დაარღვია თუ არა მთავარმა პროკურატურამ უდანაშაულობის პრეზუმფცია? შეიძლებოდა თუ არა, აფეთქების შემდეგ, ასაფეთქებელ მოწყობილობაზე დნმ-ს კვალი დარჩენილიყო? როგორ მოახერხა პროკურატურამ ბრალდებული გია სოსანაშვილის დნმ-ს მოპოვება და მისი ე.წ. ფალიის სახელურზე გადაკრულ საიზოლაციო ლენტზე არსებულ დნმ-თან შედარება?
იური ვაზაგაშვილის გარდაცვალებასთან დაკავშირებით, პროკურატურამ მოქმედი პოლიციელი ეჭვმიტანილად სცნო – ამის შესახებ განცხადება მთავარმა პროკურატურამ გუშინ გააკეთა.
უწყებამ განმარტა, რომ მათ გაუმართლათ, და ეჭვმიტანილმა გია სოსანაშვილმა შეცდომა დაუშვა – საფლავზე აფეთქებული ხელყუმბარის ნაწილზე, ე.წ. ფალიის სახელურზე გადაკრულმა საიზოლაციო ლენტმა უზრუნველყო ის, რომ დნმ-ის კვალი დარჩა.
"ასეთი ტიპის ადამიანები ზოგი "ფალიას" რეზინით აბამს, ზოგი ძაფით, ზოგი იზოლენტით, რომ თავიდან აირიდონ გაუთვალისწინებელი აფეთქებები. ამ შემთხვევაში მკვლელმა გამოიყენა "იზოლენტი". "ფალიის" სახელურის სურათებში თქვენ შეამჩნევთ, რომ სახელურზე შეინიშნება ე.წ. იზოლენტის გადაკვრის კვალი, ანუ ერთი მხარე არის წებოვანი. სწორედ "იზოლენტის" წებოვანმა გარსმა უზრუნველყო ის, რომ ამ სახელურზე დარჩა დნმ-ის კვალი. ეს არის მკვლელის შეცდომა.
დასამალი არ არის, ჩვენ გაგვიმართლა. ასეთი გამართლება ბევრ საქმეზე არ ხდება, გაგვიმართლა და ამ შეცდომის საფუძველზე აღმოჩნდა სახელურზე დნმ-ის კვალი. ეს დაედო საფუძვლად იმას, რომ დღეს ჩვენ გავხსენით ეს საქმე და ვიცით უშუალოდ ის პიროვნება, რომელმაც ააფეთქა იური ვაზაგაშვილი", – განაცხადა მთავარი პროკურორის მოადგილე ირაკლი შოთაძემ.
ამ განცხადების შემდეგ, იური ვაზაგაშვილის მკვლელობის ბრალდებით დაკავებულ პოლიციელს, ბრალი ოფიციალურად წარუდგინეს – განზრახ მკვლელობა დამამძიმებელ გარემოებებში.
თუმცა, სოსანაშვილი ბრალს არ აღიარებს. როგორც მისი ადვოკატი, სოსო ჯოგლაძე ამბობს, ის სოფელ ყარაფილაში აფეთქების ადგილას დნმ-ს აღმოჩენის შესახებ პროკურატურის განცხადებას, ეჭვით უყურებს და ალტერნატიული ექსპერტიზის ჩატარებას ითხოვს.
ვაზაგაშვილის საქმის გახსნასთან დაკავშირებულ პროკურატურის განცხადებას, საზოგადოებაში არაერთგვაროვანი რეაქცია მოჰყვა და გარკვეული კითხვებიც გაჩნდა – დაარღვია თუ არა უწყებამ უდანაშაულობის პრეზუმფცია, როცა განცხადებაში აღნიშნა, რომ "საქართველოს პროკურატურის მიერ, კასპის რაიონის სოფელ ყარაფილაში აფეთქების შედეგად მოკლული იური ვაზაგაშვილის მკვლელობის ჩამდენი პირი დაკავებულია".
შეიძლებოდა თუ არა, აფეთქების შემდეგ, ასაფეთქებელ მოწყობილობაზე დნმ-ს კვალი დარჩენილიყო?
როგორ მოახერხა პროკურატურამ ბრალდებული გია სოსანაშვილის დნმ-ს მოპოვება და მისი ე.წ. ფალიის სახელურზე გადაკრულ საიზოლაციო ლენტზე არსებულ დნმ-თან შედარება?
ექსპერტი უსაფრთხოების საკითხებში ბესო ალადაშვილი "გურია ნუსთან" ამბობს, რომ უშუალოდ ის ნაწილი, ფალიის სახელური, რაზეც როგორც პროკურატურა ამბობს, იზოლენტა იყო დახვეული და დნმ შენარჩუნებული, უშუალოდ არ მონაწილეობს აფეთქებაში.
"ეს ნაწილი აფეთქებაში არ მონაწილეობს. ბევრი შემთხვევა ყოფილა, როცა სახელური, აფეთქების ძალით, სხვაგან გადავარდნილა.
თუმცა, ძნელია იმაზე საუბარი შეინარჩუნა თუ არა მან დნმ-ს კვალი. პროკურატურის მიერ დასახელებულ მტკიცებულებაზე, დაცვის მხარე ექსპერტიზას მოითხოვს, ამიტომ, ამის პასუხს, სასამართლოს უნდა დაველოდოთ", _ ამბობს ალადაშვილი "გურია ნიუსთან".
რაც შეეხება კითხვას, ბრალდებულის დნმ-ს მოპოვებასთან დაკავშირებით, ექსპერტი განმარტავს, რომ მისი მოპოვება ოპერატიული სამუშაოების ფარგლებში, არ არის რთული.
"ეს არაა რთული საქმე, როდესაც ეჭვს მიიტანდნენ პირზე, მის დნმ-ს კბილის ჯაგრისიდან, თმის ღერიდან, მისი ნაპირალი ჭიქიდან აიღებდნენ. ისე, რომ მას ამის შესახებ არც ეცოდინებოდა. ოპერატიული სამუშაოები ამას გულისხმობს. ჩვენ ხომ არ ვიცით რამდენ ხანს იყო ის დაკვირვების ქვეშ?
გონიერი პროკურატურა, ჯერ დნმ-ს აიღებდა, შეადარებდა არსებულთან და მხოლოდ ამის შემდეგ გააკეთებდა განცხადებას ასეთ რეზონანსულ საქმეზე", _ ამბობს ალადაშვილი.
აღსანიშნავია, რომ პროკურატურის გუშინდელ განცხადებასთან დაკავშირებით, "დემოკრატიული განვითარების ეროვნულმა ცენტრმა" განცხადება გაავრცელა, სადაც უწყების მხრიდან უდანაშაულობის პრეზუმფციის დარღვევაზეა საუბარი.
"საქართველოს კანონმდებლობის შესაბამისად, ბრალის წარდგენამდე, დაკავებული ადამიანი ინარჩუნებს ეჭვმიტანილის სტატუსს, ხოლო ბრალის წარდგენის მხოლოდ შემდეგ, დასაშვებია მისი ბრალდებულად წოდება.
ცნობილია, რომ დღეს იური ვაზაგაშვილის მკვლელობის საქმესთან დაკავშირებით დაკავებულია პირი – მოქმედი პოლიციის თანამშრომელი გია სოსანაშვილი, ხოლო იმის მიუხედავად, რომ დაკავებულ პირს, პროკურატურის ოფიციალური განცხადების დროისათვის, ბრალი არ ჰქონდა წარდგენილი და მით უმეტეს, მის მიმართ არ არსებობს სასამართლოს გამამტყუნებელი განაჩენი, პროკურატურამ ის პირდაპირ დანაშაულის ჩამდენად – "მკვლელად" გამოაცხადა.
ამასთნ, საზოგადოებისთვის ცნობილი გახდა ძირითადი ნივთმტკიცების შესახებ, რის საფუძველზეც პირდაპირ "მკვლელად" იქნა წოდებული პირი, თუმცა მსგავსი ნივთიერი მტკიცებულება, შესაძლოა, არა მხოლოდ დანაშაულის ჩამდენის, არამედ თანამონაწილის გამოსავლენად იყოს გამოსადეგი.
ჩვენ მივმართავთ საქართველოს სახალხო დამცველს, დაინტერესდეს აღნიშნული სამართალდარღვევით და მოახდინოს შესაბამისი რეაგირება.
მივმართავთ საქართველოს, პრემიერ-მინისტრს, რომ გაატაროს შესაბამისი ღონისძიებები, რათა მომავალში თავიდან იქნეს აუცილებული ადამიანის უფლების მსგავსი ფორმით შელახვის ყოველგვარი შესაძლებლობა უწყების მხრიდან, რადგან აღნიშნულმა შესაძლოა გააჩინოს დამატებით პასუხგაუცემელი კითხვები", – წერია არასამთავრობოს მიერ გავრცელებულ განცხადებაში.
საქართველოს მთავარი პროკურატურა: 2015 წლის 20 იანვარს, ახლობლის დაკრძალვაზე, კასპის რაიონის სოფელ ყარაფილაში ჩასული იური ვაზაგაშვილი მივიდა საკუთარი შვილის, ზურაბ ვაზაგაშვილის საფლავზე, სადაც იგი სასაფლაოზე დამონტაჟებული ასაფეთქებელი მოწყობილობის აფეთქების შედეგად ადგილზევე გარდაიცვალა.
გამოძიების მიერ შემთხვევის ადგილის დათვალიერებისას ამოიღეს საფლავზე აფეთქებული ხელყუმბარის ნაწილი ე.წ. ფალიის სახელური, რომელზედაც ჩატარებული ექსპერტიზით აღმოჩენილ იქნა ადამიანის დნმ-ის კვალი.
გამოძიებით გადამოწმდა მობილური სატელეფონო ოპერატორების მომსახურე ანძებზე დაფიქსირებული აბონენტების ვინაობა, დაიკითხა ათეულობით მოწმე, განისაზღვრა დანაშაულის შესაძლო ჩამდენ პირთა წრე, რომელთა მიმართ საქართველოს შსს-ს გენერალური ინსპექციისა და კონტრდაზვერვის დეპარტამენტთან ერთად ჩატარებული ოპერატიულ-სამძებრო და საგამოძიებო მოქმედებების შედეგად დადგენილი და დაკავებული იქნა პოლიციის თანამშრომელი გია სოსანაშვილი, რომელიც როგორც გამოძიებით დადგინდა, 2015 წლის 19-20 იანვარს იმყოფებოდა კასპის რაიონის სოფელ ყარაფილას ტერიტორიაზე და რომლის დნმ-ი გენეტიკური ექსპერტიზის დასკვნის თანახმად, დაემთხვა შემთხვევის ადგილიდან (ზურაბ ვაზაგაშვილის საფლავი) ამოღებული ასაფეთქებელი მოწყობილობის "ფალიის" სახელურზე აღმოჩენილ დნმ-ს. ამდენად, უტყუარად შეიძლება ითქვას, რომ იური ვაზაგაშვილი მოკლული იქნა გია სოსანაშვილის მიერ საფლავზე დამონტაჟებული ხელყუმბარის აფეთქების შედეგად.
საქმეზე გრძელდება გამოძიება დამამძიმებელ გარემოებაში ჩადენილი განზრახ მკვლელობის კვალიფიკაციით, საქართველოს სისხლის სამართლის კოდექსის 109-ე მუხლის პირველი ნაწილის ,,გ" ქვეპუნქტით, რაც სასჯელის სახით ითვალისწინებს თავისუფლების აღკვეთას 11-დან 14 წლამდე ვადით.
