(გურია ნიუსი, ლანჩხუთი) _ პარასკევს, საღამოს, ქალაქ ლანჩხუთის ცენტრში, “ავერსი კლინიკის” მიმდებარე ტერიტორიაზე მოსახლეობის საპროტესტო აქცია მოეწყო. ისინი კლინიკის სახურავზე “ჯეოსელის” ანტენის დამონტაჟებას აპროტესტებდნენ.
“გუშინ გავიღვიძეთ და გურულის ძეგლი არ დაგვხვდა, დღეს აგერ, “ავერსის” თავზე “ჯეოსელის” ანძა დადგეს. “ავერსი” თუ ჯანმრთელობის სადარაჯოზე მდგომი კომპანიაა, ასეთ რამეს არ უნდა უშვებდეს. თუმცა, მაგათ რა ენაღვლებათ _ დამატებით ფულს ჩაიჯიბავენ. ველით ადგილობრივ ხელისუფლებას. ნუთუ კურტანიძე და თურანი განაგებენ ყველაფერს? მაშ, რაში გვინდა ადგილობრივი მთავრობა? ხელმოწერებიც შევაგროვეთ, მაგრამ არც ამან გვიშველა,” _ შეკრებილები აღშფოთებას არ მალავდნენ.
შემთხვევის ადგილზე მალევე მოვიდნენ საკრებულოს თავმჯდომარის მოადგილე ზვიად აფხაზავა, გამგებლის მოადგილე ნესტორ წილოსანი, ქალაქის რწმუნებული გივი მენაღარიშვილი, ზედამხედველობისა და ინფრასტრუქტურის სამსახურის უფროსები _ მალხაზ ვირუბოვი და სოსო ჩხაიძე. მათ მოსახლეობას განუმარტეს, რომ ანტენის დადგმაზე ნებართვა არ არის გაცემული და კომპანია “ჯეოსელი” მის ჩართვას ამ ნებართვის გარეშე ვერ მოახერხებს.
_ როგორც ვიცით, წინააღმდეგია თავად “ავერსი”, რადგან მოსახლეობა არის წინააღმდეგი და კომპანიას არ სურს მათი ინტერესები შეილახოს. ჩვენ ნებართვა არ გაგვიცია, _ განუცხადეს მათ მოსახლეობას.
სამართლიანი გახლდათ მოსახლეობის კითხვა: _ თუ “ავერსი” წინააღმდეგია როგორ გაბედავდა “ჯეოსელი” ანძის დადგმას? _ იკითხეს მათ და იქვე დაამატეს: _ როცა სამუშაოები მიმდინარეობდა და ვუთხარით, არ დავუშვებდით ამას, უკმეხად გვითხრეს _ თქვენ ვინ გკითხავთ, “ავერსთან” შეთანხმებული ვართო!
_ ჩვენ არ გვაქვს ეს ინფორმაცია, რაც ვიცით ისაა, რომ “ავერსი” წინააღმდეგია ანძის მათ შენობაზე დადგმის და თუ მან არ შეცვალა პოზიცია, არ მოხდება ანტენის ექსპლუატაციაში გაშვება, _ აღნიშნეს ჩინოსნებმა.
საბოლოოდ, აქციის მონაწილეები იმ იმედით დაიშალნენ, რომ “ავერსი” ანტენის დემონტაჟს მოითხოვს, სხვა შემთხვევაში _ აქციას კლინიკის წინ მოვაწყობთ და არა გვგონია, “ჯეოსელის” მიერ გადახდილი ქირა ამად უღირდეთო. მათთვის დამაიმედებელი გახლდათ ის ინფორმაციაც, რომლის მიხედვითაც “ავერსი კლინიკის” დირექტორი ნესტან სურგულაძე ესაუბრა ადგილობრივი ხელისუფლების წარმომადგენლებს და დაჰპირდა, რომ დილით მიაწვდის ინფორმაციას სათავო ოფისს და შეატყობინებს მოსახლეობის კატეგორიული მოთხოვნის შესახებ.
აქციამ საათზე ცოტა მეტხანს გასტანა და მასში მონაწილეობას ქალაქის 40-მდე მცხოვრები იღებდა.
