აუდიო მასალა, რომელიც სავარაუდოდ, მოსკოვში, 2011 წლის შემოდგომის პერიოდით თარიღდება, მას შემდეგ არის ჩაწერილი, რაც ბიძინა ივანიშვილმა პოლიტიკაში მოსვლის შესახებ განაცხადა. მასალებიდან, რომელიც გაზეთმა "ქრონიკა +" გაავრცელა, ჩანს, რომ ჩანაწერში ძირითადად 2 პირი ფიგურირებს – თავდაცვის ყოფილი მინისტრი ირაკლი ოქრუაშვილი, რომელიც აღნიშნულ დრო იძებნებოდა და შესაბამისად, საქართველოში ვერ ჩამოდიოდა და უშიშროების ყოფილი მინისტრი ვალერი ხაბურძანია. ჩანაწერში ჩანს, რომ ისინი საქართველოში ხელისუფლების შეცვლის გზებს განიხილავენ.
აუდიო მასალა მოსახლეობის ფართო ნაწილისთვის ცნობილი ტელეკომპანია "რუსთავი2"-ის გადაცემამ "არჩევანი" გახადა.
ჩანაწერის ერთი ნაწილი ბიძინა ივანიშვილის პოლიტიკაში გამოჩენას ეხება. ირაკლი ოქრუაშვილი რუსულ სპეცსამსახურებში თავის წყაროზე დაყრდნობით ვალერი ხაბურძანიას უყვება, რომ ივანიშვილი რამდენიმე თვით ადრე მოსკოვში იმყოფებოდა და მისი ვარაუდით, პოლიტიკაში მოსვლის წინ კონსულტაციები სწორედ მოსკოვში გაიარა და გარანტიებიც მიიღო.
ჩანაწერი, სადაც ოქრუაშვილი ხაბურძანიას ესაუბრება:
ირაკლი ოქრუაშვილი (სტილი დაცულია, – რედ.): _ "მე ბიძინას თემაზე აქ საკითხი როგორ დავუყენე, იცი? მაგის დედა მო…, ტიპი წამოსულია, არ ვიცოდი, აქ იყო თუ არა, უფრო ვფიქრობდი, რომ საფრანგეთში იყო. საფრანგეთში ერთი-ორჯერ ამერიდა, პრინციპში, არც მე მომიკლია თავი ნამეტანი შეხვედრაზე, მაგრამ შევატყვე, რომ ბოლო პერიოდი აქტიურად მოძრაობდა. თვითონ იმათაც მითხრეს, იქაურმა "რაზვედჩიკებმა". ამათ ვუთხარი, რომ გამოსულია-მეთქი ქვეყნიდან, "კაკრაზ" ეს გინებები რომ დაიყო, განცხადებები რომ მოაყარა, მაისის ამბები ჩავლილი იყო, მოდის ტიპი და მეუბნება, აქ არის, მოსკოვშიო, და "დავაი", მე ვუთხარი, თუ აქ არის, მაგაზე კაი შანსი რა გინდათ, ძმაო. ხოდა, შევაწუხეთო ჩვენო, და ცოტა ზემოდანაც არ მოგვცეს ბოლომდე შეწუხების საშუალება და თვითონაც აირიდა თემაო, წავიდა უკვეო.
მე ვიფიქრე, მეთქი ან ამათ რომ აუტალახეს თავის რაღაც წინ საქმეებზე, შეიძლება, უკან დაიხიოს, მაგრამ ამას მე გიყვები, დაახლოებით, წავიდა სადღაც ივნისის ბოლოს, რაც ნიშნავს, რომ ტიპმა აქ რაღაც მოილაპარაკა და წავიდა. თუ ახლა სამ-ოთხ თვეში განცხადება მოაყოლა. ორი რაღაცაა, რა, ან ესენი არიან, ან მიშა, ან მიშასთან შეთანხმებით არის, ესენი არიან "პროსტო", ისე, რომ ახლა რა ყ…ობაც მე გავაკეთე, რომ არავისთან არაფერი მოლაპარაკებული არ მქონდა, გამოვვარდი და ისე ვთხლიშე, ეგეთ რამეს ეგ არ გააკეთებს. მინიმუმ, ამათთან მაინც გაარკვევდა, თუ მიშაზე დარტყმას აპირებდა."
ჩანაწერების ავთენტურობა დადასტურებული არაა. თუმცა, ვალერი ხაბურძანიამ მოსკოვიდან გადაცემაში ჩართვისას ფაქტობრივად, ჩანაწერების ნამდვილობა დაადასტურა.
