გაზეთ "გურია ნიუსის" გამომცემელს, ქალბატონ ია მამალაძეს
ქალბატონო ია,
"გურია ნიუსში" გამოქვეყნებული სტატიის: "კომისიის დახურული სხდომა გასაჯაროვდა" თაობაზე მინდა გაცნობოთ რამდენიმე დეტალი.
პირველი: თუ სხდომა იმთავითვე დახურული იყო, მაშინ მისი გადაწყვეტილების გასაჯაროება ჩემი თანხმობის გარეშე არ შეიძლებოდა, რადგან გადაწყვეტილება შეიცავს პერსონალურ მონაცემებს და ეს მონაცემები დაცულია "პერსონალურ მონაცემთა დაცვის შესახებ" კანონითა და ზოგადი ადმინისტრაციული კოდექსითაც (დაინტერესების შემთხვევაში, შემიძლია მოგაწოდოთ ზემოხსენებული კანონების შესაბამისი მუხლებიც).
მეორე: დიახ, ნაციონალური მოძრაობის დროს მაშინდელმა ადგილობრივმა ხელისუფლებამ მე გამათავისუფლა სამსახურიდან და ბრძანებაში ადმინისტრაციული გადაცდომა ჩაწერა, თუმცა: სწორედ იმ წელსა და იმ თვეში, ანუ 2012 წლის ივნისში, როცა გამათავისუფლეს, აღებული მაქვს პრემია 460 ლარის ოდენობით და ამის დამადასტურებელი დოკუმენტის მოწოდებაც შემიძლია, თუკი ამის სურვილი ვინმეს ექნება, თუმცა ეს საჯარო ინფორმაციაა და მისი გამოთხოვა ნებისმიერ პირს შეუძლია საჯარო დაწესებულებიდან. ვსვამ კითხვას: თუკი მქონდა ადმინისტრაციული გადაცდომა და ვერ ვართმევდი თავს დაკისრებულ მოვალეობას, პრემია რატომ მომცეს? ამას გარდა, ნაციონალური მოძრაობა და იმდროინდელი ადგილობრივი ხელისუფლება ცხადია, ბრძანებაში ვერ ჩაწერდა, რომ სკაიპი გამიტეხეს და ჩემი პირადი მიმოწერა ნახეს ქალბატონ ია ანთაძესთან, რაც გახდა კიდეც ჩემი სამსახურიდან გათავისუფლების მიზეზი. ის, თუ რას ვწერდი ია ანთაძეს, ნამდვილად არ წარმოადგენს საიდუმლოებას და ჩემ მიერ მიწოდებულ ფაქტებზე დაყრდნობით სამოქალაქო განვითარების ინსტიტუტი საკმაოდ საინტერესო ინფორმაციებს ავრცელებდა, რაც ტელეკომპანია "მაესტროს" "სუბიექტური აზრისა" და "ტაბულა.გე"-სთვის ხშირად მთავარი თემა იყო. ეს არ ნიშნავს იმას, რომ გმირობაზე თავს ვდებ ან ვინმეს რამეს ვამადლი. ვხედავდი, რომ ირღვეოდა კანონი და ერთადერთი, ვისთანაც ამის შესახებ შემეძლო მესაუბრა, ქალბატონი ია იყო. რაც შეეხება იმას, რომ თანხას ვიღებდი რაიმე ინფორმაციების გავრცელებაში, მტკნარი სიცრუეა და ამის დადასტურებაც არაა რთული დაინტერესებული პირისთვის. სხვათა შორის, გატეხილი სკაიპის თაობაზე გაზეთ "პრაიმ ტაიმს" მიაწოდეს ინფორმაცია და იქ გამოქვეყნებულ სტატია გახდა კიდეც იმის მიზეზი, რომ მიმემართა პროკურატურისთვის და აღძრულიყო სისხლის სამართლის საქმე, რომელიც დღემდე ძიებაშია და რომელიც პირად კონტროლზე ჰყავს აყვანილი პარლამეტის ადამიანის უფლებათა დაცვის კომიტეტის თავმჯდომარეს, ქალბატონ ეკა ბესელიას. აქაც მიჩნდება კითხვა: ისე, ეს ნაციონალური მოძრაობა ყველასთან მცდარი და მტყუანი იყო და მაინც და მაინც ჩემთან გამოირჩევა სიმართლითა და სწორი გადაწყვეტილებით? ეგებ სხვა შემთხვევებში უფრო მართალია (ჩემ ოპონენტებს ვგულისხმობ)???
მესამე: თუ მაინც და მაინც მართლები იყვნენ ნაციონალები და მართალი იყო მაშინდელი ადგილობრივი ხელისუფლებაც, მაშინ საჯარო სამსახურის შესახებ კანონის თანახმად, თუკი პირს ადმინისტრაციული გადაცდომის მიღებიდან ერთი წლის შემდეგ არა აქვს მიღებული რაიმე სახის საყვედური, მას ავტომატურად ეხსნება ადმინისტრაციული გადაცდომის ბრალდება. ჩემ შემთხვევაში გასულია ორ წელზე მეტი, თანაც მე ამ ხნის მანძილზე მიღებული მაქვს ა(ა)იპ "კულტურის ცენტრის" დირექტორის მადლობა და თუ ჩავთვლით, რომ ა(ა)იპ-ს ხელმძღვანელი არ არის საჯარო პირი, მაშინ გეტყვით, რომ ასევე მიღებული მაქვს კულტურის მინისტრის პერსონალური მადლობაც, ხოლო მინისტრი ნამდვილადაა სახელმწიფო მოხელეცა და საჯარო პირიც (შემიძლია მადლობის ასლებიც გადმოგიგზავნოთ, რომელიც ჩემ პირად საქმეშიც ინახება).
აქვე მინდა გამოვეხმაურო ბრალდებას, თითქოს შეურაცხყოფას ვაყენებდი ვინმეს სოციალურ ქსელში. ძალიან დამავალებს რომელიმე "ბრალმდებელი", თუკი ერთ ციტატას მაინც იპოვის ჩემ მიერ დაწერილს, ხსენებულ პირთა მიმართ შეურაცხმყოფელი რომ იყოს, ხოლო თუ სიმართლე შეურაცხყოფაა ვინმესთვის, ეს ჩემი პრობლემა აშკარად არაა.
რაც შეეხება შეურაცხმყოფელ და ღირსების შემლახავ ფრაზებს, მე შემიძლია მოგაწოდოთ სიტყვები, რომლითაც კოლეგიური ორგანოს თანამდებობის პირი "მამკობს": ქერქეტი, მიხედე თაფლობის თვეს, გიჟია და მახალისებს, სულით ავადმყოფი რომ ხარ, მთელმა ლანჩხუთმა იცის, გაფრენილი გაქვს, ფარხაჭუა გყავს თავში, შენ და შენი ოჯახი ნაციონალებს ემსახურებოდით და ასე შემდეგ. მინდა კიდევ ერთი კითხვა დავსვა: ძვირფასო მკითხველო, როგორ ფიქრობ, ვინ არის ამის შემდეგ შეურაცხყოფილი და შეურაცხმყოფელი???
დასასრულ, აღნიშნულ თემაზე (უფრო სწორად, თემებზე) პირადად მე ვწყვეტ ყოველგვარ პოლემიკას. ვიმეორებ, საკითხს სწავლობს სახალხო დამცველის აპარატი.
პატივისცემით,
ნინო მშვიდობაძე
