"გაერთიანებული დემოკრატიული" მოძრაობა განცხადებას ავრცელებს, რომელიც "გურია ნიუსის" ვებგვერდზე გამოქვეყნებულ მასალას ეხება.
"გურია ნიუსის" ვებგვერდზე გამოქვენებულ "გაერთიანებული დემოკრატიული მოძრაობის" ოზურგეთის ორგანიზაციის თავმჯდომარის, თამარ ნადირიძის განცხადებას, ოზურგეთის გამგებლის თანაშემწის (გენდერულ საკითხებში) შეურაცხმყოფელი და ცინიკური განცხადება მოყვა სოციალურ ქსელში.
კერძოდ, თამარ ნადირიძის განცხადება შეეხებოდა უმიწოდ დარჩენილი ლაითურელების პრობლემას, რასაც გენდერულ საკითხებში თანაშემწის შემდეგი კომენტარი მოჰყვა – "საოცრებაა რა, ლაითურს ჰყავს მაჟორიტარიც და გამგებლის წარმომადგენელიც, რომლებიც "ქალაქელების" დახმარების გარეშეც მოაგვარებენ ამ საკითხს".
"გაერთიანებული დემოკრატიული მოძრაობა" ოზურგეთის გამგებლის მერაბ ჭანუყვაძისაგან ითხოვს განმარტებებს შემდეგ საკითხებზე:
_ ემთხვევა თუ არა გამგებლის პოზიცია მისივე თანაშემწის პოზიციას – ლაითურელების პრობლემის გადაჭრასთან დაკავშირებით, კერძოდ, იმ ნაწილში რომ ამ საკითხს გადაწყვეტაში არავის ჩარევა არ არის საჭირო გარდა ლაითურის "მაჟორიტარისა და გამგებლის რწმუნებულისა."
– ასევე, ვითხოვთ ოფიციალურ განმარტებებს იმ დაბალხარისხიან ცინიზმზე, რომელსაც შეიცავს გენდერულ საკითხებში თანაშემწის განცხადება, კერძოდ აპირებს თუ არა ოზურგეთის გამგეობა ამ ფორმით ოპოზიციასთან და საზოგადოებასთან ურთიერთობას.
ასევე, ვაცხადებთ, რომ გამგებლის თანაშემწის (გენდერულ საკითხებში) განცხადება არ შეეფერება საჯარო მოხელის ეთიკას და ასეთი სამოხელეო პრაქტიკის განვითარება ხელს არ შეუწყობს გამგეობის ურთიერთობას არც ოპოზიციასთან და არც საზოგადოებასთან", _ აღნიშნულია "გაერთიანებული დემოკრატიული მოძრაობის" გურიის რეგიონული ორგანიზაციის ხელმძღვანელის, კახა ჩავლეშვილის მიერ გაკეთებულ განცხადებაში.
"გურია ნიუსი" დაუკავშირდა ოზურგეთის მუნიციპალიტეტის გამგებლის თანაშემწე ნია მექვაბიშვილს, რომელმაც აღნიშნა, რომ დაბა ლაითურის მიწებთან დაკავშირებული პრობლემები ქალაქ ოზურგეთის დეპუტატის ჩასარევი თემა არ იყო.
"მე გავაკეთე კომენტარი ქალბატონ თამარ ნადირიძის მიერ გავრცელებულ განცხადებაზე, მართალია, ეს გენდერულ საკითხებს არ ეხებოდა, თან მე განთავისუფლებული ვარ და ეს არ მომხდარა სამუშაო საათებში.
რაც შეეხება ჩემს მიერ გაკეთებულ განცხადებას, ერთ რამეს ვიტყვი, რომ სოფელს ჰყავს მაჟორიტარი დეპუტატი, ჰყავს თემთა საკრებულო, გამგებლის წარმომადგენელი და თუ რაიმე დასაწერი და გასარკვევი იქნებოდა, მე მგონი ჯერ უნდა გაეკეთებინა თემთა საკრებულოს, კი არიან ისეთი ადამიანები, რომლებით თავს გაართმევდნენ ამ საკითხს და სათანადოდ მოაგვარებდნენ. ასე, რომ ქალაქის დეპუტატის ჩასარევი თემა ეს ერთი წუთით არ იყო", _ აღნიშნავს მექვაბიშვილი.
ემთხვევა თუ არა გამგებლის პოზიცია მისივე თანაშემწის პოზიციას -კომენტარს აკეთებს ოზურგეთის მუნიციპალიტეტის გამგებელი მერაბ ჭანუყვაძე:
"გამგებლის პოზიცია არის ის, რასაც პირადად ან ოფიციალურ გვერდზე ვდებ. მე კარგად ვიცნობ ამ პრობლემებს და ახლავე ვშუამდგობლობ კონკრეტულ კომპანიასთან. დაზარალებულ მოსახლეობას სახელმწიფოსთან პრობლემა არ აქვს, რადგან ეს მიწები კერძო მფლობელობაშია", _ აღნიშნავს გამგებელი.
