“სახელისუფლებო გუნდი მთლიანად უნდა შეიცვალოს”

(გურია ნიუსი, ლანჩხუთი) _ ლანჩხუთში პარტია “თავისუფალი საქართველოს” ადგილობრივი ოფისის პრეზენტაცია გაიმართა. ლანჩხუთის ოფისი ხელმძღვანელმა მაკა კვირკველიამ სტუმრებს ჯერ ოფისში უმასპინძლა, შემდეგ კი ყოფილი სასტუმროს შენობის დიდ დარბაზში ხალხისა და პარტიის ლიდერის კახა კუკავას შეხვედრა გაიმართა. უამინდობის მიუხედავად, ოპოზიციონერ ლიდერს 80-ზე მეტი ადამიანი შეხვდა. კახა კუკავამ ძირითადი აქცენტი სიღარიბეზე, უმუშევრობაზე, სოფლის მეურნეობაზე, დაკარგულ ტერიტორიებზე რა თქმა უნდა მოახლოებულ საპარლამენტო არჩევნებზე გააკეთა.

მან ბიძინა ივანიშვილის პოლიტიკაში გამოჩენა “მიწისძვრას” შეადარა და ხელისუფლების ბოლოდროინდელი ლოიალური რიტორიკაც კონკურენციის გაჩენას დაუკავშირა.

_ “ნაციონალების” მმართველობამ გაანადგურა ჩვენი ქვეყნის ეკონომიკა. ეს უნდა დასრულდეს 2012 წლის საპარლამენტო არჩევნების გზით. მახსოვს, 2003 წელს, როდესაც ლანჩხუთში ვიყავი, ვამბობდით, ოღონდ შევარდნაძე წავიდეს და ამაზე უარესი რა უნდა იყოსო. მაგრამ ეს შეცდომა იყო, ის წავიდა, მაგრამ უარესი მოვიდა… არა მარტო გვარები, არამედ ის კურსი უნდა შეიცვალოს, რასაც მმართველი პარტია ატარებს. მაჭავარიანს, გაბაშვილს, ბარამიძეს კომუნისტების დროს “კომუნისტები” ერქვათ, შევარდნაძის დროს _ “მოქალაქეთა კავშირი”, ახლა კი “ნაციონალები” ჰქვიათ. ვფიქრობთ, რომ მთლიანად უნდა შეიცვალოს ეს სახელისუფლებო გუნდი, _ აღნიშნა კუკავამ.

მანვე განაცხადა, რომ დღეს საქართველოს ტერიტორია ოკუპირებულია არა მხოლოდ რუსეთის მიერ; მისი თქმით, საქართველო ორ დამპყრობელს შორისაა, აფხაზეთი და ცხინვალის რეგიონი რუსებს აქვთ დაპყრობილი, თბილისი და დანარჩენი საქართველო _ ამერიკის ზეგავლენის ქვეშაა.

საქართველომ უნდა მოიცილოს ერთი ჩექმაც და მეორესიც; ქვეყანა უნდა იმართებოდეს ქართველი ერის ინტერესებიდან გამომდინარე _ როგორიც სჭირდება მუშას, ინტელიგენტს და გლეხს და არა ისე, როგორი რეკომენდაციებიც მოგვივა უცხო ქვეყნის დედაქალაქებიდან. ჩვენ უნდა ავირჩიოთ, ან შევალთ ნატოში ან აფხაზეთში, ორივე ერთად გამორიცხულია. აშშ რომ ჩვენს გამო ომს არ დაიწყებს რუსეთთან, 2008 წლის აგვისტოში კარგად დავინახეთ, როდესაც გამოგვიგზავნეს დახმარება _ გამოხდილი წყალი და პამპერსები. ჩვენ გვინდა ერთიანი და თავისუფალი საქართველო, ეს შეიძლება მხოლოდ იმ პირობებში მოხდეს, როცა ჩვენი ქვეყნის ტერიტორიაზე არ იქნება არც რუსეთის და არც ნატოს ბაზები. დღეს გვაქვს მოლაპარაკებების დაწყების შანსი. საქართველოს პატრიარქი, ილია მეორე იმყოფებოდა რუსეთში. მან თავის თავზე აიღო დიპლომატიური ფუნქცია ამ ორ ქვეყანას შორის. ეს არ არის მისი პირდაპირი მოვალეობა, მაგრამ როცა ხედავს ხელისუფალი არაფერს აკეთებს, მან საკუთარზე თავზე აიღო ამხელა პასუხისმგებლობა. თქვენ ხედავდით, რა პროპაგანდა გაუწია ამ ფაქტს ქართულმა სამთავრობო ტელევიზიებმა. 2012 წლის საპარლამენტო არჩევნების შედეგად ქვეყანაში უნდა მოვიდნენ ეროვნული ძალები, რომლებიც იქნებიან რუსეთისა და ვაშინტონისგან დამოუკიდებელნი. დღეიდან ვემზადებით _ საქართველოში 3600 უბანია და ჩვენ ვიმუშავებთ ყველა უბანზე იმისთვის, რომ არ გვყავდეს ისეთი ადამიანები, რომლებიც 20-30 ლარად გაყიდიან ოქმს! _ დასძინა კახა კუკავამ.