საქართველოს შინაგან საქმეთა მინისტრის მოადგილის ლევან იზორიას განცხადებით, საპატრულო პოლიციის ხელმძღვანელის, დავით ცინარიძის საქმესთან დაკავშირებით, უწყების გენერალურ ინსპექციას მოკვლევა ჯერ არ დაუსრულებია.
ამის შესახებ იზორიამ "იმედის" გადაცემა "რეაქციაში" პირდაპირ ეთერში ჩართვისას განაცხადა.
როგორც იზორიამ აღნიშნა, მოკვლევის შედეგი საზოგადოებისთვის ცნობილი მისი დასრულებისთანავე გახდება.
"ეს შედეგი ბუნებრივია საჯარო გახდება. განცხადება, რაც შსს-მ გაავრცელა, ჩემი სიტყვებია. პარლამენტში გამოსვლისას დამისვეს კითხვა ამ საქმესთან დაკავშირებით და მაშინაც ვთქვი, რომ მოკვლევის დასრულებისთანავე შედეგებს გაიგებთ", _ აღნიშნა იზორიამ.
შეგახსენებთ, რომ "ერთიანი ნაციონალური მოძრაობის" აღმასრულებელმა მდივანმა, ზურაბ ჯაფარიძემ 27 იანვარს გამართულ პრესკონფერენციაზე ორი ვიდეო მასალა წარმოადგინა, სადაც, მოქალაქის საპატრულო პოლიციასთან უხეში დამოკიდებულებაა ასახული.
ვიდეოში მოქალაქე ეკა ყუშიტაშვილი პატრულის ერთ-ერთ თანამშრომელს გათავისუფლებით ემუქრება და საპატრულო პოლიციის დეპარტამენტის დირექტორის, დავით ცინარიძის და შსს-ს გენინსპექციის ყოფილი ხელმძღვანელის, ზვიად ჯანყარაშვილის სახელს ახსენებს.
შინაგან საქმეთა სამინისტრომ "ერთიანი ნაციონალური მოძრაობის" მიერ გავრცელებულ ვიდეო-კადრებთან დაკავშირებით მოკვლევა მალევე დაიწყო.
შესწავლის შედეგად გამოვლენილი კანონდარღვევების მიმართ იქნება კანონის შესაბამისი რეაგირება. ხაზგასმით აღვნიშნავთ, რომ შს სამინისტრო რეაგირების გარეშე არ დატოვებს არცერთ მსგავს ფაქტს. სამინისტრო ყველაფერს გააკეთებს იმისთვის, რომ როგორც მოქალაქის, ასევე თითოეული პოლიციელის კანონიერი უფლებები და პატივი იყოს დაცული”, – ნათქვამია შსს-ს მიერ გავრცელებულ განცხადებაში.
