დღეს გამართულ პრესკონფერენციაზე "ნაციონალური მოძრაობის" ერთ-ერთმა ლიდერმა, ზურაბ ჯაფარიძემ მედიას საპატრულო პოლიციის თანამშრომლისა და ერთ-ერთი მოქალაქის საუბრის ამსახველი ორი ვიდეომასალა წარუდგინა.
ჯაფარიძის თქმით, ვიდეომასალაში მოქალაქე ეკა ყუშიტაშვილი, პირადი კონტაქტების საშუალებით ცდილობს, საპატრულო პოლიციის ეკიპაჟს ადმინისტრაციული ჯარიმა არ გამოაწერინოს.
_ წარმოგიდგენთ ორ ეპიზოდს, სადაც ასახულია მოქალაქე, რომელმაც დაარღვია საგზაო მოძრაობის წესები და მისი ურთიერთობა საპატრულო პოლიციასთან. ორივე შემთხვევაში ნათლად ჩანს ამ მოქალაქის უხეში დამოკიდებულება პატრულის თანამშრომლების მიმართ. გარდა ამისა, ჩანს, რომ მოქალაქე თავისი პირადი კონტაქტების საშუალებით ცდილობს მოაგვაროს კანონთან მიმართებაში არსებული პრობლემა, კერძოდ ის ამასთან დაკავშირებით უკავშირდება თბილისის საპატრულო პოლიციის უფროსსა და მის მოადგილეს. ნათელია, რომ ხდება დაბრუნება შევარდნაძის დროინდელ პრაქტიკაში, როცა მოქალაქეები, რომლებსაც დანაშაული აქვთ ჩადენილი კანონის წინაშე, პრობლემას პირადი ნაცნობობით აგვარებენ _ აღნიშნა ჯაფარიძემ.
მისივე თქმით, საპატრულო პოლიციის ის თანამშრომელი, რომელსაც აღნიშნული მოქალაქე ერთ-ერთ ვიდეოში უწმაწური სიტყვებით მოიხსენიებს, სამსახურიდან გაათავისუფლეს.
_ ის გაათავისუფლეს თანამდებობიდან მხოლოდ და მხოლოდ იმის გამო, რომ ასრულებდა კანონით მასზე დაკისრებულ მოვალეობას. ის უნდა აღდგეს სამსახურში და გამოძიების შედეგად უნდა დაისაჯონ ის ადამიანები, რომლებმაც ბოროტად გამოიყენეს საკუთარი თანამდებობა და ჩაიდინეს დანაშაული, _ აღნიშნა ჯაფარიძემ.
გავრცელებულ ვიდეოზე ამ დრომდე არ გაუკეთებია კომენტარი შინაგან საქმეთა სამინისტროს. მიუხედავად მრავალგზის მცდელობისა, პრესსამსახურში ჩვენს ზარებს არ პასუხობენ. უწყების პრესსამსახურის ხელმძღვანელმა, ნინო გიორგობიანმა, არც სოციალურ ქსელში გაგზავნი შეტყობინებას უპასუხა.
