ჩოხატაურის მუნიციპალიტეტის გამგეობის საფინანსო სამსახურის უფროსის, ზურაბ ჩანტლაძის თქმით, “მთავრობა იმას გვაძლევს, რაც გვეკუთვნის”. მისივე თქმით, გარკვეულ სოციალურ პროგრამებს სახელმწიფო აფინანსებს და ამიტომ, მუნიციპალიტეტის ბიუჯეტი ყველაფერს ვერ დააფინანსებს.
ამ თემის გასავრცობად, მას სხდომის დამთავრების შემდეგ გავესაუბრეთ.
_ ბატონო ზურაბ, თქვენ თქვით, რომ მთავრობას იმაზე მეტი არ შეუძლია მოგვცეს, რაც გვეკუთნის. საინტერესოა, რა გვეკუთვნის:ძვირი და ხელმიუწვდომელი ჯანდაცვა, გაზრდილი გადასახადები, გაძვირებული და უხარისხო პროდუქტი, ძვირი უმაღლესი განათლება…
_ გამოთანაბრებითი ტრანსფერის გაანგარიშება ხდება ფორმულით. ფორმულა ძალიან ბევრ მონაცემს შეიცავს. აქედან გამომდინარე, იმ ფორმულის ზევით თანხის მოცემის უფლება რა თქმა უნდა მთავრობას არ აქვს. ეს არის მიღებული კანონი, რომლის საფუძველზე ხდება ტრანსფერების გაანგარიშება. მე ამას ვგულისხმობდი.
_ თქვენ ასევე აღნიშნეთ, რომ გარკვეულ პროგრამებს სახელმწიფო უკვე აფინანსებს. რას გულისხმობთ, ღატაკებისთვის 21-ლარიანი დახმარება გაქვთ მხედველობაში?
_ პროგრამების 95%-ს სახელმწიფო აფინანსებს. ჩვენ კანონით განსაზღვრული გვაქვს რაზე შეიძლება დახმარების გაცემა. მაგალითად, სტიქიით დაზარალებულ მოსახლეს შევუძინოთ სახლი და სხვა ასეთი აუცილებელი, მაგრამ ჩვენ იმაზე მეტს ვდებთ ჩვენს ბიუჯეტში, რასაც კანონი ითვალისწინებს (?!). ეს იმის გამო, რომ გარკვეულ წილად გვინდა ხალხს შევუმსუბუქოთ მდგომარეობა. მთავრობაც ძალიან ბევრს აკეთებს და ჩვენც გვინდა ჩვენი წვლილი შევიტანოთ ამაში.
_ ბატონო ზურაბ, ჩვენ ეს კითხვა საჯარო განხილვაზე დავსვით და მინდა, რომ თქვენ უფრო ჩაგეკითხოთ… მუდამ ამბობთ და ახლაც იმეორებთ, რომ ბიუჯეტი მწირია და გაჭირვებულებს ვერ დაეხმარებით. თუ ეს ასეა, რატომ აძლევთ პოლიციას 60 000 ლარს?
_ როცა განაცხადები შემოვიდა ჩვენთან, პოლიციამ მომავალი წლის ბიუჯეტშიც კვლავ 60 000 ლარი მოითხოვა. ეს თანხა ხმარდება ჩოხატაურის პოლიციას და არა სხვას. ესაა მატერიალურ-ტექნიკური ბაზა, მომავალ წელს დაგეგმილია ტრანსპორტის შეძენა და სხვა. ეს ყველაფერი იმიტომ იდება ბიუჯეტში, რომ ჩოხატაურის მოსახლეობა უფრო მეტად იყოს დაცული. სახელმწიფო უზარმაზარ თანხებს ხარჯავს პოლიციის შენახვაზე და პოლიციის შესახებ კანონის 33-ე მუხლში პირდაპირ ჩაწერილია, რომ ადგილობრივი თვითმართველობის ორგანოები გამოყოფენ დაფინანსებას.
_ ამ სახსრების ხარჯვის მართლზომიერებას და საკანონმდებლო ბაზას ჩვენ სხვა დროსაც დავუბრუნდებით. თუმცა, მაინტერესებს თქვენი პასუხი _ თანხა, შესაძლებლობების მიხედვით არ უნდა გამოყოთ?
_ ამდენი იმიტომ ჩავდეთ, რომ ამდენი სჭირდებათ. მეტიც სჭირდებათ, მაგრამ ჩვენ მეტის საშუალება არ გვაქვს.
_ მეტი რას ნიშნავს ან “დაცულებს” რას ეძახით _ გახშირებული ყაჩაღობების გამო, მოსახლეობას შიშისგან სახლში ღამის გათევის რომ ეშინია?
_ უნდა დაიჭირონ, მაგრამ ეს თანხები აუცილებელია _ გაზის, დენის, წყლის ფულს ჩვენ ვიხდით.
