ა(ა)იპ "ქალაქ ოზურგეთის მუნიციპალიტეტის ცენტრალური სტადიონის" ყოფილმა დირექტორმა მურთაზ აბაშიძემ სასამართლო პროცესი უკვე მეორედ მოიგო.
ოზურგეთის საქალაქო სასამართლოს მოსამართლემ მარინა კიკნაძემ, აბაშიძის სარჩელი სრულად დააკმაყოფილა და ქალაქ ოზურგეთის მერიის გადაწყვეტილება, რომლის თანახმადაც აბაშიძე სამსახურიდან მეორედ გაათავისუფლეს, ბათილად ცნო.
სასამართლომ ქალაქ ოზურგეთის მერიას მურთაზ აბაშიძის სამსახურში აღდგენა და განაცდური ხელფასის ანაზღაურება მეორედ დააკისრა.
შეგახსენებთ, რომ ა(ა)იპ ქალაქ ოზურგეთის მუნიციპალიტეტის ცენტრალური სტადიონის დირექტორი მურთაზ აბაშიძე 2014 წლის 1 დეკემბერს ოზურგეთის მერმა ბეგლარ სიორიძემ სამსახურიდან გაათავისუფლა. მოგვიანებით, სასამართლომ აბაშიძე დაკავებულ პოზიციაზე აღადგინა.
თუმცა, სამსახურში აღდგენიდან მომდევნო დღეს, სიორიძემ იგი კვლავ გაათავისუფლა. აბაშიძემ მერიის ეს გადაწყვეტილებაც გაასაჩივრა და სასამართლო კიდევ ერთხელ მოიგო.
ქალაქ ოზურგეთის მერი ბეგლარ სიორიძე მოსამართლის მიერ გამოტანილ გადაწყვეტილებას უსამართლოს უწოდებს.
ბეგლარ სიორიძე: "ჯერ არ მიგვიღია სარეზოლუციო ნაწილი, როცა მივიღებთ, რა თქმა უნდა, ვაპირებთ გასაჩივრებას, იმდენად, რამდენადაც, ვფიქრობ, რომ აბსოლუტურად უსამართლო გადაწყვეტილება მიიღო მოსამართლე მარინა კიკნაძემ.
არსებობს აუდიტის ოფიციალური დასკვნა, რომელშიც წერია, რომ დირექტორის საქმიანობა არის მაღალი რისკის შემცველი. რაც ნიშნავს, რომ მას შეუწყდეს შრომითი კონტრაქტი. ამ შემთხვევაში, გათავისუფლდეს დაკავებული თანამდებობიდან. ჩემთვის გაუგებარია მოსამართლის ასეთი მიდგომა _ არ შეიძლება, ძალდატანებით თავს მოგვახვიონ ისეთი დადგენილება, რომ გავათავისუფლოთ თანამდებობიდან ნამდვილი წარმატებული მენეჯერი და დავაბრუნოთ თანამდებობაზე ისეთი ადამიანი, რომლის დროსაც, ამ სიტყვის სრული მნიშვნელობით, არანაირი ძვრა უკეთესობისკენ სტადიონზე არ ხდებოდა. პირიქით, "გაფარჩაკებული" იყო იქაურობა.
_ ბატონო ბეგლარ, სასამართლომ უკვე მეორედ გაამართლა მურთაზ აბაშიძე. თქვენ მიგაჩნიათ, რომ ორივე მოსამართლის მიერ გამოტანილი გადაწყვეტილება უსამართლოა?
_ ჩემთვის პირველი მოსამართლის მიერ გამოტანილი გადაწყვეტილებაც აბსოლუტურად გაუგებარი იყო. შეუიარაღებული თვალითაც ჩანდა, თუ რა მდგომარეობა იყო სტადიონზე და როგორ ართმევდა თავს მაშინდელი მენეჯერი ბატონი მურთაზი თავს დაკისრებულ მოვალეობას. ბატონმა მურთაზმა აირჩია ეს გზა, ეს მისი ნებაა. ორივე სასამართლოს გადაწყვეტილება ჩემთვის აბსოლუტურად გაუგებარია, რადგან კიდევ ერთხელ ვიმეორებ, რომ გვაქვს აუდიტის დასკვნა, სადაც უამრავი დარღვევაა აბაშიძის საქმიანობის დროს.
_ სხვა ა(ა)იპ-ებთან დაკავშირებით თუ გაქვთ აუდიტის დასკვანა, თუ მხოლოდ კონკრეტულად სტადიონის დირექტორის საქმიანობა შეისწავლა აუდიტის სამსახურმა?
_ სხვათაშორის, ქალაქ ოზურგეთის მუნიციპალიტეტის ა(ა)იპ "ცენტრალური სტადიონზე" ჩვენ ვიწყებთ რეორგანიზაციას. გარდა ამ ა(ა)იპ-ისა, ჩვენ ვიწყებთ სხვა ა(ა)იპ-ების რეორგანიზაციასაც, სადაც, ჩემი შეხედულებით, საკმაოდ სერიოზულ დარღვევებთან გვაქვს საქმე,
_ აღდგება თუ არა მურთაზ აბაშიძე სამსახურში?
_ მურთაზ აბაშიზე მოხვდება თუ არა აღნიშნულ თანამდებობაზე, ამას გადაწყვეტს სააპელაციო სასამართლო, სადაც ჩვენ გავასაჩივრებთ ოზურგეთის რაიონული სასამართლოს გადაწყვეტილებას.
სტადიონის ყოფილი დირექტორი მურთაზ აბაშიძე "გურია ნიუსთან" აღნიშნავს, რომ ბრძოლას ბოლომდე აპირებს: "ვარ უკანონოდ გათავისუფლებული, რაც სასამართლომ უკვე მეორედ დაამტკიცა. ვაპირებ ბრძოლას ბოლომდე, სისხლის უკანასკნელ წვეთამდე. არ გავჩერდები, სანამ სიმართლეს არ დავადგენ. მენეჯმენტი რომ დამიწუნა ქალაქის მერმა, მაინტერესებს, თვითონ როგორი მენეჯერია, როცა ბიუჯეტიდან სტადიონის მოქმედ დირექტორსა და მე, რომელიც არაფერს არ აკეთებს, ორივეს ერთად გვიხდის ხელფას? ეს კარგი მენეჯერობაა? არის თუ არა ეს ბიუჯეტის გაფლანგვა?"
საქართველოს ახალგაზრდა იურისტთა ასოციაციის ოზურგეთის ოფისის იურისტი ქეთი თოიძე ამბობს, რომ სასამართლომ მიიღო სწორი გადაწყვეტილება.
"მოგეხსენებათ, უკვე მეორდ ვიცავდით მურთაზ აბაშიძის ინტერესებს ოზურგეთის რაიონულ სასამართლოში სამსახურიდან გათავისუფლების დავასთან დაკავშირებით. პირველ შემთხვევაშიც სასამართლომ სრულად დააკმაყოფილა ჩვენი სასარჩელო მოთხოვნა და ჩვენ მიერ გაწეული იურიდიული დახმარების შედეგად მურთაზ აბაშიძე აღდგენილი იქნა თანამდებობაზე. მეორე შემთხვევაშიც დაკმაყოფილდა სრულად ჩვენი სასარჩელო მოთხოვნები და ვფიქრობთ, რომ სასამართლომ სწორად გაიზიარა ჩვენი სამართლებრივი დასაბუთება მისი სამსახურიდან გათავისუფლების შესახებ, ბრძანების კანონთან შეუსაბამობის შესახებ".
შრომითი ხელშეკრულების თანახმად: "ადამიანის დევნა სიტყვის, აზრის, სინდისის, აღმსარებლობის, რწმენის ან მრწამსის გამო, ანდა მის პოლიტიკურ, საზოგადოებრივ, პროფესიულ, რელიგიურ ან მეცნიერულ მოღვაწეობასთან დაკავშირებით, – ისჯება ჯარიმით ან თავისუფლების შეზღუდვით ვადით ორ წლამდე ანდა თავისუფლების აღკვეთით იმავე ვადით. 2. იგივე ქმედება: ა) ძალადობით ან ძალადობის მუქარით; ბ) სამსახურებრივი მდგომარეობის გამოყენებით; გ) რამაც მნიშვნელოვანი ზიანი გამოიწვია, – ისჯება ჯარიმით ან თავისუფლების შეზღუდვით ვადით სამ წლამდე ანდა თავისუფლების აღკვეთით ვადით სამ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე ან უამისოდ.
მუხლი 168. შრომის თავისუფლების ხელყოფა + შრომის თავისუფლების ხელყოფა, ესე იგი ნებისმიერი სახის კანონიერ შრომით საქმიანობაში ხელის შეშლა ძალადობით ან ძალადობის მუქარით – ისჯება ჯარიმით ან გამასწორებელი სამუშაოთი ვადით ერთ წლამდე ანდა თავისუფლების აღკვეთით ვადით ორ წლამდე."
ამ თემაზე მომზადებული სიუჟეტი შეგიძლიათ ნახოთ გადაცემაში "კვირის თემა" მოცემულ ლინკზე
