საქართველოს შინაგან საქმეთა სამინისტროს კრიმინალური დეპარტამენტის უფროსის მოადგილემ, ოთარ მირზოევმა თანამდებობა დატოვა.
როგორც "გურია ნიუსს“ შსს-ს პრესსამსახურში განუცხადეს, მან თანამდებობა პირადი განცხადების საფუძველზე დატოვა.
განცხადება კადრების განყოფილებას უკვე ჩაბარდა.
დაახლოებით, ორი კვირის წინ კი თანამდებობა ასევე პირადი განცხადების საფუძველზე დატოვა ქალაქის პოლიციის მთავარი სამმართველოს უფროსმა გიორგი დალაქიშვილმა.
"დალაქიშვილიც თავისი განცხადების საფუძველზე გათავისუფლდა დაკავებული თანამდებობიდან და მის ადგილს ამჟამად შალვა ბედოიძე იკავებს“, _ აცხადებენ შსს-ს პრესსამსახურში.
ცნობისთვის, იური ვაზაგაშვილი გარდაცვალებამდე აცხადებდა, რომ მისი შვილის მკვლელობის ერთ-ერთი მონაწილე, გიორგი დალაქიშვილი ქალაქის პოლიციის მთავარი სამმართველოს უფროსად მუშაობდა, ხოლო მეორე პირი – ოთარ მირზოევი, შსს-ს კრიმინალური დეპარტამენტის უფროსის მოადგილე იყო.
აღსანიშნავია, რომ ძალოვან უწყებაში საკადრო ცვლილებები დეკემბერშიც განხორციელდა და თანამდებობა კიდევ რამდენიმე თანამდებობის პირმა დატოვა. კერძოდ, შინაგან საქმეთა მინისტრის პირველმა მოადგილემ გიორგი ზედელაშვილმა და სუს-ის უფროსმა მალხაზ ჩიკვილაძემ.
ცნობისთვის, თანამდებობიდან გათავისუფლების მოთხოვნით დღეს პრემირ-მინისტრს შს მინისტრმა ალექსანდრე ჭიკაიძემაც მიმართა. ჭიკაიძის მოვალეობას მისი პირველი მოადგილე ვახტანგ გომელაური შეასრულებს.
