"აქ იკვეთება ისეთი საკითხი, რომელიც აუცილებლად უნდა შეისწავლოს კომპეტენტურმა ორგანოებმა, საქმე გვაქვს კორუფციულ გარიგებასთან. რას ნიშნავს ასეთი დაჟინებული მოთხოვნა, რომ გინდა თუ არა ერთ პიროვნებას უნდა მისცენ 35 წლით ქალაქის ტერიტორიაზე ბიზნესის თვალსაზრისით ყველაზე მომგებიანი ადგილი, რატომ არა აუქციონის წესით, რომელიც უფრო მეტ სარგებელს მოუტანდა მუნიციპალიტეტის ბიუჯეტს?" _ აღნიშნა ქალაქ ოზურგეთის საკრებულოს დეპუტატმა ლევან მგელაძემ ჟურნალისტებთან გამართულ ბრიფინგზე.
საქმე ეხება ქალაქ ოზურგეთს მერის ბეგლარ სიორიძის ინიციატივას, მიეცეს საკრებულოს თანხმობა, პირდაპირი განკარგვის წესით გაასხვისოს ქონება ქალაქ ოზურგეთის ტერიტორიაზე, რაც გუშინ საკრებულოს სხდომაზე დეპუტატების უმრავლესობამ დაამტკიცა კიდეც.
"ქალაქ ოზურგეთის მერმა უკვე მეორედ გამოიტანა საკრებულოს სხდომაზე ის საკითხი, რაზეც უკვე ერთხელ დეპუტატებმა უთხრა უარი. ეს იმას ნიშნავდა, რომ მან მიაღწია მისთვის სასურველ შედეგს, უკვე იცოდა წინასწარ ამის შესახებ, რომ ის ნამდვილად დამტკიცდებოდა", _ ამბობს ქალაქ ოზურგეთის საკრებულოს დამოუკიდებელი დეპუტატი ლევან მგელაძე,
მისივე თქმით, ასეთი საკითხები კიდევ ბევრი იქნება, რაც წინასწარ დაგეგმილია და აუცილებლად უნდა განხორციელდეს.
რაც შეეხება, ჩვენს მიერ დასმულ შეკითხვას – არსებობს თუ არა კონკრეტული ფაქტები, იმასთან დაკავშირებით, თუ კონკრეტულად რომელ საკრებულოს დეპუტატებზე განხორციელდა ზეწოლა, მგელაძემ გვიპასუხა, რომ ამაში დარწმუნებულია, რადგან ზეწოლის ფაქტები 2 მარტს გამართულ საკრებულოს სხდომაზე თვალნათლივ გამოჩნდა.
"გურია ნიუსმა" კომენტარისთვის მიმართა "საქართველოს გზის" წარმომადგენელს, ოზურგეთის დეპუტატს ნინო ტაბატაძეს, რომელმაც რამდენიმე დღის წინ საკრებულოს სხდომაზე აღნიშნულ საკითხს ხმა არ მისცა და ქალაქ ოზურგეთის მერის ინიციატივას უარი უთხრა.
თუმცა, 2 მარტს იგივე საკითხს მხარი უპირობოდ დაუჭირა. აღსანიშნავია, რომ ნინო ტაბატაძის ძმა ვანიკო ტაბატაძე არჩევნებზე "ქალაქის მერის პოსტზე იყრიდა კენჭს სალომე ზურაბიშვილის "საქართველოს გზის" პარტიიდან. დღეს აღნიშნული პიროვნება ქალაქ ფოთში ერთერთ თანამდებობაზე დასაქმებული, ნინო ტაბატაძე კი საკრებულოში თანამდებობის პირს წარმოადგენს, ის ერთერთ კომისიას ხელმძღვანელობს.
ჩვენ კითხვაზე, თუ რა შეიცვალა ერთი კვირის განმავლობაში და რა გახდა საკრებულოს დეპუტატის მიერ რამდენიმე დღეში შეცვლილი გადაწყვეტილების მიზეზი, ნინო ტაბატაძე გვპასუხობს:
"მაშინ იმიტომ არ დავუჭირე მხარი, რომ გაურკვეველი იყო ყველაფერი, არ ვიცოდით პიროვნებები ვინ იყო, ვისზეც უნდა გასხვისებულიყო მიწის ნაკვეთები, დღეს ისაუბრა ბატონმა ბეგიმ ამის შესახებ, თუ კი ოზურგეთისთვის გააკეთებდა ყველაფერი ისე, რაც მოსახლეობისთვის იქნება მისაღები და კარგი, მე ყველაფერზე დავუჭერ მხარს მერს, მაგრამ გაურკვეველ სიტუაციაში ამას ვერ გავაკეთებდი, დღეს გავერკვიე და თუ ეს ყველაფერი ისე გაკეთდება, რაც ჩადებულია ამ საქმეში, მე უარს არ ვეტყვი ამ ინიციატიავას", _ ამბობს ტაბატაძე.
რაც შეეხება, იმას განხორციელდა თუ არა ზეწოლა მასზე და მისი ოჯახის წევრებზე, ტაბატაძე კატეგორიულად უარყოფს.
"მე ვარ პიროვნება, რომელზეც ვერანაირ ზეწოლას ვერ განახორცილებს ვერავინ" – გვითხრა საკრებულოს დეპუტატმა.
