"ნაციონალური მოძრაობის" ოზურგეთის რაიონული ორგანიზაციის ერთ-ერთი ლიდერი დავით მჟავანაძე მედიასთან, წარმოშობით ოზურგეთელ ბიზნესმენს, კახი კალაძის მეგობარს, ილია კეჭაყმაძეს ოზურგეთის "ფაქტობრივ მმართველს" უწოდებს.
დავით მჟავანაძე ილია კეჭაყმაძეს კრიმინალურ სამყაროსთან ურთიერთობაში და კრიმინალების მფარველობაში ადანაშაულებს. ამასთანავე, ის კეჭაყმაძის კლანურ მმართველობაზე და ქალაქის მერიაში არსებულ ნეპოტიზმზე საუბრობს.
დავით მჟავანაძე: "კანონიერი ქურდი "რემენა", რამდენიმე თვის წინ თბილისის აეროპორტიდან გაქრა. ამის შესახებაც "ნაციონალურმა მოძრაობამ" ოფიციალური განცხადებაც გააკეთა. ოზურგეთში ხშირად საუბრობენ იმ თემაზე, რომ აეროპორტიდან გამქრალ ქურდს ოზურგეთის მუნიციპალიტეტის სოფელ შემოქმედში "სამეფო პატივით" მასპინძლობდა ოზურგეთს ფაქტობრივი მმართველი ილია კეჭაყმაძე. ეს არის თემა, რომელზედაც საზოგადოება ხშირად საუბრობს, თუმცა, ადამიანებში კვლავ არსებობს დაუცველობის განცდა და ხმამაღლა საუბრისგან თავს იკავებენ. მე, როგორც საჯარო პოლიტიკური ფიგურა, თავს ვალდებულად მივიჩნევ ხმამაღლა ვისაუბრო იმ თემებზე, რომლებსაც შიშის გამო ტაბუ აქვს დადებული ოზურგეთში. ეს არ არის ჩემი ექსკლუზიური ინფორმაცია და სამწუხაროა, რომ ამ თემებზე მხოლოდ მე მიწევს საუბარი. ეს არის ნიშანი იმისა, რომ ქვეყანაში არის მძიმე სურათი, არის კრიმინალი და ამ კრიმინალს მფარველად ევლინებიან ქვეყნის ხელისუფლებასთან შეფარულად დაახლოებული პირები.
" ნაციონალური მოძრაობა" უახლოეს დღეებში გააკეთებს ოფიციალურ განცხადებას, ჩავატარებთ ბრიფინგს და დავასახელებთ ყველა იმ პიროვნებას, რომლებიც სწორედ რომ ნეპოტიზმის, კლანისა და პარტიული დამსახურების გზით მოხვდნენ ხელსუფლებაში, საჯარო თანამდებობებზე. სია არის საკმაოდ ვრცელი, რომელსაც დავაკონკრეტებთ პრესკონფერენციაზე," _ აღნიშნავს დავით მჟავანაძე.
ილია კეჭაყმაძემ დავით მჟავანაძის ბრალდებებზე კომენტარი ოფიციალურად მოგვაწოდა:
"საჯარო მოხელეს თმენის ვალდებულების გარდა, აქვს სხვა ვალდებულებაც _ ეს გახლავთ საკუთარ სიტყვებზე პასუხისმგებლობის აღება და საზოგადოებისთვის არგუმენტირებული, ფაქტებით გამყარებული და უტყუარი ინფორმაციის მიწოდება. ასე იქცევიან პასუხისმგებლიანი საჯარო პირები და ზოგადად, პასუხისმგებლიანი ადამიანები.
"ნაციონალური მოძრაობის" აქტივისტი, ამავე მოძრაობის წევრი და საკრებულოს დეპუტატი დავით მჟავანაძე, როგორც ჩანს, საზოგადოებაში თავის დამკვიდრებას ჩვეული, იაფფასიანი პიარის საშუალებით ცდილობს. მისი და მისი პარტიის გადასაწყვეტია, როგორ სტრატეგიას აირჩევენ საკუთარი თავის დამკვიდრებისთვის. მაგრამ, როდესაც საკუთარ პიარს სხვის წინააღმდეგ აგებულ აბსოლუტურად უსაფუძვლო ბრალდებებზე აგებენ, რომლის "დამადასტურებელ" ფაქტადაც მხოლოდ საკუთარი ენა მოჰყავთ, ეს უკვე პოლიტიკური უპასუხისმგებლობაა საჯარო პირის მხრიდან.
ამიტომ, საჯაროდ, საზოგადოდ მოვუწოდებ ბატონ დავით მჟავანაძეს წარუდგინოს მედიასაშუალებებს იმ ბრალდებების დამადასტურებელი ფაქტები. ხაზგასმით აღვნიშნავ _ ფაქტები და არა ჭორები, რომელთა გამოთქმის უფლებასაც საკუთარ თავს აძლევს. მხედველობაში მაქვს შემდეგი ციტატა: "როდესაც კანონიერი ქურდი, "რემენა” აეროპორტიდან გაქრა, შემოქმედში იმალებოდა და სამეფო პატივში იყო. ოზურგეთის ფაქტობრივი მმართველი უწევდა მასპინძლობას,” სადაც ის აღნიშნულ საკითხს პირდაპირ მე მიკავშირებს.
მჟავანაძემ ეს განცხადება 27 იანვარს "გურიის მოამბის” ვებგვერდის გადაცემა "მთავარ თემაში” გააკეთა.
იმ შემთხვევაში, თუ ის 10 დღის ვადაში ვერ წარმოადგენს მის მიერ წამოყენებული ბრალდების დოკუმენტალურ მტკიცებულებებს (ვიმეორებ, მტკიცებულებებს და არა თავისი ან თანამზრახველების მიერ გავრცელებულ ჭორებს) უფლებას ვიტოვებ, მივმართო სასამართლოს.
რაც შეეხება დავით მჟავანაძის განცხადებებს ნეპოტიზმთან დაკავშირებით ქალაქის მერიაში, რომელსაც ასევე ჩემს სახელს უკავშირებს, ვფიქრობ, მინიმუმ უხერხულია, "ნაციონალური მოძრაობის" წარმომადგენელი ვინმეს მხრიდან ნეპოტიზმზე საუბრობდეს _ მე მას ვურჩევდი, უახლესი წარსულისთვის გადაევლო თვალი.
რამდენადაც ვიცი, ახალმა ხელისუფლებამ საჯარო უწყებებში კონკურსის წესით შეარჩია მოხელეები.
მედიასაშუალებებს, რომლებიც ჩემი პასუხის გამოქვეყნებას საჭიროდ ჩათვლიან, ვთხოვ, გამოაქვეყნონ ეს პასუხი უცვლელად, ინტერპრეტაციების გარეშე."
მკითხველს შევახსენებთ, რომ რამდენიმე თვის წინ "ნაციონალური მოძრაობის" ლიდერმა ირმა ნადირაშვილმა ბრიფინგი გამართა. მისი განცხადებით, ძებნილი კრიმინალური ავტორიტეტი რომან ბარბაქაძე, მეტსახელად "რემენა", აეროპორტიდან კახა კალაძის მფლობელობაში მყოფი "პროგრეს ბანკის" თანამშრომლის მანქანით გაიყვანეს:
"ბოლო პერიოდში გამოიკვეთა საქართველოში კრიმინალური ავტორიტეტების გავლენის დაბრუნების შემაშფოთებელი ტენდენცია. აღსანიშნავია, რომ ეს მოვლენები შეუძლებელი იქნებოდა დღევანდელი მთავრობის ღია, თუ ფარული დახმარებისა და მფარველობის გარეშე. რამდენიმე დღის წინ ძებნილი კრიმინალური ავტორიტეტის რომან ბარბაქაძე (მეტსახელად ”რემენა") თბილისის აეროპორტიდან "გააქრეს".
ირმა ნადირაშვილის თქმით, რომან ბარბაქაძე ("რემენა") აეროპორტის ტერიტორიიდან S-კლასის მერსედესით (სახელმწიფო ნომრებით ZQZ-222) გაიყვანეს, რომელიც მოქალაქე მარინა დოლიძე-კეჭაყმაძის (დაბადებული 1970 წელს) მფლობელობაში იმყოფება. დეპუტატის ინფორმაციით, მარინა დოლიძის მეუღლე ილია კეჭაყმაძე საქართველოს ვიცე-პრემიერის კახი კალაძის კუთვნილებაში მყოფი ბანკის _ "პროგრეს ბანკის" სამეთვალყურეო საბჭოს თავმჯდომარის მოადგილეა, ასევე, KALA CAPITAL LIMITTED-ის სამეთვალყურეო საბჭოს წევრი და შპს "კალა კაპიტალის" დირექტორი.
მაშინ, ნადირაშვილის ბრალდებაზე ილია კეჭაყმაძემ "გურია ნიუსთან" განაცხადა, რომ ეს ბრალდება სრული სისულელეა. მისივე თქმით, "ნაციონალური მოძრაობა", წინასაარჩევნოდ, "ქართული ოცნების" წინააღმდეგ მათთვის ჩვეული "შავი პიარის" აგორებას ცდილობს:
"ნაციონალურ მოძრაობას" მოუწევს ამის გამო სასამართლოში პასუხისგება, რადგან ვაპირებ, სარჩელი შევიტანო მათ წინააღმდეგ", _ გვითხრა მაშინ ილია კეჭაყმაძემ.
ირმა ნადირაშვილის ბრალდებას არასერიოზული უწოდა ვიცე-პრემიერმა კახა კალაძემაც _ მისი თქმით, მსგავს არასერიოზულ განცხადებებზე კომენტარის გაკეთება არ ღირს.
ამავე თემაზე: "ილია კეჭაყმაძე "ნაციონალური მოძრაობის" წინააღმდეგ სარჩელის შეტანას აპირებს"
