მოგეხსენებათ, ასეთი ამბები იშვიათად ხდება და ამიტომაც დაინტერესდნენ ლანჩხუთური სკანდალით ქართული საინფორმაციო საშუალებები, წამყვანი მედია-საშუალებები და ტელევიზიები. მათ საკუთარ ვებგვერდებზე www.gurianews.com-ის მიერ ამ ინციდენტის ამსახველი მასალის ლინკი ჰქონდათ გამოქვეყნებული.
ჩვენ ამ საქმის ახალი დეტალების გაგება მოვახერხეთ. როგორც ირკვევა, შემთხვევას წინ უსწრებდა მძღოლთან სამართალდაცველების შელაპარაკება, ხოლო განაწყენებულის დაშოშმინება მისი ტრაილერის სალონის ფანჯრების ჩამტვრევის შემდეგ მოხერხდა. კიდევ კარგი, ეს ამბავი ერთი თვის შემდეგ რომ არ მოხდა, როცა პოლიცია ახალ შენობაში იქნებოდა გადასული. ამჟამინდელი პოლიციის შენობა ძველია და, როგორც ჩანს, კარგი ნაშენია, ამიტომაც არ ჩამოინგრია კედელი. ტრაილერი შუშის შენობას რას დამართებდა, ადვილი წარმოსადგენია!
ჩვენ დაკავებულის შესახებ ინფორმაციის მოპოვება მოვახერხეთ. იგი დადებითად ხასიათდება, არასდროს ჰქონია საქმე სამართალდამცველებთან: _ ძალიან კარგი ბიჭია, მშრომელი, მეგობრების მოყვარული და შესაძლოა, სწორედ მეგობრების გამო მოუვიდა ეს ამბავი, თორემ მისი ჩხუბიც არავის ახსოვს. ალალი ბიჭია, ნასვამი იყო ეტყობა, თორემ სიფხიზლეში ასეთს არ გააკეთებდა. დაღუპა თავი, პოლიცია ამას აპატიებს?! _ ამბობენ დაკავებულის ნაცნობები.
ლანჩხუთელების აზრები მომხდართან დაკავშირებით გაიყო _ ზოგი ამბობს, კარგი უქნიაო, ზოგს ეცოდება _ ვის ხელში ჩაიგდო თავიო, ხოლო ნაწილი ამბობს, მერაბიშვილის უწყებას ისეთი რამ აკადრეს, რაც არეულობის ხანაში “მხედრიონიც” კი ვერ უბედავდა პოლიციასო.
ჩვენ დაკავებულის ოჯახშიც მივედით, მაგრამ სახლში არავინ დაგვხვდა. როგორც გვითხრეს, დაკავებულის დედა ოზურგეთში იმყოფებოდა, თუმცა, წყაროს ინფორმაციით, შვილის ნახვა ვერ მოახერხა.
ჩვენი წყაროსვე ცნობით, თავდაპირველად სისხლის სამართლის საქმე პოლიციაზე თავდასხმის მუხლით აღიძრა, თუმცა მოგვიანებით მუხლი გადაკვალიფიცირდა და ჩვენი ინფორმაციით მამუკაშვილს ხულიგნობის ბრალდებით გაასამართლებენ. ამ თემაზე კომენტარს არ აკეთებს ძალოვანი უწყება. გურიის სამხარეო პოლიციის მთავარი სამმართველოს უფროსის, დავით ცირეკიძის თქმით, პრესსამსახურის ნებართვის გარეშე კომენტარის გაკეთება არ შეუძლია. გურიის სამხარეო პოლიციის პრესსამსახურის უფროსი, მაია გიორგაძე კი კომენტარს იმ მიზეზით არ აკეთებს, რომ სამინისტროს პრესსამსახურის უფროსმა, ზურაბ გვენეტაძემ “ასე უთხრა”. თავის მხრივ შეუძლებელია გვენეტაძესთან კონტაქტიც, რომელთან საუბარი ყოველთვის ასე მთავრდება: გავარკვევ, დაგირეკავთ. შემდეგ კი ტელეფონს საერთოდ აღარ პასუხობს. დუმს პროკურატურაც.
როგორც იურისტები განმარტავენ, ეს არის სხვისი ქონების განზრახ დაზიანება და წაყენებული ბრალდება 2 წლამდე პატიმრობას ითვალისწინებს. ანუ წინასწარ გავრცელებული ინფორმაცია, რომ ტრაილერის მძღოლს პოლიციაზე თავდასხმის და მათი სიცოცხლისთვის საფრთხის შექმნის ბრალდებას წაუყენებდნენ, არ დასტურდება: _ არსად წერია, რომ პოლიციის შენობაზე დაჯახება რაიმეთი განსხვავდება სხვა შენობაზე დაჯახებისგან. ეს ადრე იყო, კომუნისტების დროს, როცა სახელმწიფო ქონების დაზიანება უფრო მძიმე ბრალდება იყო. სავარაუდოდ, 2 წლამდე პატიმრობას მიუსჯიან. დაკავებულთან საპროცესოს გაფორმება, ალბათ, არ მოხდება _ ვანო მერაბიშვილის უწყება ასეთ “შეცდომას” არავის აპატიებს, _ გვითხრეს იურისტებმა.
