"ორშაბათს, ვგეგმავთ ფართომასშტაბიან საპროტესტო აქციას, გადავკეტავთ გზას მთისპირის ცენტრში და "ბახვი ჰესის 3 " დიდ მანქანებს არ გავატარებთ, შევაჩერებთ ჰესის მშენებლობას, მაღალმთიანი სოფელია მთისპირი და თითქმის ყველა მიმართულებით პრობლემები გვაქვს. ახალი ხელისუფლებისგან ყურადღების მოქცევას უფრო მეტად ველოდებით" , _ ამის შესახებ "გურია ნიუსს" სოფელ მთისპირში ე.წ. "უკანავას" მოსახლეობამ განუცხადა.
ადგილობრივების თქმით, რაც ჰესის მშენებლობა დაიწყო სოფელთან დამაკავშირებელი გზა სულ დაინგრა.
"სოფელში ბევრი რამ არის გასაკეთებელი. ყველაზე დიდი პრობლემა, უგზოობა, რაც "უკანავას" მოსახლეობას ძალიან გვაწუხებს",- გვითხრა ვენერა ართმელაძემ.
შპს "ბახვი 3 ჰესის"-ის ჰიდროელექტროსადგურის სამშენებლო სამუშაოები, ოზურგეთის მუნიციპალიტეტის სოფელ მთისპირში 2011 წლიდან დაიწყო, მთავარი სამანქანე დანადგარების შენობა 2012 წელს, საარჩევნოდ გაიხსნა.
სოფელი მთისპირი ოზურგეთის მუნიციპალიტეტის ცენტრიდან 23 კილომეტრით, მასში შემავალი სოფელი "უკანავა" სადაც "ბახვი 3" შენდება, მთისპირის ცენტრიდან 5 კილომეტრითაა დაშორებული. ტერიტორია სადაც "ბახვი 3 " შენდება 6 ოჯახი ცხოვრობს, რომელთა ყოფითი გასაჭირის სათავე, უმუშევრობაა.
მაღალმთიან და საკმაოდ რთული რელიეფის მქონე სოფელში უპირველეს პრობლემად უგზოობა სახელდება _ ისედაც მეწყერსაშიშ ზონაში მდებარე გზის კატასტროფულად დაზიანება ჰესის მშენებლობის გამო წარმოშობილმა ბზარებმა და ნაქცევებმა გამოიწვია. ეს ყველაფერი ახალი მეწყრის წარმოქმნის საშიშროებას ქმნის. სწორედ ამის გამო, შარშან მოსახლეობამ აქციაც კი გამართა. უკვე განადგურებულია ტყის მასივის დიდი ნაწილი.
სარეკრეაციო და საკურორტო ზონაში ჰესის მშენებლობამ გარემო შეცვალა.
ნაზი ართმელაძის, თქმით წვიმიან ამინდში ბავშვების სკოლაში გადაყვანა ძალიან უჭირთ.
"კისრამდე ტალახში ვართ, ერთი ბავშვი მყავს და სკოლაში ვერ დამყავს ტალახის გამო, ზურგით გადამყავს, დაღუპეს ყველაფერი, სოფლის სასარგებლოთ არაფერი არ გაუეკთებიათ, აღარც ტყე გვაქვს, გაანადგურეს ყველაფერი, გზა ხომ საერთოდ არაა, მგელი, ტურა, ყოველდღე ჭამს შინაურ ცხოველებს, აწი ჩვენც შეგვჭამს, სხვას აღარ ვამბობთ არაფერს", _ამბობს ნაზი ართმელაძე.
"უკანავაში" მცხოვრები 22 წლის შორენა მარკოიძის მრავალსულიანი ოჯახი, ერთი პენსიონერის იმედზეა.
"მყავს მცირეწლოვანი შვილი, დედამთილს სიმსივნე აქვს, მამამთილს ყელზე აქვს სიმსივნე, ნაოპერაციებია, ვერ ლაპარაკობს. მეუღლე არ მუშაობს, მე მცირეწლოვანი შვილი მყავს, ძალიან გვიჭირს", – ამბობს შორენა მარკოიძე.
ოზურგეთის მუნიციპალიტეტის სოფელ მთისპირის მაჟორიტარი დეპუტატი ვლადიმერ ჩავლეშვილი "გურია ნიუსთან" აღნიშნავს, რომ პრობლემები სოფელ უკანავაში გზასთან დაკავშირებით ნამდვილად არსებობს.
"საქმის კურსში ჩაყენებული მყავს ხელისუფლება, "ბახვი 3" წარმომადგენლები, იყვნენ ინფრასტრუქტურის სამსახურიდან, საკითხი შესწავლილია. გზის შესაკეთებლად საჭიროა ინერტული მასალები. მისი ამოღება, რომ კარიერიდან მოხდეს, გვჭირდება სახელმწიფოს თანხმობა. გაგზავნილია წერილი და ველოდებით პასუხს", – გვითხრა დეპუტატმა.
