დღეს, 16 მარტს საყდრისის გადარჩენის საზოგადოებრივმა კომიტეტმა საქართველოს პარლამენტის თავმჯდომარე დავით უსუფაშვილს სპეციალური განცხადებით მიმართა და ქუთაისში, პარლამენტის შენობაში საყდრისის მაღაროსთან დაკავშირებული გამოფენა-პრეზენტაციის გამართვა მოითხოვა.
კომიტეტის წევრების თქმით, ამ განცხადებას წინ უძღოდა ერთკვირიანი მოლაპარაკება პარლამენტის აპარატთან და მოთხოვნილ დროს გამოფენის გამართვაზე უარი.
"9 მარტს "საყდრისის გადარჩენის საზოგადოებრივმა კომიტეტმა" განცხადება ( წერილი N 5240 ) შეიტანა პარლამენტის აპარატის უფროსის ზურაბ მარაქველიძის სახელზე, რათა უფლება მოეცა, ქუთაისის პარლამენტის შენობაში ჩაგვეტარებინა გამოფენა "საყდრისის დღე პარლამენტში".
წერილში მითითებული არ გვქონდა თარიღი, მაგრამ ვაფიქსირებდით, რომ ღონისძიება სესიაზე საყდრისის საკითხის განხილვის დღეს უნდა დამთხვეოდა. ამის შემდეგ არაერთი სატელეფონო საუბარი გვქონდა პარლამენტის აპარატის თანამშრომელთან, რომელიც ითხოვდა დაზუსტებას , თუ რა სახის გამოფენა იგეგმებოდა. დეტალური ინფორმაციის მისაწოდებლად 12 მარტს აპარატის საზოგადოებასთან ურთიერთობის სამსახურის უფროს ნინო ბერაძეს შევხვდით და განვუმარტეთ, რომ სასურველი იყო გამოფენა 18-20 მარტს ჩაგვეტარებინა.
მეორე დღეს, პარასკევს ტელეფონით დაგვიკავშირდა კვლავ აპარატის თანამშრომელი, რომელმაც გვთხოვა, რომ ხელახალა შეგვეტანა წერილი ბატონ მარაქველიძის სახელზე, მიგვეთითებინა თარიღად 19-20 მარტი და აგრეთვე მიგვეწოდებინა საგამოფენო ფოტომასალა. მოთხოვნა შევასრულეთ ( წერილი N 5737 ) , მაგრამ შაბათს უარით დაგვირეკეს. მიზეზად დაასახელეს პრეზიდენტის სტუმრობა პარლამენტში და შემოგვთავაზეს 1-3 აპრილი. ჩვენ მოვითხოვეთ წერილობითი უარი, რაზედაც გვიპასუხეს, რომ ზეპირი განმარტებაც საკმარისი იყო", _ ამბობს "გურია ნიუსთან" საყდრისის გადარჩენის საზოგადოებრივი კომიტეტის წევრი ანა მიქაუტაძე.
როგორც კომიტეტში აცხადებენ გამოფენის გამართვა საყდრისის საკითხის განხილვამდე დეპუტატების ინფორმირებულობას ისახავდა მიზნად.
"ბატონო დავით, სამწუხაროა, რომ უმრავლესობის დეპუტატებს არ ეძლევათ საშუალება, გადაწყვეტილების მიღებამდე საყდრისის უნიკალური კულტურული მემკვიდრეობის შესახებ ამომწურავი ინფორმაცია მიიღონ. ისინი გამოფენის მოწყობის იდეას დიდი ყურადღებით მოეკიდნენ და არქეოლოგებთან შეხვედრითაც დაინტერესდნენ. საყდრისის საკითხის პოლიტიზირება ჩვენს ინტერესში არ შედის და ეს არც თავად საყდრისს წაადგება.
გთხოვთ, დაგვრთოთ ნება, ქუთაისის პარლამენტის ფოიეში, 18-20 მარტს მოვაწყოთ საინფორმაციო ხასიათის გამოფენა და საშუალება მიეცეთ არქეოლოგებს, წარსდგნენ დეპუტატების წინაშე მცირე პრეზენტაციით, რათა ღილაკზე ავტომატური თითის დაჭერით საქართველოს პარლამენტის წევრები არ გახდნენ მსოფლიო მნიშვნელობის მაღაროს მგრეველები", _ ნათქვამია განცხადებაში, რომლითაც საყდრისის კომიტეტმა დავით უსუფაშვილს მიმართა.
