“ნაციონალური მოძრაობის“ ლიდერი თანაპარტიელის პასუხისმგებლობის დაყენების საკითხს ითხოვს

იმ საკრებულოს წევრებმა, რომლებმაც ერთი კვირის წინ ქალაქ ოზურგეთის საკრებულოს სხდომაზე მუნიციპალიტეტის ქონების მერის მიერ პირდაპირი განკარგვის წესით სარგებლობის უფლებით გაცემას 35 წლის ვადით მხარი არ დაუჭირეს, დღეს ამ წინადადებას უპირობოდ მისცეს ხმა.

"ნაციონალური მოძრაობის" წევრმა ირინა საჯაიამ და "საქართველოს გზის" წარმომადგენელმა ნინო ტაბატაძემ ქალაქ ოზურგეთის მერის ინიციატივასა და პროექტს მხარი დაუჭირეს, რასაც დეპუტატებს შორის შელაპარაკება და ურთიერთდაპირისპირება მოჰყვა

საკრებულოს სხდომა პიროვნული შეურაცხყოფებისა და ურთიერთბრალდებების ფონზე მიმდინარეობდა.

"ნაციონალური მოძრაობის" ოზურგეთის ორგანიზაციის თავმჯდომარემ აღნიშნულ საკითხთან დაკავშირებით განცხადება გააკეთა _ დავით მჟავანაძე "ნაციონალური მოძრაობის" წევრის ირინა საჯაიას მიმართ პასუხისმგებლობის დაყენებას ითხოვს.

“მინდა გამოვეხმაურო ქალაქ ოზურგეთის საკრებულოს დღევანდელ სხდომას, რომელზეც "ნაციონალური მოძრაობის" დეპუტატმა ირინა საჯაიამ მხარი დაუჭირა ქალაქ ოზურგეთის მერის ინიციატივას.

ბუნებრივია, ეს არ არის "ნაციონალური მოძრაობის" პოზიცია. შესაბამისად, საუბარი ხელისუფლებისა და "ნაციონალური მოძრაობის" ალიანსზე საფუძველსმოკლებულია. რაც შეეხება საჯაიას ქმედებას, ეს გახლავთ "ნაციონალური მოძრაობის" სიით გასული დეპუტატის საკუთარი ნებით მიღებული გადაწყვეტილება, რომელიც "ნაციონალური მოძრაობის" გუნდში არ იყო შეთანხმებული, თუმცა, მაქვს ინფორმაცია, რომ ქალბატონ ირინას მიმართ ხელისუფლების მხრიდან ხორციელდებოდა ზეწოლა და შანტაჟი. მიუხედავად ამისა, ეს ვერ ჩაითვლება საპატიო მიზეზად.

ყოველივე აქედან გამომდინარე უახლოეს დღეებში მივმართავ პარტიის ხელმძღვანელობას, მისი პასუხისმგებლობის დაყენების თაობაზე.“