(გურია ნიუსი, ლანჩხუთი) _ ლანჩხუთის მუნიციპალიტეტში 2012 წლის ბიუჯეტის პროექტის საჯარო განხილვა მოეწყო, რომელსაც ესწრებოდნენ საკრებულოს თავმჯდომარე რევაზ ჩიტიძე, საკრებულოს თავმჯდომარის მოადგილე ზვიად აფხაზავა, გამგებელი გიორგი გოგუაძე, ადგილობრივი ხელისუფლების, ორგანიზაციებისა და საზოგადოების წარმომადგენლები. მომავალი წლის ბიუჯეტის პროექტი დამსწრეთ საფინანსო სამსახურის უფროსმა როლანდ ლაშხიამ გააცნო. მან საკმაოდ ვრცლად ისაუბრა საპროგნოზო შემოსავლებზე და აღნიშნა, რომ რიგ სფეროებში შეინიშნება შემოსავლების მატება. 2011 წლის დამტკიცებულ ბიუჯეტთან მიმართებაში 2012 წლის ბიუჯეტი იზრდება 473 100 ლარით.
მისივე თქმით, 2012 წლის ბიუჯეტის მთავარი პრიორიტეტები სკოლამდელი დაწესებულებები, სოციალური პროგრამები და ჯანდაცვა, სოც-კულტურული ღონისძიებები, შიდა გზებისა და ხიდების შეკეთება, წყალმომარაგება, გარე განათების მოწყობა, მრავალბინიანი სახლების რეაბილიტაცია იქნება.
შესყიდვების სამსახურის უფროსმა მაია აფხაზავამ შესყიდვების გეგმა წარმოადგინა. სოციალური სამსახურის უფროსის, მაკა გოგიჩაიშვილის ინფორმაციით, 2012 წელს იმუშავებს 18 სოციალური პროგრამა, რომელთაგანაც რამდენიმე პირველად ამოქმედდება. მაგალითად, შეჭირვებულ ოჯახთა 3-დან 18 წლამდე ასაკის ბავშვების სამედიცინო თანადაფინანსების, ბავშვთა სარეაბილიტაციო ცენტრ “იავნანას” თანადაფინანსების, ბიკარბონატული ჰემოდიალეზით _ თირკმლების ქრონიკული უკმარისობით დაავადებულთა სამედიცინო დახმარების პროგრამები.
მომავალი წლისთვის სოციალური პროგრამების დასაფინანსებლად პროექტით, 390 900 ლარია გათვალისწინებული. თანხა 1242 ბენეფიციარზეა გათვლილი, თუმცა საინტერესოა, რამდენს დახარჯავს ბიუჯეტი ჩინოვნიკების შესანახად და როგორია ამ მაჩვენებლის სოციალურ ხარჯებთან შეფარდება!
სოც-კულტურული ღონისძიებების პროგრამების პროექტებზე კულტურის, სპორტისა და ახალგაზრდულ საქმეთა სამსახურის უფროსმა, ირმა მგელაძემ ისაუბრა. საკრებულოს თავმჯდომარის, რევაზ ჩიტიძის თქმით, მომავალი წლის ბიუჯეტის არც ერთ სეგმენტში კლება არ შეინიშნება, შემოსავლების მატება კი მოსალოდნელია, რაც ყველა პროექტის გახორციელების საშუალებას იძლევა. ბიუჯეტის პროექტში არ არის გათვალისწინებული ინფრასტრუქტურისა და სოფლის პროგრამის თანხები, რაც ასახვას ჰპოვებს მომავალი წლის პირველ კვარტალში. როგორც შეხვედრაზე აღინიშნა, “ინფრასტრუქტურული პროექტები გაცილებით მეტი და მრავალფეროვანი იქნება, ვიდრე გასულ წლებში იყო”. ეს მოსალოდნელიცაა _ მომავალ წელს ხომ საპარლამენტო არჩევნები გველოდება!
