"მეჩაიეობის რეაბილიტაციის შესახებ" პროექტი, შესაძლოა, დაგვიანებით ამოქმედდეს. ამის შესახებ გავრცელებულ ინფორმაციას ნაწილობრივ ოზურგეთის მუნიციპალიტეტის გამგეობის ეკონომიკისა და სოფლის მეურნეობის სამსახურის უფროსი გიგა ხარაბაძეც ადასტურებს.
მისი ინფორმაციით, პროექტზე მუშაობა ისევ მიმდინარეობს, თუმცა, შესაძლოა, ინვესტორებმა მეწარმეებს სხვა პირობები შესთავაზონ.
როგორც ხარაბაძე აცხადებს, სოფლის მეურნეობის სამინისტრო პროექტის განხორციელებით ისევ დაინტერესებულია.
ცნობისთვის, "გურია ნიუსი" გასული წლის ბოლოს წერდა, რომ ოზურგეთის მუნიციპალიტეტის მიერ, სოფლის მეურნეობის სამინისტროს წარედგინა პროექტი "მეჩაიეობის რეაბილიტაციის შესახებ".
მაშინ დამაიმედებლად საუბრობდა ოზურგეთის მუნიციპალიტეტის გამგეობის ეკონომიკისა და სოფლის მეურნეობის სამსახურის უფროსი გიგა ხარაბაძე, რაც საფუძველს მოკლებული არ უნდა ყოფილიყო, რადგან აღნიშნული საკითხის ირგვლივ დასმულ კითხვას, თბილისში, ჟურნალისტებთან ერთ-ერთ შეხვედრაზე, დადებითად უპასუხა სოფლის მეურნეობის მინისტრმა ოთარ დანელიამ.
სამწლიანი პროექტის მიხედვით, რომელიც კოოპერატივების საფუძველზე უნდა ჩამოყალიბებულიყო და ჩაის სარეაბილიტაციოდ ასპროცენტიანი ინვესტიცია გაიცემოდა , რამაც ხალხში დიდი სიხარული გამოიწვია. თუმცა, ახლა შესაძლოა, დაფინანსების პირობები ინვესტორებმა შეცვალონ.
"იანვრიდან, დიდი ალბათობით, ეს პროექტი ძალაში შევა… პროექტი ითვალისწინებს ჩაის ფართობის შემოღობვას, მძიმე გასხვლას, დაბარვას, სასუქის შეტანას. გლეხს დაეხმარებიან არა ნახევრად, არამედ სრულად და გარანტირებულად,"_ აცხადებდა გიგა ხარაბაძე.
დღეისათვის კი, როცა ხალხი ამ პროექტის გახორციელებას ელოდა, გავრცელდა ინფორმაცია, რომ აღნიშნული პროექტი წელს შეჩერებულია. "გურია ნიუსმა" აღნიშნული ინფორმაცია გიგა ხარაბაძესთან გადაამოწმა:
"ჩაის რეაბილიტაციასთან დაკავშირებით, ოზურგეთის მუნიციპალიტეტის გამგებელი, მერაბ ჭანუყვაძე ახლახან ანასეულში მყოფ სოფლის მეურნეობის მინისტრს, ოთარ დანელიას ესაუბრა. ჩვენ ძალიან მოწადინებული ვართ, ეს პროექტი გახორციელდეს. მინისტრმა მხარი დაგვიჭირა და თქვა, რომ პროექტი განხილვის პროცესშია. მერაბ ჭანუყვაძე ძალიან ცდილობს, რომ ეს პროექტი გახორციელდეს", _ აცხადებს ხარაბაძე.
რაც შეეხება დაპირებებს სრულ დაფინანსებაზე, რაც მეჩაიეობის რეაბილიტაციასთან დაკავშირებით რამდენიმე თვის ინ გავრცელდა, ხარაბაძე ამბობს, რომ პროექტი განხორციელდება, თუმცა, შესაძლოა, ინვესტორებმა სხვა პირობები დააყენონ.
"გიმეორებთ, ეს პროექტი განხილვის პროცესშია. დიდი იმედი გვაქვს, რომ დადებითად გადაწყდება. ჩაის სარეაბილიტაციო სამუშაოების შესრულება არ არის გვიან. ახლა არის საუბარი კერძო ინვესტიციებზეც, თუმცა ინვესტორს სხვა პირობები ექნება, ალბათ. ჩვენ ყველანაირად ვცდილობთ და სამინისტროც მოწადინებულია, ეს პროექტი გახორციელდეს", _ აცხადებს ხარაბაძე.
რამდენად ენდობა მოსახლეობა კიდევ ერთ დაპირებას, ამას უახლოესი მომავალი გვიჩვენებს. სამუშაოები უკვე დაწყებული უნდა იყოს, თუმცა მოსახლეობა შეპირებული ინვესტიციის განხორციელებას ისევ ელოდება.
არაერთმა გლეხმა კი, ამ მოლოდინის გაჭიანურების გამო, ჩაის გაველურებული ფართობები გადაწვა. როგორც ისინი ამბობენ, ამ ფართობებზე თხილის გაშენება ურჩევნიათ.
