მარტვილის მუნიციპალიტეტის გამგეობაში, ორ თვეში – 2014 წლის დეკემბერსა და 2015 წლის იანვარში, ჯამში, პრემიის სახით 83 075 ლარი გაიცა.
უფრო კონკრეტულად კი, საჯარო მოხელეებისა და მათზე გაცემული პრემიების შესახებ ინფორმაცია, რომელიც "გურია ნიუსმა" მოიპოვა, ასე გამოიყურება:
მარტვილის მუნიციპალიტეტის გამგებელმა ალექსანდრე გრიგალავამ, რომელიც აღნიშნულ პოზიციაზე მუშაობას 2014 წლის 15 ივნისში, თვითმმართველობის არჩევნების შემდეგ შეუდგა და რომლის ყოველთვიური ანაზღაურებაც 2 650 ლარს შეადგენს, 2014 წლის დეკემბერში, პრემიის სახით 2 650 ლარი მიიღო, ისევე როგორც 2015 წლის იანვარში. ანუ, ჯამში, 6 თვიანი მუშაობის შემდეგ, გამგებელმა 2 თვეში, პრემიის სახით 5 300 ლარი აიღო. 2 თვეში მისმა შემოსავალმა კი 10 600 ლარი შეადგინა.
გამგებლის პირველმა მოადგილე გიორგი გოროზიამ, რომლის ყოველთვიური ანაზღაურებაც 1 300 ლარია, 2014 წლის დეკემბერსა და 2015 წლის იანვარში, პრემიის სახით 1 300- 1 300 ლარი აიღო. ჯამში, 2 თვის განმავლობაში მასზე პრემიის სახით 2 600 ლარი გაიცა. მისმა შემოსავალმა კი დეკემბერ-იანვარშ 5 200 ლარი შეადგინა.
ამავე ოდენობის, 1 300 ლარიანი პრემია გაიცა გამგებლის მოადგილე დავით სილაგავაზე, რომლის თანამდებობრივი სარგოც 1 300 ლარია. სილაგავაზე გაცემულმა პრემიერამ 2 თვის განმავლობაში 2600 ლარი შეადგინა, ხოლო მისმა შემოსავალმა ამ ორ თვეში 5 200 ლარი შეადგინა.
რაც შეეხება მარტვილის მუნიციპალიტეტის გამგეობის 7 განყოფილების უფროსზე გაცემულ პრემიას, რომელთა ყოველთვიური ანაზღაურებაც 810 ლარია, 2014 წლის დეკემბერში მათზე პრემიის სახით 810 ლარი გაიცა.
2015 წლის იანვარში მათზე გაცემული პრემიები განსხვავებულია – 4 მათგანზე, ადამიანური რესურსების მართვისა და საქმისწარმოების განყოფილების უფროსმა თამარ წივწივაძემ, შესყიდვების განყოფილების უფროსმა ჯანჯღავა ელენემ, ასევე განყოფილებების უფროსებმა ქეთევან ბაჩილავამ და ვარლამ ბახტაძემ ისევ 810 ლარი მიიღეს. 2-მა განყოფილების უფროსმა 567 ლარი, ხოლო ერთმა 405 ლარი.
ჯამში მუნიციპალიტეტის გამგეობის განყოფილებების 7 უფროსზე, პრემიის სახით 10 449 ლარი გაიცა.
24 მთავარი სპეციალისტიდან, რომელთა თანამდებობრივი სარგო 560 ლარს შეადგენს, 22-მა 2014 წლის დეკემბერში, პრემიის სახით 560 ლარი აიღო, ხოლო ერთმა მათგანმა – კულტურის, განათლების, სპორტის, ტურიზმის, ძეგლთა დაცვისა და ახალგაზრდობის საქმეთა სამსახურის მთავარმა სპეციალისტმა, მარინე თოფურიამ, 810 ლარი.
რაც შეეხება 2015 წლის იანვარს, აქ პრემიები განსხვავებულია. 12-მა მათგანმა 392 ლარი მიიღო, ორმა 336, 2-მა 560, რვამ კი 280 ლარი.
ჯამში, მთავარ სპეციალისტებზე პრემიის სახით 22 426 ლარი გაიცა.
მუნიციპალიტეტის გამგეობის 8 სამსახურის უფროსზე, რომელთა ყოველთვიური ანაზღაურებაც 1 000 ლარს შეადგენს, 2014 წლის დეკემბერშიც და 2015 წლის იანვარშიც პრემიის სახით 1 000 – 1 000 ლარი გაიცა. ანუ, ჯამში, პრემიის სახით სამსახურის უფროსებზე 16 000 ლარი გაიცა.
20 გამგებლის წარმომადგენელზე, რომელთა თანამდებობრივი სარგო 790 ლარია, 2014 წლის დეკემბერში, პრემიის სახით თითოზე 790 ლარი გაიცა, ხოლო 2015 წლის იანვარში 395 ლარი.
ჯამში, 2 თვეში, მარტვილის მუნიციპალიტეტის გამგებლის წარმომადგენლებზე პრემიის სახით 23 700 ლარი გაიცა.
ამავე თემაზე: 57 345 ლარი – 2 თვეში 28 თანამშრომელზე გაცემული პრემია
