(გურია ნიუსი) _ ჩვენი გაზეთი წერდა იმის შესახებ, რომ ბიძინა ივანიშვილის ნათესავებზე სამართალდამცველები ძველი საქმეების “გამოჩხრეკას” ცდილობენ. მათ შორისაა გურიაში მომხდარი ფაქტები. გავრცელებული ინფორმაციით, პოლიტიკაში წასული ბიზნესმენის ძმისშვილზე, რამაზ ივანიშვილზე “საქმეები იკერება”. უმცროს ივანიშვილს, სავარაუდოდ, პროკურორის შვილის მიერ მოქალაქის დაჭრისას “დახმარებასა” და ავარიაში მონაწილეობას შეედავებიან. ამის გამო მაშინდელი პოლიცმაისტერი გია ურიდია დაკითხვაზე ჰყავდათ. სავარაუდოდ, მას გამოძიება ავარიის “ჩაფარცხვას” ედავება. შეგახსენებთ, რომ 4-5 წლის წინ, ბიძინა ივანიშვილის ძმისშვილი თავისივე მეგობარს დაეჯახა და შემთხვევა ხუმრობას მოჰყვა. მაშინ რამაზ ივანიშვილის მეგობარი კი დაშავდა, მაგრამ მას უპატრონეს, არც საჩივარი დაწერილა და რეალურად საქმის აღძვრის საფუძველიც ნაკლებად იყო.
მაშინ პოლიციის უფროსი გია ურიდია იყო. შეგახსენებთ, რომ ეს ის ურიდიაა, რომელმაც, “ნაციონალური პიარის” მიხედვით, ქურდული სამყაროს წარმომადგენლებისგან “არ აიღო” 500 ათასი დოლარი! სინამდვილეში კი მაშინ რეკლამა გაკეთდა და შაქრო კალაშოვს სახლი ჩამოართვეს ურეკში. როგორც მოგვიანებით გვითხრეს, სახლი ცნობილი კრიმინალის საკუთრება სულაც არ იყო და ოზურგეთელ ბიზნესმენს ეკუთვნოდა!
ჩვენთან საუბრის დროს ბიძინა ივანიშვილის ძმა, ადიკო ივანიშვილი შეშფოთებული იყო შვილთან დაკავშირებული ამბებით. მანვე გვთხოვა, გაგვერკვია ნამდვილად უთვალთვალებენ თუ არა შეკვეთილში ივანიშვილების მამულს სპეცსამსახურების წარმომადგენლები. წყაროს ინფორმაციით, სასტუმროებსა და ახლომდებარე ოჯახებში სტუმრები საეჭვოდ მომრავლდნენ და რეალურად ისინი სპეცსამსახურების წარმომადგენლები არიან. ჩვენ ჩავედით ურეკსა და შეკვეთილში და ვითარების გადამოწმება ვცადეთ. თუმცა, ივანიშვილის სახლთან მისვლა შეუძლებელია.
როცა გია ურიდია ბათუმის პროკურატურაში დაიბარეს, ითქვა, რომ ის დააკავეს, თუმცა, ასევე გავრცელებული ინფორმაციით, დაკითხეს და გირაოთი გამოუშვეს, სახელდება თანხა _ 10 000 ლარი.
ჩვენ გია ურიდიას დავუკავშირდით:
_ ბატონო გია, ბოლო დროს თქვენთან დაკავშირებით არა ერთი ინფორმაცია ვრცელდება და ერთ-ერთის დასაზუსტებლად გირეკავთ.
_ რაო, რა ინფორმაციებია?
_ დაკითხვაზე იყავით ივანიშვილების საქმესთან დაკავშირებით.
_ არა, კაცო, რა ივანიშვილი, რის ივანიშვილი?
_ ამბობენ, გირაოს სახით 10 ათასი გადაიხადეთ!
_ აუჰ, რას მეუბნებით?!
_ ტყუილია?
_ ნუ უსმენთ მაგ ჭორებს და ნუ ინერვიულებთ.
ჩვენ სანერვიულო ნამდვილად არაფერი გვაქვს, ეს იმ ყოფილმა პოლიცმაისტერმა უნდა იშალოს ნერვები, რომელსაც გმირად გამოაცხადებენ, პრეზიდენტი ღირსების მედალს გადასცემს, მერე კი უბოდიშოდ მოისვრიან სახლში და როცა დასჭირდებათ, მაშინ გამოიყენებენ. ბატონმა გიამ ჩვენზე უკეთ იცის ეს მეთოდები და როგორც თავად გახდა “გმირი”, როცა ოზურგეთელი ბიზნესმენის სახლი, ზემოდან მოსული დირექტივის გამო, შაქრო კალაშოვისად გაასაღა, ახლა ისე შეიძლება თავად მოუხდეს იმის აღიარება, რასაც 4-5 წლის წინ ხელისუფლება და შს სამინისტრო არ გააკეთებდა _ ისინი, მაშინ არ დაუშვებდნენ, ბიზნესმენის ძმისშვილი ასეთ უბრალო საქმეზე დაეკავებინათ.
ჩვენი ინფორმაციით, ლანჩხუთში უკვე დაიწყო ბიძინა ივანიშვილის მოქალაქეობის აღდგენასთან დაკავშირებით ხელმოწერების შეგროვება. მას ორგანიზებას შოთა ფირცხალაიშვილი უწევს. თუ ვის დაეყრდნობა ლანჩხუთში ივანიშვილის კოალიცია, ჯერ არ გაცხადებულა, თუმცა ჩვენი წყარო ფიქრობს, რომ ეს რომან ბიწაძე იქნება, მისი გამოცდილების გათვალისწინებით. გასულ კვირაში “რესპუბლიკელებს” ყრილობა ჰქონდათ, ამიტომაც გვაინტერესებდა ბატონმა რომანმა რაიმე დირექტივა ხომ არ მიიღო, მაგრამ გუშინ ოპოზიციონერმა ჩვენს ზარს არ უპასუხა.
ჩვენი წყაროს ბოლო ინფორმაციით, ზემოთ ნახსენები შოთა ფირცხალაიშვილი პოლიციაში დაიბარეს, თუმცა, ეს ინფორმაცია გადასამოწმებელია.
