28 ნოემბერს, პოლიტიკური პარტია “თავისუფალი საქართველოს” ლიდერი კახა კუკავა ოზურგეთს სტუმრობდა. იგი პარტიის ოფისში აქტივს შეხვდა და ძირითადად, წარსულში გაყალბებულ არჩევნებსა და მომავალში შეცდომებზე სწავლის აუცილებლობაზე ისაუბრა. ოფისში საქართველოს საკმაოდ ფართომასშტაბიანი რუკა გამოაკრეს, რომელზეც მონიშნული იყო საქართველოს საარჩევნო ოლქები და უბნები. საუბრის ძირითადი თემა სანდო ადამიანის მონახვა იყო, რომელიც შეძლებს საარჩევნო უბანზე რეალურად მიღებული ხმების დაცვას და საოლქო კომისიამდე მიტანას.
_ თითო უბანზე თითო პატიოსანი ადამიანი მაინც უნდა მოიძებნოს, რომელიც არ გაიყიდება და იმდენივე ხმას გამოვიტანთ უბნიდან, რამდენიც რეალურად მივიღეთ. არჩევნებზე უნდა მოხდეს არჩევნებში მონაწილე მომხრეთა მობილიზაცია. აი, ეს არის ჩვენი პროგრამის პრეზენტაციის მიზანი, რომელსაც ოზურგეთიდან ვიწყებთ, _ თქვა კუკავამ და დასძინა, რომ არჩევნებისთვის მზადება დღესვე უნდა დავიწყოთ არა ორი თვით ადრე.
“გურია ნიუსი” ამ პრეზენტაციას ესწრებოდა და პარტიის ხელმძღვანელს რამდენიმე კითხვით მიმართა.
_ ბატონო კახა, ხელისუფლების მსგავსად, კარგა ხანია, ხალხს ოპოზიციისაც არ სჯერა. ივანიშვილის გამოჩენამ ძალთა ბალანსი შეცვალა და იმედის მთელი ტვირთი ხალხმა მას აჰკიდა. თქვენ რას ფიქრობთ?
_ ივანიშვილის საწინააღმდეგო არაფერი გვაქვს, ოღონდ, პოზიცია _ “ყველას მინუს ერთი”, ჩემთვის მიუღებელია, რადგან ასე მოდიოდა გაჩეჩილაძე და ცოტა ხნის წინ იგივეს ამბობდა ალასანია. რა მოჰყვა მერე ამას, ყველამ დაინახა. თუ ივანიშვილის პრივატიზება მოახდინეს მხოლოდ “რესპუბლიკელებმა”, არ მგონია, ამას ძალიან კარგი შედეგი მოჰყვეს. თუმცა ეს თვითონ ბატონი ბიძინას გადასაწყვეტია. ივანიშვილს აქვს შანსი, თუ მოინდომებს, საქართველოს მოსახლეობის 50% თავისი პარტიის წევრი გახადოს. საერთო ერთობა უნდა შედგეს, არავინ არ უნდა გაირიყოს და არა ისე, რომ თვითონ ერთს ამბობდეს და რესპუბლიკელები სხვას გაიძახოდნენ.
_ სად გააკეთეს რესპუბლიკელებმა განსხვავებული განცხადება?
_ ეს არაერთხელ მომხდარა. მაგალითად, გამოვა ბიძინა ივანიშვილი და იტყვის, არც ერთი ქართველი დასაკარგი არ მყავსო; მერე გამოვა ხიდაშელი და დაიწყებს _ ეს არ გვინდა, ის არ გვინდაო. საერთო ერთობა უნდა შედგეს და ამ შემთხვევაში დადგება გამარჯვება.
_ პირადად თუ შეხვედრიხართ ბიძინა ივანიშვილს?
_ არა, ჯერჯერობით. ისე, სოლოლაკისკენ რომ წახვალ, იქ დიდი რიგი დგას. ჩვენ არ ვდგავართ ამ რიგში. არაფერს არ გამოვრიცხავ, ის ძალიან გონიერი ადამიანია, ბევრი კარგი მრჩეველი ჰყავს, მაგრამ არიან ისეთებიც, რომლებიც თავგზას ურევენ. რატომ უჩენენ მტრებს, ეს ნამდვილად არ ვიცი.
_ “საერთო ერთობა” ახსენეთ. ჩვენი რესპონდენტების დიდ ნაწილსაც ეს სურს; ზოგი რევანშის მომხრეა, ზოგიც ხელისუფლების ცვლილებას რევანშის გარეშე. ითხოვს…
_ რევანშისტული ნამდვილად არ უნდა იყოს ახალი ხელისუფლება. თუმცა ვიტყვი, რომ უნდა შეიქმნას სამართლიანი სასამართლო, მკვლელს, დამნაშავეს თავისი სამართლიანად უნდა მიეზღოს. გუნდი უნდა შეიცვალოს მთლიანად და გაბაშვილების, რურუების თუ კოდუების, ახლა რომ ურცხვად გამოდიან და სააკაშვილის ხელისუფლების მიმართ “გაგრილებულ” პოზიციაზე მიანიშნებენ, არავინ უნდა დაიჯეროს; უნდა გამოცხადდეს “სანიტარული ხუთი წელი” მათ მიმართ, ვინც ხელისუფლებაში იყო და ამ დროით მაინც, სიახლოვეს არ გაეკარონ ხელისუფლებას. თორემ თუ ახლა მათ “ქართული ოცნება” დაირქვეს, არც ჩვენთვის და არც თქვენთვის არაფერი შეიცვლება. ვიმეორებ, მათ რიცხვში არ ვგულისხმობ სერიოზულ დამნაშავეებს _ ისინი უნდა დასაჯოს სამართლიანმა სასამართლომ!