“ეს ცენტრი იქცევა დასავლეთ საქართველოს უმნიშვნელოვანეს სამეცნიერო-კვლევით ბაზად”

საქართველოს სოფლის მეურნეობის მინისტრი ოთარ დანელია ოზურგეთში, დაბა ანასეულს ეწვია. სამინისტრომ მიიღო გადაწყვეტილება, ანასეულის ნიადაგისა და სურსათის დიაგნოსტიკური ცენტრის ბაზაზე შეიქმნას სამეცნიერო-საკონსულტაციო ინსტიტუტი, რომელიც მთელ დასავლეთ საქართველოს მოემსახურება და აქ  ჩატარდება ნიადაგის, სურსათის, სასუქების, სოფლის მეურნეობის პროდუქტების ანალიზი.

აღსანიშნავია, რომ  გადაწყვეტილების მიღებაში მნიშვნელოვანი წვლილი მიუძღვის გურიის ყოფილ გუბერნატორს გიორგი ჩხაიძეს. როგორც მეცნიერები ამბობენ, მან გაითვალისწინა, მეცნიერთა თხოვნა და ოთარ დანელიას ჯერ კიდევ მინისტრის მოადგილის თანამდებობაზე  მუშაობისას გააცნო არსებული ვითარება.

_ ეს ლაბორატორია  სოფლის მეურნეობის სამინისტროს დაქვემ­დებარებაში მოექცა. ჩვენ ყველაფერს გავაკეთებთ იმისთვის, რომ ანასეულის ამ ცენტრმა ძველი დიდება დაიბრუნოს _ მისი სრულყოფილი ფუნქციონირება რეგიონის განვითარების უმნიშვნელოვანესი პირობაა.გავაუმჯობესებთ მატერიალურ-ტექნიკურ ბაზას, მოხდება სრული განახლება და თანამედროვე სტანდარტებზე გადაყვანა

განსაკუთრებული მადლობა უნდა ვუთხრა იმ ადამიანებს, რომლებმაც მძიმე პერიოდში შეინარჩუნეს ეს ცენტრი, ეს გმირობის ტოლფასია! ეს ცენტრი იქცევა დასავლეთ საქართველოს უმნიშვნელოვანეს სამეცნიერო-კვლევით ბაზად, _ თქვა ოთარ დანელიამ.

ადამ ბერიძის სახელობის ნიადაგისა და სურსათის დიაგნოსტიკური ცენტრი ნგრევის ხანაში სასწაულებრი

ვად გადაარჩინეს მეცნიერებმა, რაშიც უდიდესი წვლილი მიუძღვის  ხელმძღვანელს _ სოფლის მეურნეობის აკადემიურ დოქტორს რუსუდან ტაკიძეს, რომელმაც კოლეგებთან ერთად, წლების მანძილზე მიზერული ანაზღაურების ფასად იმუშავა, დარაჯიც იყო და მკვლევარი მეცნიერიც და  ქვეყანას შემოუნახა ძვირფასი ლაბორატორია, რომლის ფასიც დღეს, სოფლის მეურნეობის აღორძინების ჟამს, განუზომელია.

_ ლამის, სიცოცხლის ფასად გადავარჩინეთ ეს ლაბორატორია. დაბნელებულ წლებში ვდარაჯობდით, რომ ვინმეს არ გაეძარცვა. ხელფასს ვინ დაეძებდა? როგორც ადამიანის სიცოცხლე, ისე უნდა დაგვეცვა და ეს შევძელით. ახლა განახლება ხდება, სახელმწიფო იღებს პასუხისმგებლობას, სამინისტრო იწყებს რემონტს. სარდაფში გაკეთდება  მცენარეთა გენოფონდის ლაბორატორია, 2015 წლის  ბოლომდე დასრულდება სრული განახლება, მოეწყობა სადემონსტრაციო ნაკვეთი ერთწლიანი თუ მრავალწლიანი კულტურებისთვის. უდიდესი მოლოდინი მაქვს, რომ მოხდება ჩაის რეაბილიტაცია, _ გვითხრა რუსუდან ტაკიძემ.