სამსახურებს გააჩნიათ. ოზურგეთის, ჩოხატაურის, ლანჩხუთის, ზუგდიდის, ხარაგაულის და თითქმის ყველა მუნიციპალიტეტის გამგეობებში გვეუბნებიან, რომ ხაზინის გახსნას ელოდებიან.

_ პრობლემები ნამდვილად გვაქვს. როგორ ვთქვა რომ ყველაფერი კარგადაა. გვპირდებიან, რომ ორშაბათიდან გახსნიან ხაზინას, _ აღნიშნა ჩვენთან საუბრისას ლანჩხუთის მუნიციპალიტეტის გამგებელმა ზაზა ურუშაძემ.

აღსანიშნავია, რომ ხაზინაზე გადასვლის გამო ლანჩხუთში საბავშვო ბაღები არ დაწყებულა. ურუშაძე ამბობს, რომ ეს პრობლემა მალე გადაიჭრება:

_ მოვახერხებთ და ბაღებს აუცილებლად დავიწყებთ, _ გვითხრა ურუშაძემ.

თუკი ხაზინა უახლოეს დღეებში არ გაიხსნება, პრობლემა შეექმნება ჩოხატაურის ბაღების გაერთიანებასაც. მომმარაგებელი ჩვენთან საუბრისას ამბობს, რომ დავალიანების გაუსტუმრებლობის შემთხვევაში ბაღში საკვების შეტანას ვერ მოახერხებს:

_ საკვებს მეც ნისიად ვიღებ. თუ მომწოდებელს თანხას ვერ გადავუხდი, პროდუქტს არ მოიტანს და შესაბამისად, ვერ ბაღებს მივაწვდი, _ გვითხრა ინდმეწარმემ, რომელიც ჩოხატაურის ბაღებს ამარაგებს.

ჩოხატაურის მუნიციპალიტეტის გამგებლის ირაკლი კუჭავას ინფორმაციით არსებული პრობლემები იმ კვირაში მოგვარდება:

_ როგორც ვიცით, ხაზინა იმ კვირაში გაიხსნება და პრობლემებიც მოგვარდება, _ აღნიშნა "გურია ნიუსთან" საუბრისას კუჭავამ.

ოზურგეთის მუნიციპალიტეტის გამგებელი მერაბ ჭანუყვაძე ამბობს, რომ "პრობლემები ელექტრონულ გადარიცხვებზე, ჯერჯერობით არ შექმნილა":

_ საბიუჯეტო ორგანიზაციების ერთიან სახაზინო მომსახურებაზე გადასვლა ფინანსთა სამინისტროს მიერ დაგეგმილი იყო 2015 წლის 1 იანვრიდან, რის გამოც, 2014 წლის ოქტომბრის თვიდან ინტენსიურად ხორციელდებოდა საფინანსო საბიუჯეტო სამსახურის თანამშრომელთა გადამზადება, როგორც ფინანსთა სამინისტროს აკადემიაში, ასევე, მუნიციპალიტეტებში. მიმდინარეობს გამგეობისა და საკრებულოს თანამშრომელთა პირადი მონაცემების შეყვანა შრომის ანაზღაურების ელექტრონულ უწყისში. რაც შეეხება, გამგეობასთან საფინანსო ურთიერთობაში მყოფ ორგანიზაციებს, მათთვის ანგარიშსწორება, ჩვეულებრივ, ხორციელდებოდა კალენდარული თვის ბოლოს. გამომდინარე აქედან, პრობლემები ელექტრონულ გადარიცხვებზე, ჯერჯერობით არ შექმნილა. პრობლემა, სავარაუდოდ, თვის ბოლომდე გადაიჭრება, _ გვითხრა ჭანუყვაძემ.

მისივე თქმით, მუნიციპალიტეტის ბაღებში სააღმზრდელო პროცესი 2 თებერვლიდან იწყება, ამიტომ,  საკვებით მომარაგებაზე პრობლემა არ შექმნილა.

_ ამ დროისთვის,  ყველა ტენდერი დასრულებულია, ხელშეკრულება გაფორმებულია ტენდერში გამარჯვებულ კომპანიებთან.  30 იანვრიდან 2 თებერვლამდე დასრულდება ყველა საბავშვო ბაღის საკვები პროდუქტებით მომარაგება, _ დაგვიკონკრეტა ჭანუყვაძემ.

პრობლემების დროულად მოგვარებას აანონსებენ ფინანსთა სამინისტროში:

"საჯარო ფინანსების მართვის ეფექტურობისა და ეფექტიანობის გაზრდის,  ყველა დონის ბიუჯეტების ოპერაციების გამჭვირვალობის უზრუნველყოფისა და ანგარიშვალდებულების გაუმჯობესების მიზნით, საქართველოს ფინანსთა სამინისტროს აკადემიაში გრძელდება ქვეყნის მასშტაბით საჯარო სამართლის იურიდიული პირების, არასამეწარმეო (არაკომერციული) იურიდიული პირების, ავტონომიური რესპუბლიკებისა და ადგილობრივი თვითმმართველი ერთეულების  ფინანსური მენეჯერების გადამზადება, _ დაგვიკონკრეტა ფინანსთა სამინისტროს პრესსამსახურის ხელმძღვანელმა, რომლის თქმით ტრენინგები 2014 წლის ნოემბრიდან მიმდინარეობს._ 

კონკრეტულად როდის გაიხსნება ხაზინა, როდის მოგვარდება არსებული პრობლემები და რატომ ვერ მოახერხა სამინისტრომ ფინანსისტების ამ დრომდე გადამზადება _  ამ კითხვებზე სამინისტროს პასუხს "გურია ნიუსი“ დაპირებისამებრ, პრესსამსახურიდან ელოდება და მიღებისთანავე შემოგთავაზებთ.