"თავისუფალი დემოკრატების" წევრი და ქალაქ ოზურგეთის მუნიციპალიტეტის საკრებულოს დეპუტატი, თემურ სალუქვაძე "გურია ნიუსში" გამოქვეყნებულ სტატიას "დავა მიწებზე – ვინ ფლობს ჰექტრობით მიწის ნაკვეთებს ოზურგეთის მუნიციპალიტეტში" ეხმაურება.
"როგორც ბუნებრივი სიმდიდრე, უმნიშვნელოვანესია ჩვენი ქვეყნისათვის. მიწიდან მიღებული შემოსავალი, ხშირ შემთხვევაში, ერთადერთი საარსებო წყაროა სოფლის მოსახლეობის დიდი ნაწილისათვის. ამიტომ საკითხი, მიწის იჯარით გაცემისა და პრივატიზაციის შესახებ, არის მეტად მტკივნეული და დიდ დაფიქრებას საჭიროებს", – ამბობს თემურ სალუქვაძე.
მისივე თქმით, თუკი დაუყოვნებლივ საკითხის შესწავლა არ დადგება დღის წესრიგში, მომავალში უფრო ღრმა პრობლემების წინაშე აღმოვჩნდებით.
„მიწის ფართობების შესყიდვის საკითხი დაბა ნასაკირალში (რომელიც, სამწუხაროდ, არ არის ერთადერთი შემთხვევა), საზოგადოებაში ძალიან ბევრ კითხვას ბადებს, რომელსაც აუცილებლად პასუხი უნდა გაეცეს.
მათ შორის: რატომ არის, რომ ათეულობით და მეტი ჰექტარი მიწის ფართობის მფლობელები გახდნენ (ამ შემთხვევაშიც და ზოგადად) ადამიანები, რომლებიც სამსახურეობრივად იყვნენ, ან არიან დაკავშირებული სახელმწიფო სტრუქტურებთან, მიწის ლეგალიზაციის კომისიებთან და ა.შ.
აუცილებელია გასაჯაროვდეს საიჯარო ხელშეკრულებების შინაარსი და პირობები, რომ საზოგადოებამ ნათლად დაინახოს იჯარით გათვალისწინებული ვალდებულებების შესრულების კეთილსინდისიერება.
ვინ იყო და არის პასუხისმგებელი იჯარის გაცემაზე? მოუტანა თუ არა რაიმე სარგებელი სოფელს (რაიონს) მიწის იჯარით გასხვისებამ? თუ არა, ვინ არის ამ საკითხზე პასუხისმგებელი? რატომ ხდება სოფლისთვის (დაბისთვის) უმნიშვნელოვანესი მიწის რესურსის იჯარით გაცემა, ან გასხვისება, სოფლის ხელმძღვანელობის, საკრებულოს წევრების, ან თავად მოსახლეობის ინფორმირების გარეშე? მნიშვნელოვანია გავერკვეთ, რასთან გვაქვს საქმე!
რატომ მოხდა, რამდენიმე წლის შემდეგ, მიწის გასხვისება, ისევ და ისევ, სოფლის მოსახლეობის გვერდის ავლით? (მითუმეტეს თუ ეს ადამიანები წლების განმავლობაში ამუშავებდნენ აღნიშნულ ფართობებს).
მიზანშეწონილად და აუცილებლად მიმაჩნია, ძირეულად შესწავლილ იქნას ოზურგეთის მუნიციპალიტეტში მიწის ფართობების იჯარით გაცემისა და შესყიდვის ფაქტები, არა მხოლოდ ამ კონკრეტულ შემთხვევაში, არამედ ზოგადად. სასურველია საკითხის შესწავლის პროცესში ჩაერთონ დაინტერესებული პირები, სპეციალისტები, დარგობრივი ექსპერტები, საკრებულოს წევრები და სამოქალაქო საზოგადოების წარმომადგენლები". _ ამბობს თემურ სალუქვაძე.
შეგახსენებთ, რომ ოზურგეთის მუნიციპალიტეტის დაბა ნასაკირალის მოსახლეობა, 14 ჰექტარი მიწის ნაკვეთების გასხვისებას აპროტესტებს. მათი განცხადებით, ჩაის ფართობები, რომლითაც თითქმის 15 წელია სარგებლობენ, სხვა პიროვნების საკუთრება ისე აღმოჩნდა, რომ მოსახლეობისთვის ინფორმაცია არავის მიუწოდებია.
