ამ კითხვას საქართველოს ყოფილი პრეზიდენტი, მიხეილ სააკაშვილი სვამს.
სააკაშვილმა "რუსთავი 2"-ის გადაცემა "არჩევანისთვის" მიცემულ ინტერვიუში საქართველოში შექმნილ მდგომარეობაზე – ლარის კურსის დაცემასა და მსხვილი პრეოქტების შეჩერებაზე ისაუბრა.
"2012 წელს, როცა ჩვენ გადავაბარეთ ხელისუფლება, ლარის კურსი იყო 1,62. სამწუხაროდ, ჩემი პროგნოზი არის შემდეგ თვეებში ლარის კიდევ უფრო დაცემა. ეს იმიტომ კი არა, რომ მე მინდა, ეს არის ობიექტური შედეგი ყველაფერ იმისა, რის შესახებაც ხალხს ვაფრთხილებდით. ეს არის შედეგი იმისა, რომ ჩვენი დიდი პროექტები გაჩერდა ჩემ ჯინაზე. ამის შეჩერება რომ გამოიწვევდა ცხოვრების დონის გაუარესებას, სამსახურის დაკარგვას, რად უნდოდა ამას დიდი ფილოსოფია?! როგორ უნდა მოახერხო, რომ ტურიზმი, რომელიც ჩვენ დროს გაიზარდა 57 %-ით, 2-3 წელიწადში ეცემა 7 %-ით.
რა არის, ატომური ბომბი გვესროლა ვინმემ, თუ რატომ მოხდა, ებოლა გავრცელდა, თუ რატომ შეიძლება შემცირებულიყო ტურიზმი ასე? – იმიტომ, რომ ვიზებს აღარ აძლევდნენ, არ იყო ის დახმარება, რაც საჭირო იყო. სააკაშვილის ახირებები რომ ეგონათ სასტუმროების მშენებლობა, ეს იყო ხალხის დასაქმების საშუალება. მე ავიკიდე ის სასტუმროები და წამოვიღე? მითხარით ერთი სფერო მაინც საქართველოში, რომელიც 2012 წლის არჩევნების შემდეგ გაუმჯობესდა! 2012 წლის საარჩევნო კამპანიის დროს ხალხს ვეუბნებოდი – დაუსვით თქვენ თავს ერთი კითხვა, დღეს უკეთესი ვართ თუ არა, ვიდრე 2003 წელს? – მეუბნებოდნენ კი. ახლა მინდა დავსვა კითხვა – დღეს ხართ თუ არა უკეთესად ჩემო ძვირფასო თანამემამულეებო, ჩემო საყვარლებო, ვიდრე 2012 წლის 1-ელ ოქტომბერს?", – მიმართა ყოფილმა პრეზიდენტმა საქართველოს მოსახლეობას.
