გასულ კვირას, საქართველოს საფეხბურთო ჩემპიონატის 21-ე ტური გაიმართა. ლანჩხუთის ‘გურიამ" სტუმრად ითამაშა მარტვილში, ადგილობრივ "მერანთან" და მინიმალური სხვაობით, 0-1 წააგო. მასპინძელები გასავარდნ ზონასთან სიახლოვის გამო, შინაურ კედლებში ნებისმიერ მოგებას დიდ ფასს ადებენ და ბუნებრივია ყველაფერი იღონეს 3 ქულის ასაღებად.
მართალია პირველ ტაიმში პრიორიტეტები არ იკვეთებოდა, მაგრამ შესვენების შემდეგ, მარტვილელებმა მაინც გატეხეს მეტოქე და 67-ე წუთზე, გეგეჭკორის მიერ გატანილი გოლი ერთადერთი აღმოჩნდა ამ დაპირისპირებაში.
ფაქტია, რომ "გურიას" შეტევაში უჭირს და ამ ფონზე ეს მატჩიც თვალნათელი მაგალითი იყო. გატანის რამდენიმე შანსი ჰქონდათ სტუმრებს, მაგრამ გოლად გარდასახვა ვერავინ შეძლო.
მოგებით "მერანმა" მეათე ადგილზე აიწია და გასავარდნ ზონას 4 ქულა აშორებს. "გურიამ" კი პირიქით, ცხრილში ერთი საფეხურით ქვევით დაიწია და მერვე ადგილზე დარჩა. რაც შეეხება უშუალოდ გასავარდნ ზონას, აქ ფიცხელი ბრძოლა დაიწყო გადარჩენისთვის. ამის დასტურია ის, რომ "ვიტ ჯორჯიამ" და "სიონმა" უმნიშვნელოვანესი მოგებები მიითვალეს. თბილისურმა კლუბმა შინ დაჯაბნა კონკურენტი "ზუგდიდი" -2-0, ხოლო ქვემო ქართლულ დერბში ბოლნისელებმა ღრმა კრიზისში მყოფი "მეტალურგი" მისსავე მოედანზე, რუსთავში დაამარცხეს 2-1.
ცხადად გამოიკვეთა ის სამი გუნდი, რომელიც ჩემპიონობისთვის იბრძოლებს. ამ ეტაპზე ორხელისუფლებიანობაა ჩემპიონატში და ეს მას შემდეგ, რაც ბათუმის "დინამომ" სტუმრად ქორიძის ეული გოლით იმარჯვა "ცხინვალთან". აი, მანამდე ლიდერ თბილისის "დინამოს" ფრიად გაუჭირდა ლანჩხუთში, სადაც პირობითად მასპინძელ ფოთის "კოლხეთთან" უგოლო ფრეს დასჯერდა. ჰოდა, 42-42 ქულით ეს გუნდები ლიდერობენ, რომლებსაც მხოლოდ ქულით ჩამორჩება გორის "დილა", რომელმაც თავის მხრივ გორში მსტუმრებული საჩხერის "ჩიხურა" 2-1 დაამარცხა.
ლიდერ სამეულს საკმაოდ ჩამორჩა "სამტრედია", რომელმაც იმერულ დაპირისპირებაში მარცხი იწვნია სტუმრად ქუთაისის "ტორპედოსთან"- 1-3.
სანაკრებო პაუზის შემდეგ 3 აპრილს განახლდება ჩემპიონატი და ლანჩხუთის "გურია" შინ უმასპინძლებს აუტსაიდერ "ვიტ ჯორჯიას".
