წულუკიანი: “მევალება ვთქვა, რომ ზურაბ ვაზაგაშვილის საქმეში არ დარღვეულა სიცოცხლის უფლება _ ეს არის აბსურდი”

იუსტიციის მინისტრის თეა წულუკიანის განცხადებით, ზურა ვაზაგაშვილის საქმეზე პროკურატურა აქტიურად 2014 წლის სექტემბრიდან მუშაობდა:

_ არ უნდა ყოფილიყო საჭირო ასეთი ტრაგედია იმისთვის, რომ მობილიზება ყოფილიყო ყველა ძალის და საქმე რამდენიმე დღეში გახსნილად გამოცხადებულიყო. თუმცა, სამართლიანობა მოითხოვს აღინიშნოს ისიც, რომ პროკურატურა 2014 წლის სექტემბრიდან აქტიურად მუშაობდა ამ საქმეზე და სწორ გზაზე იყო დამდგარი. სწორ გზაში ვგულისხმობ იმას, რომ ყველ ღონეს ახმარდა ამ საქმის გამოძიებას, რაც მანამდე ასე არ იყო. მე არ გახლავართ პროკურატურის ხელმძღვანელი და თუ რა იყო კონკრეტული მიზეზები, ამაზე პროკურატურის სხვადასხვა ხელმძღვანელები ისაუბრებენ. ბატონი კბილაშვილი, უნდა ფლობდეს იმის შესახებ ინფორმაციას, რაც მან ვერ შეძლო, ის, რაც სექტემბრიდან გახდა შესაძლებელი, _ განაცხადა  წულუკიანმა "რეაქციაში" საუბრისას.

მისივე თქმით, პროკურატურას ვაზაგაშვილის საქმის გასახსნელად ბევრი წინაღობის გადალახვა მოუწია.

მინისტრის განცხადებით იური ვაზაგაშვილი "გარდაცვალებამდე რამდენიმე კვირთ ადრე რეგულარულად ხვდებოდა პროკურატურას, როგორც მსხვერპლი"

_  მას ჰქონდა თავისი უფლებები და ამ უფლებების რეალიზაციის მიზნით საგამოძიებო საიდუმლოს წესის დაცვით ხდებოდა ინფორმაციის მიწოდება იმ მოქმედებებზე, რასაც დგამდა პროკურატურა. ის ბოლო დღეებში იმედიანად იყო და პრაქტიკულად იცოდა, რომ რამდენიმე დღეში საქმე გახსნილად უნდა გამოცხადებულიყო, _ აღნიშნა წულუკიანმა.

იუსტიციის მინისტრის თქმით,  ზურაბ ვაზაგაშვილის საქმე  დიდი ხანია სტრასბურგის სასამართლოშია გაგზავნილი.

_ მე, როგორც იუსტიციის მინისტრი, წარმოვადგენ საქართველოს სტრასბურგის სასამართლოში და მე დღეს რამდენად აბსურდულადაც არ უნდა ჟღერდეს, მევალება დავიცვა სტრასბურგის სასამართლოში ეს საქმე და ვთქვა, რომ ზურაბ ვაზაგაშვილის საქმეში არ დარღვეულა სიცოცხლის უფლება _ ეს არის აბსურდი, _ განაცხადა წულუკიანმა, რომლის განმარტებით "საქართველოს აქვს საერთაშორისო ვალდებულება, რომ ზურაბ ვაზაგაშვილის საქმე გამოიძიოს:

_ სწორედ ამით არის პროკურატურა ამჟამად დაკავებული, რომ საქართველოს საერთაშორისო ასპარეზზე სტრასბურგის სასამართლოში, არ მოგვეცხოს კიდევ ერთი უპატიებელი ლაქა, რომ სახელმწიფოს ხელით იქნა სიცოცხლე მოსპობილი. მაშინ სახელმწიფოს ხელი იყო სპეცრაზმი, ირაკლი ფირცხალავა. ჩვენ გვაქვს ვალდებულება, რომ გამოვიძიოთ ეს საქმე, _ განაცხადა წულუკიანმა.