საქართველოს პარლამენტის საფეხბურთო გუნდი 6-9 თებერვალს, თურქეთში, მინი ფეხბურთის ჩემპიონატში მიიღებს მონაწილეობას.
პარლამენტის პრესსამსახურის ინფორმაციით, მეგობრული სპორტული შეჯიბრებების გამართვა ქვეყნების უმაღლეს საკანონმდებლო ორგანოებს შორის ურთიერთობების გაღრმავების თვალსაზრისით და საპარლამენტო დიპლომატიის განვითარების კონტექსტში აპრობირებული პრაქტიკაა.
ქართველ დეპუტატებთან ერთად, საფეხბურთო ჩემპიონატში თურქეთის, პოლონეთის და უნგრეთის პარლამენტის წევრებისგან დაკომპლექტებული გუნდები მონაწილეობენ.
პარლამენტის ვებგვერდზე გამოქვეყნებული ინფორმაციით, საქართველოს პარლამენტის საფეხბურთო გუნდი 13 წევრისგან შედგება და მას სპორტისა და ახალგაზრდობის კომიტეტის თავმჯდომარის პირველი მოადგილე, შოთა ხაბარელი ხელმძღვანელობს.
"გურია ნიუსის" ინფორმაციით დიმიტრი ხუდაძე თავდამსხმელი იქნება, თემურ ჩხაიძე – ნახევარ დაცვა, გუნდში კი მათთან ერთად პარლამენტარები დავით ლორთქიფანიძე და ზაქარია ქუცნაშვილი ითამაშებენ.
გუნდს ორი მეკარე ჰყავს, ზურაბ ზვიადაური და გიორგი გოზალიშვილი, რომლებიც საქართველოს კარის დაცვაში ერთმანეთს შეენაცვლებიან.
პარლამენტის პრესსამსახურის ცნობით, პირველი მატჩი 7 თებერვალს გაიმართება, ხოლო ფინალისტი გუნდები ერთმანეთს 8 თებერვალს შეხვდებიან.
"ფინალის შემდეგ დაჯილდოების ცერემონია გაიმართება, მინი ფეხბურთის ჩემპიონატში მონაწილე საპარლამენტო გუნდები ჯგუფურ ფოტოსაც გადაიღებენ. პარლამენტის წევრები საქართველოში 9 თებერვალს დაბრუნდებიან" _ აღნიშნულია პრესსამსახურის მიერ გავრცელებულ ინფორმაციაში.
