"გაერთიანებული დემოკრატიული მოძრაობის" წევრის, ბესიკ დანელიას განცხადებით, "ქართულ ოცნებას" არ აქვს პოლიტიკური ნება, ქვეყანაში იზრუნოს სოციალური სამართლიანობის დამკვიდრებისათვის.
"დოლართან მიმართებაში ლარის გაუფასურებისაგან გამოწვეული ყველა პროდუქციის ფასების ზრდა ვითომ არ იყო საკმარისი და ახლა უკვე დადგა საკითხი გაზის გაძვირებასთან დაკავშირებით, რაც შესაბამისად გაზრდის ნებისმიერი წარმოების, ასევე სავაჭრო ობიექტების ხარჯს, რომლებიც გაზს იყენებენ. შედეგად მოსახლეობა მიიღებს კიდევ უფრო გაძვირებულ პროდუქციას, ვინაიდან გაზზე ფასების მომატება ბუნებრივად გაზრდის აღნიშნული საწარმოების მიერ შექმნილი პროდუქციის თვითღირებულებას.
ხელისუფლება, რომელიც წინასაარჩევნოდ მოსახლეობას გაზისა და საწვავის გაიაფებას პირდებოდა, რომელიც აცხადებდა, რომ პენსია გაუთანაბრდებოდა საარჩევნო მინიმუმს და ჰპირდებოდა საქართველოს მოსახლეობას სოციალური პრობლემების მოგვარებას, ზრუნავს მხოლოდ საკუთარ კეთილდღეობაზე და საკუთარი უნიათობთ ქვეყანა ყოველდღიურად მიყავს ეკონომიკურ და სოციალურ კრიზისამდე!
„ქართული ოცნების“ წევრებმა ხალხისათვის გაცემული დაპირებების შესრულების ნაცვლად, ხელისუფლებაში მოსვლის შემდეგ, მოიგვარეს საკუთარი პრობლემები და მრავალათასიანი პრემიებისა და სახელფასო დანამატების გამოწერით „ნაციონალური მოძრაობის“ გაზულუქებულ ჩინოვნიკებს უკვე დიდი ხანია გაასწრეს, პენსიონერებს კი დასცინეს და მხოლოდ 10 ლარით გაუზარდეს პენსია, რომელიც ისედაც ძალიან ჩამორჩებოდა რეალური საარსებო მინიმუმის დონეს.
პირველადი მოხმარების საქონელზე უკიდურესად გაძვირებული ფასები რა თქმა უნდა არ აღელვებს ხელისუფლების მაღალი ეშელონის წარმომადგენლებს, ვინაიდან ფასების ზრდა ვერაფერს დააკლებს მათ მრავალათასიან შემოსავლებს, ეს პირდაპირპროპორციულად ურტყამს პენსიონერებისა და სოციალურად დაუცველი მოსახლეობის ჯიბეს, რომლებიც ისედაც ძლივს ახერხებდნენ ელემენტარული წამლის ყიდვას.
რაც შეეხება პურზე ფასის გაზრდას, რომელიც „ქართული ოცნების“ სამარცხვინოდ, ჩვენი მოსახლეობის უდიდესი ნაწილის პრაქტიკულად ერთადერთი საკვები პროდუქტია, თუ მასზე ფასი არ მოიმატებს, გაზის გაძვირება აუცილებლად გამოიწვევს მისი ხარისხისა და წონის გაუარესებას.
ნათელია, რომ „ქართულ ოცნებას“ არ აქვს პოლიტიკური ნება ქვეყანაში იზრუნოს სოციალური სამართლიანობის დამკვიდრებისათვის, წინააღმდეგ შემთხვევაში სახელმწიფო ბიუჯეტში ისედაც გაბერილ ხელფასების, პრემიებისა და სახელფასო დანამატების ნაწილს დამატებით კიდევ არ გაზრდიდა 200 მილიონით.
„გაერთიანებული დემოკრატიული მოძრაობა“ არასოდეს შეეგუება ხელისუფლების მხრიდან ხალხის დაცინვას და მოტყუებას. ჩვენ აუცილებლად მოვალთ ხელისუფლებაში და ყველაფერს გავაკეთებთ იმისათვის, რომ ჩვენი ქვეყნის მოსახლეობამ ღირსეულად იცხოვროს."
