(გურია ნიუსი, ჩოხატაური) _ მოსახლეობაში გავრცელდა ხმები, რომ სასწრაფო სამედიცინო დახმარება ფასიანი გახდა. ამ საკითხთან დაკავშირებით, კომენტარი ვთხოვეთ ჩოხატაურის სასწრაფო დახმარების სამსახურის დირექტორს, ზოია კუჭავას:
_ ეს ინფორმაცია სიმართლეს არ შეესაბამება და მოსახლეობას შეუძლია, მშვიდად იყოს. ჩვენ ისევ ჩვეულ რეჟიმში _ 24 საათის განმავლობაში გამოძახებისთანავე დანიშნულ ადგილზე მივდივართ. გვქონდა ცრუ გამოძახების რამდენიმე შემთხვევა. ვფიქრობ, მოსახლეობამ უნდა აღიქვას, თუ რას ნიშნავს ავადმყოფთან დროულად მისული ექიმი და რომ ფუჭად დასაკარგი დრო არ არის.
_ როგორც გავიგეთ, 12 ნოემბერს, თქვენს თანამშრომლებს, ერთ-ერთი გამოძახების დროს პრობლემები შეექმნათ.
_ გვქონდა ღამით (სწორედ მაშინ, როცა თოვლი მოვიდა) სოფელ ბუკნარში. მანქანას პატარა ღელეზე უნდა გაევლო. როცა უკან დაბრუნდნენ, ღელე ადიდებული იყო და მანქანამ ვერ შეძლო წყლიდან გამოსვლა. მძღოლმა ბევრი იწვალა, მაგრამ ვერაფერს გახდა. მანქანიდან გადმოსვლაც შეუძლებელი გახდა, წყლის დონე თანდათან მატულობდა. მე რაიონის გამგებელს დაუკავშირდი, რომელიც მაშინვე ჩვენთან გაჩნდა და სამაშველო სამსახური გამოიძახა. მადლობა ღმერთს, ყველაფერი კარგად დამთავრდა, მანქანა სამშვიდობოს გამოიყვანეს..
_ წლებია, თქვენი მანქანები ღია ცის ქვეშ დგანან. ამის შესახებ არაერთხელ დაიწერა გაზეთში, მაგრამ არაფერი შეცვლილა.
_ ამის თაობაზე, ვფიქრობ, გამგებელი შევაწუხო და მჯერა, რომ ამ პრობლემას აუცილებლად მოგვიგვარებს.
