ოზურგეთის მუნიციპალიტეტის სოფელ მერიაში ყოფილი სამხედრო ნაწილის საცხოვრებელი კორპუსია, რომელშიც 10 უსახლკარო ოჯახია შესახლებული.
უსახური და პირქუში შენობა, კიბეებჩავარდნილი და იატაკდამპალი, უფანჯრო ოთახები, "ბარაკებში", სახურავგადამძვრალ, უკანალიზაციო, ჭაობიან, ანტისანიტარიულ გარემოში მცხოვრებთ ერთი საერთო პრობლემა აქვთ _ ყოველდღიურად თავის გატანა.
ნელი ვასაძე: _ საშინელ დღეში ვართ _ წყალი ჩვენ არ გვაქვს, კანალიზაცია, იატაკი… გვაწვიმს, გვათოვს. აგერ, ერთი მომაკვდავი, უპატრონობით და შიმშილით კვდება. ასეთ გაჭირვებულ ხალხს ვერსად ნახავთ. რამდენიმე წლის წინ დამეწვა სახლი და ქმარიც შიგ დამეღუპა. წლების მანძილზე დავდიოდი წინა ხელისუფლებასთან დახმარებისთვის, მაგრამ არავითარი დახმარება არ მიმიღია. მერე შემოვეკედლე ამ საცხოვრებელს. ახლა დაგვპირდა გამგებელი და ვნახოთ, რა იქნება _ იმედი გვაქვს.
სალომე ბერძენიშვილი: _ სამი შვილის დედა ვარ. სამი წელია, აქ, არაადამიანურ პირობებში ვცხოვრობთ. მხოლოდ სოციალური დახმარების იმედზე ვართ თვიდან თვემდე. მეზობლები დამეხმარნენ, რომ იატაკზე რაიმე დამეფარებინა. ვის არ მივმართე დახმარებისთვის, წინასაარჩევნოდ სიორიძესთანაც ვიყავი. კიო, ყველა დამპირდა, მაგრამ… ერთი შვილი სკოლის მოსწავლეა და ორი ბაღში დადის. განქორწინებული ვარ, სასამართლომ ჩემ ყოფილს ქმარს ალიმენტის გადახდა დააკისრა, მაგრამ ერთ თეთრსაც არ იხდის. როგორ უნდა გვეყოს სოციალური დახმარება?
როზა ღუღუნიშვილი: _ წამლებით ვარ ცოცხალი. პენსიას კი ვიღებ, მაგრამ სოციალური დახმარება არ მაქვს. შეიძლება, მარტოხელა მოხუც პენსიონერს სოციალური დახმარება არ მქონდეს? გათბობა არ მინდა? წამოდით, ნახეთ, როგორ ვცხოვრობ.
"გურია ნიუსმა" აღნიშნული კორპუსის მესამე სართულზე, პატარა ოთახში, მოხუცი ქალბატონი ნინა სტაროსტინა მოინახულა, რომელიც საწოლზე სრულიად უპატრონოდ წევს. მისი ყოველდღიურობა უმძიმესია, მეზობლების ნაამბობი კი მტკივნეული და შემაშფოთებელი.
წარმოუდგენელია იმის აღწერა, თუ რა სიტუაციაა იმ ერთ ოთახში _ ანტისანიტარული პირობები, სადაც ერთი წამით გაჩერებაც კი შეუძლებელია.
როგორც "გარადოკის" მცხოვრებლები ამბობენ, ქალბატონ ნინას საჭმელს მეზობლები მორიგეობით აწვდიან, თუმცა, ამის საშუალება მუდმივად არც მათ აქვთ.
"გურია ნიუსი" დაუკავშირდა ოზურგეთის მუნიციპალიტეტის გამგებლის წარმომადგენელს სოფელ მერიაში გრიგოლ კოსტავას, რომელმაც აღნიშნა, რომ ამ ქალბატონს მიჩენილი ჰყავს მომვლელი: _ უპატრონოდ ნამდვილად არ კვდება _ ვენერა ჰქვია იმ ქალბატონს, ვინც მაგას უვლის. ვიცი, რომ ცუდ მდგომარეობაშია, თუმცა, ჩვენ მაქსიმუმს ვაკეთებთ. გასაგებია, რომ კვდება, მაგრამ ჩვენ მაგის სიკვდილს ხელს ვერ შევუშლით _ რაც შეიძლება, ვეხმარებით, _ გვითხრა კოსტავამ.
ოზურგეთის მუნიციპალიტეტის გამგეობის პრესსამსახური ამ თემაზე ასეთ კომენტარს აკეთებს:
"მერიის ადმინისტრაციულ ერთეულში, ე. წ. ყოფილ სამხედრო "გარადოკში" მცხოვრები სოციალურად დაუცველი და სიღარიბის ზღვარს ქვემოთ მცხოვრები ოჯახების მდგომარეობა ჩვენთვის ცნობილია. მუნიციპალიტეტის გამგეობა აქტიურად მუშაობს აღნიშნული ოჯახების საცხოვრებელი პირობების გაუმჯობესებაზე. ადგილობრივი და მოწვეული სპეციალისტები ამოწმებენ მერიის ტერიტორიაზე არსებული საცხოვრებელი კორპუსის მდგრადობას. როცა დაიდება სპეციალისტების დასკვნა, დაიწყება შენობის სარეაბილიტაციო სამუშაოები, რის შემდეგაც უსახლკარო ოჯახები საცხოვრებელი ფართით დაკმაყოფილდებიან.
რაც შეეხება, ამავე კორპუსში მცხოვრები ხანშიშესული ქალბატონის, ნინა სტაროსტინას მდგომარეობას, სიტუაცია უმძიმესია. მარტოხელა ქალბატონის საყოფაცხოვრებო პირობების შესამსუბუქებლად, ოზურგეთის მუნიციპალიტეტის გამგეობამ გადაწყვიტა, ადგილობრივი ხელისუფლების ბიუჯეტით მას ელემენტარული საცხოვრებელი პირობები შეუქმნას. გამგეობას დაგეგმილი აქვს მოაწესრიგოს სტაროსტინას ამჟამინდელ საცხოვრებელ კორპუსში ერთი ოთახი და უზრუნველყოს ელექტროენერგიითა და გათბობის საშუალებით. სოციალური მომსახურების სააგენტოსგან ქალბატონი დახმარების სახით სოციალურად დაუცველის ფულად შემწეობასა და პენსიას იღებს".
