კინორეჟისორების თქმით, ეკონომიკის სამინისტრო კინოსტუდია "ქართული ფილმის" გასხვისებას გეგმავს, რაშიც ხელს კულტურის სამინისტროც უწყობს.
აღნიშნულ საქმესთან დაკავშირებით, სამეურვეო საბჭოს წევრებმა პრესკონფერენცია გამართეს, რომელსაც კინემატოგრაფისტები: ბუბა ხოტივარი, ელდარ შენგელაია, მერაბ კოკოჩაშვილი, მიხეილ კობახიძე და სხვები ესწრებოდნენ.
რეჟისორებმა იმ მოსალოდნელ საშიშროებაზე ისაუბრეს, რაც მათი აზრით, კინოსტუდიის გასხვისებას მოჰყვება.
"ჩვენს თვალსა და ხელს შუა მოხდა ისეთი რამ, რაც ჩემთვის ყოველთვის წარმოუდგენელი იყო – ქართული კინოსტუდიის გაყიდვა უნდათ. ამას პირდაპირ ვამბობ. თუმცა ეს ინიღბება რეფორმის, კონკურსის, ლამაზი ლოზუნგების, ქართული კინოს დახმარების, საქართველოს აღორძინების სიტყვებით. სინამდვილეში, ეს არის გაყიდვა და ამ ტაძრის დუქნად ქცევა,"_ განაცხადა ბუბა ხოტივარმა.
კინორეჟისორ ელდარ შენგელაიას თქმით კი, მნიშვნელოვანია კულტურის მინისტრმა კინემატოგრაფისტებთან უშუალო კომუნიკაცია იქონიოს, რათა პრობლემის გადაჭრის გზები ერთად შეიმუშაონ, თუმცა მისივე თქმით, მინისტრი გიორგაძე მათთან შეხვედრას და კინოსტუდიის გასხვისებაზე საუბარს შეგნებულად ერიდება.
კინორეჟისორებისგან განსხვავებული პოზიციები აქვთ ხსენებულ უწყებებში. ეკონომიკის სამინისტროში ირწმუნებიან, რომ კინოსტუდიის გასხვისება არ იგეგმება.
გიორგი კვირიკაშვილის თქმით, ეს ცალკეული ადამიანების მიერ წაქეზებული პროცესია. ამ საკითხთან მიმართებაში კი კინემატოგრაფისტთა საზოგადოებაში ერთობა და ერთიანი ხედვა არ არის.
"უფრო მეტიც, ჩვენ ვცდილობთ, რომ მოვძებნოთ მექანიზმი, თუ როგორ მოვახდინოთ ერთობლივად ამ საკითხის მართვა. მოხარული ვიქნები, თუ საქართველოს კინემატოგრაფისტები და ამ სფეროში დასაქმებული ადამიანები, რომლებსაც მე დიდ პატივს ვცემ, შეიმუშავებენ და წარმოადგენენ ერთიან კონცეფციას, რომ ჩვენ ეს საკითხი დავძრათ.
მათ ზურგს უკან, როგორც ისინი აცხადებენ, არანაირი პროცესები არ მიმდინარეობს. მესმის მათი, რადგან წარსულში მოხდა ისე, რომ კუთვნილი წილი გაუყიდეს, რაც ძალიან სამწუხაროა. სურვილი იმისა, რომ მათ ეს აღიდგინონ, ან კომპენსაცია მიიღონ, ძალიან დიდია, მაგრამ კიდევ ერთხელ ვამბობ, რომ ეს არის მათი ჩართულობით. არავითარ შემთხვევაში მთავრობა განყენებულად გადაწყვეტილებას არ მიიღებს, ამას ხაზგასმით ვამბობ,"– განაცხადა ეკონომიკის მინისტრმა
რაც შეეხება კულტურის სამინისტროს პოზიციას, როგორც მინისტრი მიხეილ გიორგაძე განმარტავს, მას ჯინორეჟისორებთან საკმაოდ გაფართოებულ ფორმატში ჰქონდა შეხვედრები.
"ეს დამოკიდებულება ღია კარის მტვრევას მაგონებს, როდესაც ადამიანებს ეუბნები, რომ არაფრის გაყიდვას არ აპირებ და შემდეგ სხვა ფორმატში ამავე საკითხზე პრეტენზიას გამოხატავ. ის დამოკიდებულება, რომელიც შეხვედრაზე ამ ადამიანების მხრიდან იგრძნობოდა, ამ განცხადებებისგან რადიკალურად განსხვავდებოდა. ერთმანეთს მადლობა გადავუხადეთ და თებერვლისთვის კიდევ ერთი შეხვედრა დავგეგმეთ, რათა მათთვის ამ პრობლემის გადაწყვეტის ფორმატზე გვემსჯელა,"– განაცხადა კულტურის მინისტრმა მიხეილ გიორგაძემ.
