ხვალ, 8 მარტს “ქალთა მოძრაობის“ ორგანიზატორობით, ოზურგეთში ქალთა უფლებების დასაცავად მსვლელობა იგეგმება. მსვლელობის ორგანიზატორის, ქეთევან ხიდაშელის თქმით, აქცია 15:30 წუთზე ოზურგეთის რკინიგზის სადგურიდან დაიწყება და თეატრალურ მოედანზე დასრულდება.
"მშვიდობიანი მსვლელობა 24 ქალაქში 15:00 საათზე იწყება, მაგრამ ოზურგეთი გამონაკლისი იქნება, რადგან ქალაქში რამდენიმე ღონისძიება არის დაგეგმილი. აქედან გამომდინარე 15:30 წუთზე შეეძლებათ ნებისმიერ ადამიანს მსვლელობაში მიიღოს მონაწილეობა და კიდევ ერთხელ დაუჭირონ მხარი ქალებს“. – გვითხრა ქეთევან ხიდაშელმა.
"ჩვენ ვართ საქართველოს მოსახლეობის 53%, მაგრამ პარლამენტში 12%-ით ვართ წარმოდგენილი. 59 გამგებლიდან მხოლოდ ორია ქალი.
ქვეყნის არცერთი მერი და არცერთი გუბერნატორი ქალი არ არის. დღეს საქართველოში ქალის ხმა არ ისმის.
25 წელია ქვეყანამ აღიდგინა დამოუკიდებლობა, მაგრამ ქალთა პოლიტიკური მონაწილეობის კუთხით პროგრესისთვის არ მიგვიღწევია. ჩვენი უფლებები უწინდებურად ირღვევა.
2014 წლის ქალთამკვლელობებმა გვიჩვენა, რომ საქართველოში ჩვენი სიცოცხლის უფლებაც კი არ არის დაცული.
დღეს ქართულ პოლიტიკას აკლია ქალების ხედვა, გამოცდილება და უნარები. პოლიტიკის სფეროში ქალების სიმბოლური, მცირე რაოდენობა, არ გვაძლევს საშუალებას სრულად გამოვავლინოთ და გამოვიყენოთ ჩვენი პოტენციალი.
საზოგადოების და კაცობრიობის განვითარების პროცესში ჩვენი უნიკალური წვლილი დაკნინებული ან სრულიად დაკარგულია.
ქალები იმ საკითხების გადაწყვეტაშიც კი ვერ მონაწილეობენ, რომელიც უშუალოდ და მხოლოდ მათ ეხებათ.
პარლამენტი არ უზრუნველყოფს ქალების წარმომადგენლობას და შესაბამისად არ იცავს მათ ინტერესებს. საქართველოში არ გვაქვს წარმომადგენლობითი დემოკრატია.
ჩვენ, ქალები, უგულებელყოფილნი ვართ პოლიტიკურ ცხოვრებაში და ამას აღარ შევეგუებით" – ნათქვამია, ქალთა გაერთიანების მიერ გავრცელებულ განცხადებაში.
