უპატრონო, მაწანწალა ძაღლების პრობლემა მთელს მსოფლიოში აქტუალურია. ამ პრობლემის მოგვარებას ყველა ქვეყანა სხვადასხვა მეთოდით ცდილობს, თუმცა, საქართველო კარგა ხანია ამ პრობლემას ვერ უმკლავდება, მიუხედავად იმისა, რომ ამისთვის ბიუჯეტიდან ყოველ წელს სოლიდური თანხა იხარჯება, თანაც მხოლოდ ძაღლების იზოლაციაზე.
ჩოხატაურის მუნიციპალიტეტის 2015 წლის ბიუჯეტში, დაბის კეთილმოწყობის მუხლში, უმეთვალყუროდ დარჩენილი ცხოველების იზოლაციისთვის გათვალისწინებულია თანხა _ 4 000 ლარი და შესაბამისი ხელშეკრულებაც გაფორმებულია.
თითქმის იგივე რაოდენობის თანხას ინდმეწარმე გიორგი მაღლაფერიძე, ერთ პირთან მოლაპარაკების წესით, წინა წლებშიც იღებდა, თუმცა, ამით არაფერი შეცვლილა _ უპატრონო ძაღლები ჩოხატაურში ისევ მრავლად არიან. მოსახლეობა ამ ფაქტით შეშფოთებულია და დახმარებას ითხოვს:
_ ქუჩაში გავლა დღე-ღამის ნებისმიერ დროს შეუძლებელია. ძაღლების მიერ ადამიანის დაკბენის რამდენი შემთხვევა უნდა დაფიქსირდეს, რომ ხელისუფლებამ ზომები მიიღოს? _ ამბობენ ჩვენთან საუბრისას ჩოხატაურელები. მუნიციპალიტეტის გამგეობის მიერ მაღლაფერიძესთან გაფორმებულ ხელშეკრულებაში გარკვევით წერია _ "მაწანწალა ძაღლების იზოლაცია და დაბის ტერიტორიიდან გაყვანა".
თუმცა, ჩვენს მიერ გადაღებული ფოტოებიდან დასტურდება, რომ მაღლაფერიძე ხელშეკრულების პირობებს არ ასრულებს: _ რაღაც პრობლემები მქონდა და ვერ მოვახერხე, _ ასეთი განმარტება გააკეთა ინდმეწარმე გიორგი მაღლაფერიძემ "გურია ნიუსთან".
ჩოხატაურის მუნიციპალიტეტის გამგეობის პრესსამსახურის ინფორმაციით, მაღლაფერიძეს ინსპექტირების ჯგუფი აკონტროლებს: _ გამკონტროლებელი ინსპექტირების ჯგუფია. ჯგუფის ხელმძღვანელის, ვლადიმერ ლომთათიძის განცხადებით, ხელშეკრულება გაფორმდა თებერვალში _ თვეში ერთჯერ ჩამოდის ინდმეწარმე გიორგი მაღლაფერიძის ჯგუფი, იჭერენ ძაღლებს და მიჰყავთ. გასულ თვეში დაიჭირეს და დაბის ტერიტორიიდან გაიყვანეს 20 ძაღლი, _ მოგვწერეს პრესსამსახურიდან.
ლომთათიძის მიერ გაკონტროლებულ ობიექტებზე ჩვენი გაზეთის მკითხველისთვის ბევრი რამ არის ცნობილი. მათ შორის ისიც, რომ ჩოხატაურის მუნიციპალიტეტის გამგებელი ირაკლი კუჭავა მის შეცვლას აპირებდა და "გურია ნიუსთან" საუბრისას ამბობდა, რომ ამას "გურია ნიუსის" საგაზეთო პუბლიკაციების გამო არ აკეთებდა:
_ პირველ რიგში, შეიცვლება ინსპექტირების ჯგუფის ხელმძღვანელი და გადახალისდება შემადგენლობა. ეს ამ პუბლიკაციამდეც მქონდა გადაწყვეტილი, არა იმიტომ, რომ რაიმე ფაქტი გამაჩნია ამ ადამიანების არაკეთილსინდისიერების შესახებ. მიმაჩნია, რომ მაკონტროლებელი კომისიების შემადგენლობა ხშირად უნდა განახლდეს ადამიანური სისუსტეების გამოსარიცხად, _ ეს განცხადება ირაკლი კუჭავამ 2014 წლის დეკემბრის დასაწყისში, მას შემდეგ გააკეთა, რაც "გურია ნიუსმა" ე.წ "გარემონტებული ბაღების" შესახებ საგამოძიებო ფილმი გააკეთა.
ამ კომენტარიდან თითქმის 4 თვე გავიდა, სამხარაულის ექსპერტიზის ბიუროს დასკვნაც დაიდო, რომელშიც კონკრეტულად არის აღნიშნული ის ხარვეზები, რაც მიღება-ჩაბარების კომისიას "გამორჩა", საქმეზე ძიება ფინანსურმა პოლიციამაც დაიწყო, თუმცა, რეალობა იგივეა _ "ჩვენს პუბლიკაციამდე მიღებული გადაწყვეტილება" ირაკლი კუჭავას ამ დრომდე არ განუხორციელებია _ ვლადიმერ ლომთათიძე ისევ მიღება-ჩაბარების კომისიას ხელმძღვანელობს, სხვა წევრებიც უცვლელები არიან. შესაბამისად, ხარვეზებს კიდევ ვაწყდებით.
როგორც გავარკვიეთ ინსპექტირების ჯგუფს მაღლაფერიძისთვის საყვედურიც კი არ უთქვამს:
_ დამირეკეს და მითხრეს, რომ ძაღლებია დასაჭერი. ხვალ ჩამოვალ (საუბარი ჩაწერილია 17 მარტს. ნ. გ.), _ გვითხრა მაღლაფერიძემ.
ვლადიმერ ლომთათიძე "გურია ნიუსთან" საუბრისას ამბობს, რომ მაღლაფერიძის საქმიანობა კონტროლდება:
_ ვაკონტროლებთ. მოდის გამგეობასთან, ვითვლით, რამდენი ძაღლი ყავს დაჭერილი და იმის მიხედვით ვაძლევთ ფულს, _ გვითხრა ლომთათიძემ, რომლის განმარტებით, მაღლაფერიძეს სასაყვედურო არაფერი აქვს, რადგან ხელშეკრულების პირობებს ასრულებს: _ მან თვეში ერთხელ უნდა დაიჭიროს ძაღლები და ასეც აკეთებს. როცა პრობლემაა _ ვურეკავთ. ახლაც მომრავლდნენ მაწანწალა ძაღლები და დავურეკეთ, რომ ჩამოვიდეს, _ ამბობს ლომთათიძე.
თავის მხრივ, მაღლაფერიძეც ამტკიცებს, რომ ხელშეკრულებით გათვალისწინებულ "ვალდებულებებს ასრულებს, ძაღლებს შიგადაშიგ იჭერს". ინდმეწარმე ამბობს, რომ ამ ყველაფრის მიუხედავად, შეფერხებები მაინც აქვს. შეფერხებაში კი ბრალს იმ არასამთავრობო ორგანიზაციებს დებს, რომლებიც მას ჰუმანურობისკენ მოუწოდებენ და განმარტავს, რომ ცხოველთა იზოლაციასთან დაკავშირებით ექმნება პრობლემები, რადგან შესაბამისი სტანდარტების ცხოველთა თავშესაფარი არ აქვს: _ ვმუშაობთ და ერთ თვეში გვექნება ახალი თავშესაფარი. ეს არასამთავრობოები ყველაფერზე მომდევენ, _ გვითხრა მაღლაფერიძემ.
ცხოველთა დაცვის არასამთავრობო ორგანიზაცია მაღლაფერიძისგან მოითხოვს, აშენდეს თავშესაფარი, სადაც გაკონტროლდება ცხოველების პოპულაცია და ამის ხარჯზე დახოცილი ძაღლების რიცხვი შემცირდეს, ან გაუკეთდეს ძაღლს სტერილიზაცია-კასტრაცია, აიცრას ცოფზე და ისევ დააბრუნონ დაბასა თუ სოფლებში: "მაწანწალა ძაღლების რიცხვის შემცირების ეფექტური გზა არ არის მათი დახოცვა. იმისთვის, რომ ჩვენ ეს პრობლემა გადავჭრათ, პირველ რიგში, უნდა ავაშენოთ უპატრონო ძაღლთა თავშესაფრები, სადაც მათ უმკურნალებენ, ვაქცინაციასა და სტერილიზაციას ჩაუტარებენ, რომ აღარ გამრავლდნენ. ნორმალურ ცივილიზებულ ქვეყნებში ეს ასეცაა, მაგრამ საქართველოში, რაც ხდება, ყველამ კარგად იცის", _ ასეთი ცხოველთა უფლებების დაცვის საკითხებზე მომუშავე არასამთავრობო ორგანიზაციების პოზიცია.
აღსანიშნავია, რომ "ცხოველთა კეთილდღეობის საერთაშორისო სტანდარტების" შექმნას სახელმწიფოს ევროკავშირთან ასოცირების ხელშეკრულებაც ავალდებულებს. ამ მუხლის ამოქმედება 2020 წლისთვისაა ჩანიშნული. მანამდე კი გახსოვდეთ, რომ ქუჩაში მაწანწალა ძაღლები არიან, რომ ამ პრობლემის მოსაგვარებლად ბიუჯეტიდან ფულია გამოყოფილი და რომ არსებობს ინსპექტირების ჯგუფი, რომელსაც ამის გაკონტროლება ევალება, კონტროლი კი იმით შემოიფარგლება, რომ დაჭერილ ძაღლებს "გამგეობის წინ ითვლიან!"
