ექსპრემიერ ზურაბ ჟვანიას გარდაცვალებისა და 2012 წელს განხორციელებული ე. წ. ლაფანყურის სპეცოპერაციასთან დაკავშირებით, “ადამიანის უფლებათა ცენტრი” ყოფილი სნაიპერის, ექს-პრეზიდენტ მიხეილ სააკაშვილის დაცვის ყოფილი წევრის, ამჟამად მსჯავრდებულის, თეიმურაზ გვარაძის გაკითხვას მოითხოვს.
როგორც ცენტრის მიერ გავრცელებულ ინფორმაციაშია ნათქვამი, გვარაძე აღნიშნულ საქმეებთან დაკავშირებით ინფორმაციებს ფლობს.
ამ მოთხოვნით "ადამიანის უფლებათა ცენტრმა“ რამდენჯერმე მიმართა მთავარ პროკურატურას როგორც ოფიციალურად, ასევე – საჯაროდ, პრესკონფერენციის სახით. 2014 წლის 8 აპრილს ადამიანის უფლებათა ცენტრმა მედიას უშუალოდ პატიმრის წერილიც გააცნო . ხოლო ოქტომბერში პრესკონფერენციაზე ორგანიზაციამ ასევე ისაუბრა მსჯავრდებულის მოთხოვნაზე, დაკითხულიყო ზურაბ ჟვანიას გარდაცვალების საქმესთან დაკავშირებით .
"ადამიანის უფლებათა ცენტრი“ თავიდანვე ითხოვდა, საქართველოს მთავარ პროკურატურას ადვოკატის თანდასწრებით დაეკითხა თეიმურაზ გვარაძე, გადაემოწმებინა ის ფაქტები და გარემოებები, რაზეც იგი მიუთითებს. ასევე, უზრუნველყოფილიყო მისი, როგორც საფრთხის ქვეშ მყოფი მოწმის, დაცვის ღონისძიებები. ადამიანის უფლებათა ცენტრის არაერთი მიმართვის მიუხედავად, მთავარი პროკურატურა უარს აცხადებს მსჯავრდებულ თეიმურაზ გვარაძის დაკითხვაზე, თავისივე ადვოკატის თანდასწრებით.
"ადამიანის უფლებათა ცენტრის“ იურისტთან საუბრისას პატიმარი აცხადებს, რომ იგი პროფესიონალი სნაიპერია და იყო ზურაბ ჟვანიასა და გია არსენიშვილის ინიციატივით შექმნილი გასაიდუმლებული დივიზიონის წევრი. 2004 წლიდან კი საქართველოს პრეზიდენტის, მიხეილ სააკაშვილის პირადი უსაფრთხოების დაცვა დაევალა.
ცენტრის ინფორმაციით, თეიმურაზ გვარაძე აცხადებს, რომ 2012 წლის ზაფხულში, პატიმრობის პერიოდში, მასთან მივიდა სამი პიროვნება, რომლებმაც მას სპეცოპერაციაში მონაწილეობა სთხოვეს, კერძოდ – ორმხრივი ცეცხლის დროს ტერორისტების ლიკვიდაცია დაავალეს. სპეცოპერაციის დასრულების შემდეგ კი სასჯელაღსრულების დაწესებულებაში დააბრუნეს. თეიმურაზ გვარაძე აცხადებს, რომ უშუალოდ აკვირდებოდა ე. წ. ლაფანყურის სპეცოპერაციის მსვლელობას და როგორც თვითმხილველს, შეუძლია, გამოძიებას მნიშვნელოვანი ჩვენება მისცეს.
2012 წლის 15 ნოემბერს თეიმურაზ გვარაძე პატიმრობიდან გათავისუფლდა. მისი თქმით, განთავისუფლების შემდეგ იგი განიცდიდა მუდმივ ზეწოლას, ვინაიდან ფლობდა მნიშვნელოვან ინფორმაციას და გარკვეული პირებისთვის საფრთხეს წარმოადგენდა. 2013 წლის მაისში თეიმურაზ გვარაძე ხელმეორედ დააკავეს. როგორც თავად აცხადებს, მისგან წამების გამოყენებით ცდილობდნენ, მოეპოვებინათ აღიარება დანაშაულისა, რომელიც არ ჩაუდენია. საქალაქო სასამართლომ სსკ-ის 177-ე მუხლით გათვალისწინებული დანაშაულისათვის 5 წლით თავისუფლების აღკვეთა მიესაჯა.
"თეიმურაზ გვარაძის დაკითხვის აუცილებლობა კიდევ ერთხელ დადასტურდა ზურაბ ჟვანიას საქმესთან დაკავშირებით მიმდინარე სასამართლო განხილვაზე მიმდინარე წლის 2 თებერვალს, როცა მოსამართლე დავით მგელიაშვილმა გამოაქვეყნა მსჯავრდებულის წერილი, სადაც იგი აცხადებს, რომ "ზურაბ ჟვანიას და უსუპოვის მკვლელობა მოხდა კახეთში, ფაქტს 11 პირი ესწრებოდა და 3 მათგანი ამჟამად მინისტრია“, _ აღნიშნავენ ცენტრში.
საკითხთან დაკავშირებით, დღეს 12:30 საათზე "პრაიმ ტაიმის“ პრესკლუბში "ადამიანის უფლებათა ცენტრი“ პრესკონფერენციას აწყობს, სადაც ორგანიზაცია საპატიმროდან გამოგზავნილ წერილსაც გაავრცელებს.
ამავე თემაზე:
