შინაგან საქმეთა მინისტრის მოადგილემ ლევან იზორიამ გივი თარგამაძესთან თანამშრომლობის გამო საპატრულო პოლიციის თანამშრომლის რუსლან ბაზიაშვილის სამსახურიდან დათხოვნის თაობაზე კომენტარია "რეაქციაში" გააკეთა. მისი თქმით, ბაზიაშვილი გურიის სამმართველოში მუშაობდა:
_ მაგალითი გვაქვს, როგორ უწყობს დეპუტატი პოლიციელს ხელს, ანუ აქეზებს, ჩაიდინოს უკანონობა. მოსახლეობას მიეწოდა ინფორმაცია, რომ ეს იყო კანონიერი უფლება პოლიციელის. ხელისუფლება და ოპოზიციაც მათი დაცვისკენ უნდა იყოს მოწოდებული.
ეს ხალხი ყველაზე დიდი სტრესის ქვეშ მუშაობს და შესაბამისად, განა უკანონობა უნდა ჩავადენინოთ, როგორც ეს იყო თარგამაძის ფაქტთან დაკავშირებით, არამედ მათ უსაფრთხოებაზე უნდა ვიფიქროთ, რომ სახლში მშვიდად მივიდნენ.
რუსლან ბაზიაშვილი, რომელიც არ მუშაობდა აჭარის მთავარ სამმართველოში და მუშაობდა გურიის სამმართველოში, ამ ინფორმაციას ვერ ნახავდა. მან ჩააღწია მონაცემთა ბაზაში და უკანონოდ გასცა ეს ინფორმაცია.
თუ რატომ იყო უკანონო, ახლა გეტყვით, კონტრარგუმენტი მოვისმინეთ, რომ თითქოს დეპუტატს აქვს იმის უფლება, მიიღოს ინფორმაცია, არ გასცეს წყარო და არ მისცეს ჩვენება.
კონსტიტუციურად მართლაც გარანტირებულია ეს უფლება, მაგრამ ეს ჩანაწერი კი არ იცავს ინფორმაციის წყაროს, თუ ის სამართალდარღვევას სჩადის, მით უფრო პოლიციელს, რომელოსაც უფრო მეტი შეზღუდვა აქვს ინფორმაციის გაცემის თვალსაზრისით.
სამართლებრივად ამას ქვია მამხილებელი, თუმცა ამ მამხილებელმა, რომელმაც უნდა ამხილოს ვიღაცის უკანონობა, კანონი პირდაპირ განსაზღვრავს ადრესატებს თუ ვის უნდა მიაწოდოს ინფორმაცია.
ამ ადრესატებმა კი, როგორებიც არის საგამოძებო ორგანო, პროკურატურა, სახლახო დამცველი ან შიდა მოკვლევის სამსახური, უნდა დაადგინოს ობიექტურობა ანუ მოწინააღმდეგე არგუმენტიც უნდა მოისმინოს, რათა არ მოხდეს საჯარო სამსახურის დისკრედიტაცია, იმიტომ რომ ამ მამხილებელს შესაძლოა სუბიექტური ინტერესი ჰქონდეს და ამ შემთხვევაში აშკარად კანონი დაირღვა, ეს ემსახურებოდა შსს-ს დისკრედიტაციას.
ბაზიაშვილმა მონაცემთა ბაზიდან ამოიღო ინფორმაცია დევაძის საზღვრის კვეთის შესახებ, მაგრამ მოსახლეობას მიაწოდეს არასრულყოფილად. აქ არის შესაბამისი გრაფები შესვლა ან გამოსვლა, ეს პიროვნება ითხოვდა გასვლას, მაგრამ მათ არ აჩვენეს ის გრაფა, სადაც წერია, რომ უარი ეთქვა მას გასვლაზე, _ განაცხადა იზორიამ.
გურიის სამხარეო პოლიციის მთავარი სამმართველოს უფროსის მოადგილემ ლაშა ბაკურაძემ აღნიშნა, რომ ბაზიაშვილი მისი თანამშრომელი არ იყო:
_ ჩემთან არ მუშაობდა.
_ ეს განცხადება მინისტრის მოადგილემ გააკეთა ბატონო ლაშა. ლევან იზორიამ ტყუილი თქვა?
_ ვინ თქვა რომ ტყუილი თქვა. მიმართეთ პრესსამსახურს და გეტყვიან ყველაფერს. მე იმას გეტყვით, რომ სამხარეო პოლიციის მთავარ სამმართველოში არ მუშაობდა, _ აღნიშნა ბაკურაძემ "გურია ნიუსთან" საუბრისას.
შინაგან საქმეთა სამინისტროს პრესსამსახურის ინფორმაციით ბაზიაშვილი გურიის საპატრულო პოლიციის სამმართველოში მუშაობდა:
_ დაახლოებით 19 წელია სტრუქტურაში მუშაობს. გურიაში გასული წლის მაისში, საპატრულო პოლიციის გახსნის პირველივე დღიდან გადმოვიდა, _ გვთხრეს პრესსამსახურში.
ჩვენ შევეცადეთ კომენტარი საპატრულოს უფროსისგან დავით ჭანტურიასგანც მიგვეღო, თუმცა, ჭანტურიამ "გურია ნიუსის" სატელეფონო ზარებს არ უპასუხა.
