ქალაქ ოზურგეთის მუნიციპალიტეტის საკრებულო, 2014 წლის განმავლობაში, 125 ოჯახს დაეხმარა, რომელიც ერთჯერადი იყო და ფინანსურ ხასიათს ატარებდა.
ამის შესახებ საკრებულოს თავმჯდომარე გელა კობალაძემ, უწყების მიერ წარდგენილი ანგარიშისას ისაუბრა.
"2014 წლის ბოლომდე ქალაქ ოზურგეთის მუნიციპალიტეტის საკრებულოში შემოვიდა 115 კორესპოდენცია და 39 განცხადება, რომლებიც განხილული იქნა და მიეცა შესაბამისი მიმართულებები. მიუხედავად დროის სიმცირისა, ახლად შექმნილმა მუნიციპალიტეტმა მოახერხა სოციალური დახმარება გაეწია მოსახლეობისათვის. კერძოდ, ერთჯერადი ფინანსური დახმარება გაეწია 125 მოქალაქეს. გაიცა 7 საგარანტიო წერილი, 100-ზე მეტი წლის ორ მოქალაქეზე ერთჯერადად გაიცა 200 ლარი, ერთ უსინათლო მოქალაქეზე 150 ლარი, თირკმლის უკმარისობით დაავადებულ 19 პირზე ყოველთვიურად თითოეულზე გაიცა 120 ლარი, ვეტერანთა 8 ოჯახზე სარიტუალო მომსახურებისათვის 250 ლარი თითოეულზე, მრავალშვილიან 14 ოჯახზე თვეში 25 ლარი ყოველ ბავშვზე, 18 წლამდე დედ-მამით ობოლ ერთ ბენეფიციარს გაეწია 300 დახმარება 300 ლარის ოდენობით, 30 ოჯახი უზრუნველყოფილი იქნა საშეშე მასალით", _ აღნიშნა კობალაძემ საკრებულოს სხდომაზე, სადაც საუბარი ასევე შეეხო ა(ა)იპ ,,ქალაქ ოზურგეთის მუნიციპალიტეტის ცენტრალური სტადიონი"-ს და ა(ა)იპ "ქალაქ ოზურგეთის მუნიციპალიტეტის საფეხბურთო კლუბი – მერცხალი" -ს, რეორგანიზაციისა და ერთ სუბიექტად ჩამოყალიბებას.
ოზურგეთის მერის განმარტებით, ორი სუბიექტის შერწყმა ხელს შეუწყობს ფეხბურთელებისთვის ხელფასების ზრდას და დონის ამაღლებას. ხოლო, რაც შეეხება პრობლემას, რომელიც სხდომაზე "გაერთიანებული დემოკრატიული მოძრაობის" ერთ-ერთმა ლიდერმა თამარ ნადირაძემ წამოჭრა – რა ბედი ეწევათ ამ სამსახურების შერწყმის შედეგად განთვისუფლებულ ადამიანებს, მერი მიიჩნევს, რომ ამ საკითხს ა.ი.პ.ი.ს დირექტორი გადაწყვეტს.
აქვე დაისვა კითხვა იმასთან დაკავშირებით, თუ რატომ უხდიდა მუნიციპალიტეტი ერთი სტადიონის ორ დირექტორს – მოქმედსა და ორჯერ განთავისულფებულს, რომელიც სასამართლომ ორჯერვე აღდგინა, ხელფასს.
კითხვაზე სიორიძემ უპასუხა, რომ ახალმა დირექტორმა შეძლო შვიდჯერ უფრო მეტი თანხის მოზიდვა სტადიონისათვის და მისი დანიშვნა სწორად გადადგმული ნაბიჯი იყო.
მისივე თქმით, იმ შემთხვევაში თუ კი მურთაზ აბაშიძისადმი მუნიციპალიტეტს კვლავ დაეკისრება ხელფასის გადახდის ვალდებულება, იგი მზადაა საკუთარი ჯიბიდან აანაზღაუროს ბიუჯეტისთვის მიყენებული ზიანი.
იმაზე, რომ ხსენებული გადაწყვეტილებით, ბიუჯეტს ნამდვილად ზიანი მიადგა და ეს აუცილებლად უნდა ანაზღაურდეს, "გურია ნიუსთან" საკრებულოს დეპუტატი თამარ ნადირაძე საუბრობს.
მისი თქმით, ზიანის ასანაზღაურებლად მერს მუნიციპალიტეტის სასარგებლოდ ხელფასი უნდა დაექვითოს.
"ჩემი აზრით, მერის ხელფასის ნაწილის, მუნიციპალიტეტის სასარგებლოდ დაკავება უნდა მოხდეს.
ორი აიპის გაერთიანება ჩვენი ფეხბურთის დონეს ვერ აამაღლებს, რადგანაც აქ არის სისტემური პრობლემები, რომელიც ვერ გადაწყდება მინდვრის მომვლელისათვის საარსებო ხელფასის წართმევითა და ამავე ხელფასის ფეხბურთელისათვის დამატებით.
აქვე გეტყვით, გულწრფელად მჯერა, რომ ეს ყველაფერი იმისთვისაა მოწყობილი რათა მურთაზ აბაშიძე სტადიონზე არ მივიდეს, რაც მერის ავტორიტეტისათვის ძალიან მძიმე დარტყმა იქნება",_აღნიშნავს თამარ ნადირიძე.
