სახელოვნებო ინდუსტრია "არტპალასი" 2015 წლის 12 თებერვალს, სპორტის სასახლეში, დიდი ქართველი საოპერო მომღერლის პაატა ბურჭულაძის 60 წლის იუბილისადმი მიძღვნილ, სიურპრიზებით აღსავსე, გრანდიოზულ კონცერტს გეგმავს.
კონცერტში მონაწილეობის მისაღებად "არტპალასის" მოწვევით საქართველოს 15-მდე ქართველი და უცხოელი მსოფლიო ვარსკვლავი ესტუმრება. საგანგებოდ იუბილისადმი სპორტის სასახლეში შენდება 600მ2-იანი სცენა და ორიგინალური დეკორაცია ეკრანებით, სპეციფიკური განათებითა და გახმოვანებით.
კონცერტის კონცეფცია, ქართველმა და უცხოელმა პრიმადონებმა 60 წლის იუბილეზე უმღერონ მსოფლიო ბანს, პროექტის მუსიკალურ რეჟისორს მარინა ბერიძეს ეკუთვნის:
"სპორტის სასახლეში დაგეგმილი კონცერტი უნდა იყოს საოპერო მუსიკის ზეიმი. ჩემი იდეა იყო, რომ ქალი მომღერლები, მსოფლიო მნიშვნელობის საოპერო მომღერლები, ჩამოსულიყვნენ იუბილის მისალოცად. ქართული საოპერო სკოლა დღეს მსოფლიოში ლიდერია. მასზე ლეგენდები დადის. მით უმეტეს, ქალები გვყავს მრავლად. სცენაზე ძალიან დიდ ორკესტრს, ძალიან ნიჭიერ და ლამაზ ქალებს იხილავთ. მეცოებიც გვყავს და სოპრანოებიც",_ განაცხადა მარინა ბერიძემ.
კონცერტში მონაწილეობას მიიღებენ: ნინო მაჩაიძე. მაყვალა ქასრაშვილი, იანო თამარი (ალიბეგაშვილი), ანიტა რაჭველიშვილი, თამარ ივერი, ნინო სურგულაძე, მარიკა გულორდავა, თეონა დვალი, ნანა მირიანი (ქავთარაშვილი) და უცხოელი პრიმადონები: მიშელ კრაიდერი, ოლგა ბოროდინა, ირინა მაკაროვა.
სპეციალურად ამ დღისათვის ერთიანდება ორი სიმფონიური ორკესტრი, ზ.ფალიაშვილის სახელობის ოპერისა და ბალეტის სახელმწიფო თეატრის სიმფონიური ორკესტრი და ე.მიქელაძის სახელობის სახელმწიფო სიმფონიური ორკესტრი. გაერთიანებულ ორკესტრს ორი მაესტრო უდირიჟორებს – ჯანლუკა მარჩანო და ნიკოლოზ რაჭველი. გარდა მომღერლებისა, კონცერტში მონაწილეობას მიიღებს მსოფლიოში აღიარებული ქართველი მევიოლინე – ლიანა ისაკაძე.
საღამოს ორგანიზატორების განცხადებით, კონცერტის მაღალ ხარისხსა და მასშტაბურობაზე მეტყველებს ის ფაქტიც, რომ საქართველოში პირველად ჩამოვა ლეგენდარული ფრანგი მსახიობი ალენ დელონი, რომელიც ქართველ პიანისტ დავით ალადაშვილთან ერთად წარუძღვება საღამოს. კონცერტი კომერციულია და საქველმოქმედო ხასიათს არ ატარებს.
საიუბილეო საღამოს დამდგმელი რეჟისორის დავით საყვარელიძის თქმით, ასეთი დონის ვარსკვლავების თავმოყრა დიდ თეატრებსაც უჭირთ.
"საღამოს 5 საათზე ჩამოვა ანიტა რაჭველიშვილი და კონცერტის მერე ისევ მიფრინავს, იმიტომ რომ პრემიერა აქვს "ლა სკალას" თეატრში. ერთად ამ ადამიანების შეკრება ნებისმიერი დონის თეატრს, ნებისმიერი რანგის ორგანიზაციას უჭირს. პაატა ბურჭულაძის სახელის გარშემო მოხდა ეს გაერთიანება. სპორტის სასახლეში ძალიან დიდ დასწრებას ველოდებით",_ აღნიშნა დავით საყვარელიძემ.
"არტპალასის" დამფუძნებელის თქმით, პაატა ბურჭულაძე მას დაჟინებით თხოვდა, ალენ დელონი და სპორტის სასახლე მოეხსნა პროგრამიდან, რადგან საღამოს პომპეზურად აღნიშვნის წინააღმდეგი იყო.
"პაატას უცხოეთში ჰქონდა დაგეგმილი ვიწრო წრეში იუბილის აღნიშვნა და დიდი ძალისხმევა დაგვჭირდა, კონცერტის ჩატარებას საქართველოში რომ დათანხმებულიყო", _ განაცხადა მან.
ბილეთების შეძენა ხვალიდანაა სპორტის სასახლის სალაროებსა და www.biletebi.ge-ზე შესაძლებელი. ფასი 10 ლარიდან 120 ლარამდეა.
პროექტის მხარდამჭერები არიან საქართველოს კულტურისა და ძეგლთა დაცვის სამინისტრო, თბილისის საკრებულო და თბილისის მერია. პროექტის გენერალური სპონსორია სამშენებლო კომპანია "ჯი-დი-ჯი". მონაწილეების ოფიციალური გადამყვანი ავიაკომპანია "ლუფთჰანზა".
