სამსახური, რომლის შექმნის იდეაც უშუალოდ მუნიციპალიტეტის გამგებელს ზაზა ურუშაძეს ეკუთვნის ექვსი არასამეწარმეო (არაკომერციული) იურიდიული პირის: ლანჩხუთის სამუსიკო სკოლის, ცენტრალური ბიბლიოთეკის, კულტურის ცენტრის, სუფსის სამუსიკო სკოლის, სამხატვრო სკოლისა და კულტურული მემკვიდრეობის დაცვისა და განვითარების ცენტრის ბაზაზე შეიქმნა, ჯერ კიდევ გაურკვევლობაში აგრძელებს ფუნქციონირებას. მიუხედავად იმისა, რომ არ არის ჩამოყალიბებული სამსახურის სტრუქტურა და არც უფროსია დანიშნული, ახალ თანამშრომლებსა და ახალ შტატებს მაინც უხვად ამატებენ.
ჩვენი ინფორმაციით, კულტურის სამსახურების გაერთიანებულ ცენტრში ჯერ კიდევ ოფიციალურად დაუნიშნავ დირექტორს ახალი მოადგილე დაუნიშნეს გია ფირცხალაიშვილის სახით, რომელიც გასვლით ღონისძიებებზე იქნება პასუხისმგებელი. სხვათა შორის ბატონი გია ზვიად გამსახურდიას დროინდელი პარლამენტის წევრია, მას ჩვენი ინფორმაციით, აღნიშნული ცენტრის ხელმძღვანელობაზეც კი ჰქონდა პრეტენზია.
ასევე კიდევ ერთი ახალი შტატი შეიქმნა, რომელიც ცენტრში შემავალი ცალკეული სამსახურის ინფრასტრუქტურის განვითარებისთვის იღვაწებს. ამ თანამდებობაზე მერაბ ქარჩავა დაინიშნა, რომელიც ძველი „კოსტაველია“, შევარდნაძის ეპოქაში ქალაქის მერიის თანამშრომელი იყო, „ნაცმოძრაობის“ დროს კი პატიმრობაში იმყოფებოდა.
კიდევ ერთი ახალი კადრი დაემატა ცენტრს საქმის მწარმოებლის სახით. ამ მოვალეობას ნატო ნუცუბიძე შეასრულებს. ნუცუბიძე გია გოგუაძის გამგებლობიდან მოყოლებული მუნიციპალიტეტის გამგეობაში გამგებლის მდივანი გახლდათ. იგი ამ დრომდე დეკრეტულ შვებულებაში იმყოფებოდა და დეკრეტულიდან დაბრუნებულს ახალი ადგილი გამოუძებნეს, რადგან გამგებლის მდივნად თვითმმართველობის არჩევნებისას ზაზა ურუშაძის საარჩევნო შტაბის ახალგაზრდული ფრთის აქტიური წევრია დანიშნული.
