პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ, ეკა ბესელიამ XVIII საუკუნის უნიკალური ხელნაწერი დღეს ხელნაწერთა ეროვნულ ცენტრს გადასცა.
XVIII საუკუნის ხელნაწერის საჩუქრად გადაცემა ილია აბულაძის სახელობის საგამოფენო დარბაზში გაიმართა.
"წიგნი გამორჩეულია თავისი მნიშვნელობით. ტექსტი შესრულებულია მხედრულით და იწყება "მამაო ჩვენოს" განმარტებით, რასაც მოჰყვება "საქრისტიანო მოძღვრება", შემდეგ კი, "წმინდა ჟამისწირვა". ხელნაწერში ასევე მოცემულია ინფორმაცია ნიკეის პირველი მსოფლიო საეკლესიო კრების შესახებ და სრულდება საეკლესიო კალენდრით", _ აღნიშნა ჟურნალისტებთან საუბრისას ეკა ბესელიამ.
მან ეროვნული ცენტრის წარმომადგენლებს მადლობა გადაუხადა, რომ მიეცა საშუალება ქართული ისტორიული ხელნაწერი ძეგლების მოძიება-გადარჩენის პროცესში საკუთარი წვლილი შეეტანა.
ეს უნიკალური ხელნაწერი ეკა ბესელიამ კერძო პირისგან შეიძინა. არსებული ინფორმაციით, წიგნის გაყიდვას და უცხოეთში გატანას აპირებდნენ.
უნიკალური ხელნაწერის გადაცემის შემდეგ ცენტრის ხელმძღვანელმა სტუმრებს ხელნაწერთა საცავები დაათვალიერებინა და ის უნიკალური ექსპონატები აჩვენა, რომელიც სპეციალურად განკუთვნილ სივრცეებში ინახება.
ხელნაწერთა ეროვნულ ცენტრში დაცულია V-XIX საუკუნეების 10.000-მდე ქართული (მათ შორის 4.000-მდე უმნიშვნელოვანესი პალიმფსესტური ფურცელიც) და 4.000-მდე უცხოური ხელნაწერი.
