"ახალგაზრდა ფინანსისტთა და ბიზნესმენთა ასოციაცია" – აფბა მიიჩნევს, რომ ავტომფლობელთა პასუხისმგებლობის სავალდებულო დაზღვევის ამოქმედება ქვეყნის ეკონომიკისთვის და მოსახლეობისთვის უმნიშვნელოვანესია, ხოლო საკუთრივ სადაზღვევო სექტორისთვის სასიცოცხლო მნიშვნელობის მატარებელია.
ამის შესახებ "რეპორტიორის" პრესკლუბში გამართულ ბრიფინგზე აფბას ვიცე–პრეზიდენტმა გიორგი კაპანაძემ სიაუბრა.
კაპანაძის განცხადებით აფბა, მიმდინარე ეტაპზე, ახორციელებს კვლევას, რომლის შედეგადაც თვალსაჩინო გახდება ერთის მხრივ ის, თუ რამდენად არიან ინფორმირებულები ავტომფლობელები უახლოეს მომავალში დასანერგი აღნიშნული სადაზღვევო პროდუქტის შესახებ, ასევე გამოავლენს ავტომფლობელთა ლოიალობის ხარისხს პასუხისმგებლობის სავალდებულო დაზღვევის შემოღების მიმართ და გაზომავს ამ პროდუქტის შემოღების კვალდაკვალ მისაღებ სოციალ–ეკონომიკურ შედეგებს.
აფბა აღნიშნული კვლევის შედეგებს საზოგადოებას უახლოესი 1 თვის ვადაში გააცნობს.
აფბას ვიცე პრეზიდენტის თქმით ავტომფლობელთა პასუხისმგებლობის სავალდებულო დაზღვევის შემოღება 2015 წლიდან იყო დაანონსებული, თუმცა ამ დროისთვის შესაბამისი საკანონმდებლო ინიციატივა მთავრობის მხრიდან პარლამენტში ინიცირებული არ არის. საკუთრივ პარლამენტის შესაბამისი კომიტეტები სწორედ მთავრობის ინიციატივას ელიან, რის შემდეგაც გადაიდგმება შესაბამისი პროცედურული ნაბიჯები.
"განვითარებული ეკონომიკის ქვეყნებში სადაზღვევო ინდუსტრიის მთლიანი აქტივები მთლიან შიდა პროდუქტთან მიმართებაში 25–იდან 50 %–მდე მერყეობს. საქართველოში, ამ კუთხით, ვითარება სახარბიელო არ არის. საიმისოდ, რომ ქვეყანაში ერთის მხრივ, სადაზღვევო კულტურა ამაღლდეს და მეორეს მხრივ, სადაზღვევო სექტორის ზრდა და განვითარება შეუქცევად პროცესად რომ იქცეს, პირველ რიგში, აუცილებელია თავად სადაზღვევო კომპანიების მხრიდან მარკეტინგული აქტივობების ზრდა და ცალკეული პროდუქტების ცნობადობის ამაღლებაზე ინტენსიური ზრუნვა. ხოლო მეორე და აუცილებელი წინაპირობა სავალდებულო სადაზღვევო პროდუქტების შემოღებაა. ამ კუთხით, პირველ ნაბიჯად განხილულ უნდა იქნას ავტომფლობელთა სამოქალაქო პასუხისმგებლობის სავალდებულო დაზღვევის შემოღების საკითხი," – განაცხადა გიორგი კაპანაძემ.
ავტოდაზღვევის ბაზარი და სავალდებულო პასუხისმგებლობის დაზღვევის შემოღებით მოსალოდნელი სასიკეთო ცვლილებები
"ახალგაზრდა ფინანსისტთა და ბიზნსესმენთა ასოცოაციის" ხელთ არსებული ინფორმაციით, სადღეისოდ საქართველოში რეგისტრირებულია 900 ათასამდე სახმელეთო სატრანსპორტო საშუალება და ეს რიცხვი ყოველწლიურად 5–7%–ით იზრდება. არსებული მონაცემებით, აქედან უმოქმედო, ანუ გაჩერებულ მდგომარეობაშია 100 ათასამდე ავტოსატრანსპორტო საშუალება.
მოქმედი ავტოტრანსპორტიდან დაზღვევით, მათ შორის, პასუხისმგებლობის დაზღვევით, სარგებლობს მხოლოდ 40 ათასამდე ავტოსატრანსპორტო საშუალება, ანუ მთლიანი რაოდენობის მხოლოდ 5 %.
"სადღეისოდ, 2014 წლის სამი კვარტლის მონაცემებით. სადაზღვევო კომპანიებს ავტოდაზღვევის პროდუქტით მოზიდული აქვთ სულ 32 მილიონ ლარამდე, ხოლო სამოქალაქო პასუხისმგებლობის ნებაყოფლობითი დაზღვევის კუთხით 4,5 მილიონ ლარამდე. ამთავითვე ცხადია, რომ ეს ბაზარი პრაქტიკულად აუთვისებელია და სექტორისთვის უაღრესად საინტერესო ნიშას წარმოადგენს. სწორედ ამ ნიშის სწრაფად და ეფექტიანად ათვისებისთვის არის აუცილებელი ისეთი წამახალისებელი პროცესის დაწყება, როგორიც იქნება ავტომფლობელთა პასუხისმგებლობის სავალდებულო დაზღვევის შემოღება" – განაცხადა კაპანაძემ.
აფბას ხელთ არსებული ინფორმაციით, საკანონმდებლო ინიციატივის შემუშავების პროცესში გამოიკვეთა, რომ ამ სერვისის წლიური ღირებულება საშუალოდ 160–200 ლარს შორის იმერყევებდა.
ანუ, ავტომფლობელთა პასუხისმგებლობის სავალდებულო დაზღვევის პოლისის ყოველთვიური ღირებულება 17 ლარს არ გადაჭარბებდა თითოეული ავტომფლობელისთვის. ანუ. 800 ათასი ავტომფლობელის სავალდებულო დაზღვევის შემთხვევაში მხოლოდ ამ პროდუქტის გაყიდვით სექტორის შემოსავალი წლიურად მინიმუმ 125–130 მილიონ ლარამდე გაიზრდება, რაც მთლიანი სექტორის ნახტომისებურ ზრდას გამოიწვევს. ასევე, ეს მოიტანს დამატებითი ეფექტს, როცა სავალდებულო დაზღვევის შესაძენად კომპანიაში მისული მოქალაქე ეცნობა ნებაყოფლობითი ავტოდაზღვევის პირობებს და არცთუ იშვიათად ინტერესდება კიდეც ამა თუ იმ პროდუქტის შეძენით.
რა ლიმიტები უნდა დაიფაროს ავტომფლობელთა პასუხისმგებლობის სავალდებულო დაზღვევის პოლისით
კვლავ, ახალგაზრდა ფინანსისტების ხელთ არსებული ინფორმაციით, ავტომფლობელთა პასუხისმგებლობის სავალდებულო დაზღვევის შემოღების შემთხვევაში, აღნიშნული პოლისი აანაზღაურებს ნებისმიერი ავტოსაგზაო შემთხვევის შედეგად მესამე პირის მიმართ მიყენებულ ზიანს მიუხედავად იმისა, ბრალეული ავტოსატრანსპორტო საშუალება ამოუცნობი იქნება თუ გატაცებული. პოლისი დაფარავს ავტოსაგზაო შემთხვევისას დამდგარ, როგორც ქონებრივ, ისე მესამე პირის ჯანმრთელობისთვის მიყენებულ ზარალსაც. ზარალის დაფარვის ლიმიტი სავარაუდოდ შემდეგი იქნება:
"ერთი სადაზღვევო შემთხვევისას ქონებრივი ზარალის ანაზღაურება – მაქსიმუმ 10 000 აშშ დოლარის ოდენობით, ხოლო იმ შემთხვევაში თუ საგზაო შემთხვევაში 5–ზე მეტი მანქანაა მოყოლილი ქონებრივი ზარალის ჯამური ანაზღაურების ლიმიტი იზრდება 100 000 აშშ დოლარამდე. რაც შეეხება ჯამრთელობისთვის მიყენებული ზიანის ანაზღაურებას, ერთი სადაზღვევო შემთხვევისას აქ ჯამური ლიმიტი 1 მილიონი ლარი იქნება გათვალისწინებული ისეთი შემთხვევისთვის, როცა ავარიის შედეგად ზარალდებიან სამგზავრო ტრანსპორტში (ავტობუსი/მიკროავტობუსი) მსხდომი მოქალაქეები.
პირადი ავტროტრანსპორტის მოქმედების შედეგად დამდგარი ჯანმრთელობისთვის მიყენებული ზიანის ანაზღაურების ლიმიტი ერთ ადამინზე ასევე 10 000 აშშ დოლარით იქნება განსაზღვრული. პოლისი ასევე დაფარავს, ცხადია, ერთჯერადად, შრომისუუნარობით გამოწვეულ ზარალს (შესაბამისი ხარისხის მიხედვით) მაქსიმალური ლიმიტით ასევე 10 000 აშშ დოლარი. პოლისი ასევე დაფარავს ავტოსაგზაო შემთხვევის შედეგად გარდაცვალების რისკს. ასეთ შემთხვევაში გარდაცვლილის ოჯახი ერთჯერადად მიიღებს 10 000 აშშ დოლარს.
ზემოთმოყვანილი ციფრების შემდეგ ალბათ ძნელი წარმოსადგენი არ არის იმ სიკეთის განსაზღვრა, რასაც ავტომფლობელთა პასუხისმგებლობის სავალდებულო დაზღვევის შემოღება მოიტანს ავარიის შედეგად დაზარალებული მესამე პირებისთვის. ეს დიდი საზოგადოებრივი და სოციალური სიკეთეა, რომელიც ყველა ავტომფლობელს თვეში მაქსიმუმ 17 ლარი დაუჯდება," – განაცხადა აფბას ვიცე პრეზიდენტმა.
კაპანაძე მიიჩნევენ, რომ ავტომფლობელთა სამოქალაქო პასუხისმგებლობის სავალდებულო დაზღვევის შემოღება ერთ–ერთი ის ინიციატივა იქნება, რომელიც მოქალაქეთა სოციალურ დაცულობას საგრძნობლად აამაღლებს და ბიზნესის განვითარების სერიოზული ხელშემწყობი ფაქტორიც გახდება. შესაბამისად, მისი მიღება და დროულად ამოქმედება ყველა მხარის ინტერესშია, იქნება ეს ავტომფლობელები, საკუთრივ სადაზღვევო სექტორი თუ ხელისუფლება.
"ახალგაზრდა ფინანსისტთა და ზინესმენთა ასოციაცია" მოუწოდებს საქართველოს მთავრობას მაქსიმალურად დააჩქაროს ავტომფლობელთა სამოქალაქო პასუხისმგებლობის სავალდებულო დაზღვევის შესახებ კანონპროექტის ინიცირება საქართველოს პარლამენტში. ასევე, ასოციაცია მოუწოდებს სადაზღვევო სექტორს, გახდეს უფრო აქტიური და ინიციატივიანი აღნიშნული პროდუქტის დანერგვის კუთხით.
